The Phnom Penh Post Search

Search form




Logo of Phnom Penh Post newspaper Phnom Penh Post - លោក​ ហ៊ុន សែន ថា រាជរដ្ឋាភិបាល​មិនបាន​ចោទ​អាមេរិក​ទេ​រឿងក្ដី កឹម សុខា

លោក​ ហ៊ុន សែន ថា រាជរដ្ឋាភិបាល​មិនបាន​ចោទ​អាមេរិក​ទេ​រឿងក្ដី កឹម សុខា

Content image - Phnom Penh Post
លោក ហ៊ុន សែន និង​លោក កឹម សុខា ក្នុង​ពិធី​បុណ្យសព​។ រូបថត SPM

លោក​ ហ៊ុន សែន ថា រាជរដ្ឋាភិបាល​មិនបាន​ចោទ​អាមេរិក​ទេ​រឿងក្ដី កឹម សុខា

អាមេរិកៈ លោកនាយក​រដ្ឋមន្ត្រី ហ៊ុន សែន បាន​ច្រានចោល​ចំពោះ​ការលើកឡើង​ជុំវិញ​ថា រាជរដ្ឋាភិបាល និង​តុលាការ​កម្ពុជា​បាន​ចោទ​ប្រទេស​សហរដ្ឋអាមេរិក​ជាប់​ពាក់ព័ន្ធ​ទៅនឹង​សំណុំរឿង​លោក កឹម សុខា អតីត​ប្រធាន​គណបក្ស​សង្គ្រោះ​ជាតិ​។ ប៉ុន្តែ​សហមេធាវី លោក​ កឹម សុខា ​ថា ការលើកឡើង​របស់លោក នាយករដ្ឋមន្ត្រី នេះ​វា​សមល្មម​ដែល​អាច​លើកលែង​ពី​ការចោទប្រកាន់​កូនក្តី​របស់លោក​បាន​។

លោកនាយក​រដ្ឋមន្ត្រី ហ៊ុន សែន ថ្លែង​នៅក្នុង​ជំនួប​ជាមួយ​ប្រជាពលរដ្ឋ​ខ្មែរ​ប្រមាណ ២ ០០០ ​នាក់​នៅ​សហរដ្ឋអាមេរិក​នៅ​ថ្ងៃទី​ ១២​ ខែឧសភា បញ្ជាក់ថា ករណីនេះ លោក កឹម សុខា បាន​និយាយ​ដោយ​ខ្លួនឯង​នៅក្នុង​វីដេអូ​ឃ្លីប ថា មាន​បរទេស​នៅ​ពីក្រោយ និង​​រៀបចំ​ផែនការ​ឱ្យ​។ ដូច្នេះ​សហរដ្ឋអាមេរិក និង​លោក កឹម សុខា ត្រូវ​ដោះស្រាយ​គ្នា​តែ​ ២ ​នាក់​ទៅ​។

លោកនាយក​រដ្ឋមន្ត្រី​ថ្លែងថា​៖ «​ទាំង​តុលាការ ទាំង​រាជរដ្ឋាភិបាល​អត់​មាន​ចោទ​អាមេរិក​ទេ អ្វីដែល​កើតមាន គឺ ​កឹម សុខា និយាយ​ពី​អាមេរិក​ឱ្យជួយ​អ៊ីចេះៗ​ៗ​។ រឿងនេះ វា​មិនមែន​រឿង​រវាង​កម្ពុជា និង​អាមេរិក​ឯណា រឿង​ កឹម សុខា អ៊ីចឹង​អាមេរិក​ត្រូវធ្វើ​ឥរិយាបថ​យ៉ាងម៉េច​ថា «​ម៉េច​បាន​យកឈ្មោះ​ខ្ញុំ​ទៅ​និយាយ​» រឿង​ហ្នឹង​វា​តែ​ប៉ុណ្ណឹង​តើ យើង​អត់​បាន​ទៅ​ចោទ​អាមេរិក ជួយ​ផ្តួលរំលំ​រដ្ឋាភិបាល​ទេ គឺ កឹម សុខា ទេ និយាយ​ខ្លួនឯង តើ​»​។

បើតាម​លោកនាយក​រដ្ឋមន្ត្រី ហ៊ុន សែន ទាំង​ឯកសារ​ភ័ស្តុតាង​ដើមបណ្តឹង និង​ទាំង​ឯកសារ​ភ័ស្តុតាង​របស់​មេធាវី​របស់ លោក កឹម សុខា ដែល​ដាក់​នៅ​តុលាការ​គឺ មិនមាន​អ្វី​ខុសគ្នា​នោះទេ ហើយក៏​គ្មាន​អ្នក​យកមក​កាត់ត​នោះដែរ​។

តែ​ទោះជា​យ៉ាងណា​លោកនាយក​រដ្ឋមន្ត្រី​បញ្ជាក់​ករណីនេះ ដំណើរការ​យ៉ាងណា វា​គឺជា​នីតិវិធី​របស់​តុលាការ​តែប៉ុណ្ណោះ លោក មិន​លូកដៃ​ចូល​នោះទេ​។

ចំពោះ​បញ្ហា​នេះ លោកនាយក​រដ្ឋមន្ត្រី ហ៊ុន សែន មិនបាន​លើក​មក​និយាយ​ជាមួយ​លោក កឹម សុខា នៅពេល​ជួប​លោក​រយៈពេល ៤ ​ម៉ោង នៅឯ​ខេត្តកំពង់ចាម នៅពេល​ដែល​លោក កឹម សុខា បាន​ដឹកនាំ​គណៈប្រតិភូ​ចូលរួម​គោរព​វិញ្ញាណក្ខន្ធ​បងប្រុស​ទី​ ២ របស់​លោក​នោះទេ​។ ប៉ុន្តែ​នៅពេលនោះ លោកនាយក​រដ្ឋមន្ត្រី ហ៊ុន សែន បាន​លើកឡើងថា ការធ្វើ​ដំណើរ​ចេញទៅ​ក្រៅប្រទេស​របស់​លោក កឹម សុខា ដើម្បី​ពិនិត្យមើល​សុខភាព និង​សួរសុខទុក្ខ​កូនចៅ​មិនមាន​អ្វី​ជា​បញ្ហា​នោះទេ ខណៈ​ដែល​បច្ចុប្បន្ននេះ លោក កឹម សុខា មាន​សិទ្ធិ​ធ្វើដំណើរ​នៅក្នុង​ស្រុក​បាន​។

លោក​ថ្លែងថា​៖ «​រឿង​ កឹម សុខា មក​ក្រៅ មិនគួរ​ក្លាយ​ទៅជា​ឧបសគ្គ​នោះទេ ប៉ុន្តែ​ត្រង់​សម្រេច​ឱ្យទៅ ឬ​មិនឱ្យ​ជា​អំណាច​របស់​តុលាការ ខ្ញុំ​មិន​លូកលាន់​ទេ តែ​បំណង​របស់ខ្ញុំ ខ្ញុំ​គិតថា បើ​ខ្ញុំ​ជា​តុលាការ បើ​សុំ ខ្ញុំ​ឱ្យ ប៉ុន្តែ​ខ្ញុំ​មិនមែន​ជា​ចៅក្រម កុំ យល់ច្រឡំ​ថា ខ្ញុំ​គាបសង្កត់​ទៅលើ​តុលាការ​ឱ្យ​លោក កឹម សុខា ចាកចេញ ខ្ញុំ​មិន​ធ្វើ​អ៊ីចឹង​ទេ​»​។

ជាមួយ​គ្នានេះ លោកនាយក​រដ្ឋមន្ត្រី ហ៊ុន សែន ក៏បាន​ថ្លែង​កោតសរសើរ និង​គោរព លោក កឹម សុខា ដែលមាន​សមាន​ចិត្ត​ចូលរួម​គោរព​វិញ្ញាណក្ខន្ធ​ទាំង​ម្តាយក្មេក និង​បងប្រុស​​ទី​ ២ ​របស់លោក​ផងដែរ ប៉ុន្តែ​លោក​បាន​រិះគន់​ចំពោះ​លោក សម រង្ស៊ី មេដឹកនាំ​អតីត​គណបក្ស​សង្គ្រោះ​ជាតិ​នៅក្រៅ​ប្រទេស​ដែល​មិនបាន​ផ្ញើ​សារ រំលែកទុក្ខ​ថា មិនបាន​ចាប់យក​ឱកាស​ក្នុង​ការវិល​ចូល​កម្ពុជា​វិញ និង​ជា​មនុស្ស​ល្ងង់​។

ក្នុងជំនួប​ជាមួយ​លោក ប្រាក់ សុខុន រដ្ឋមន្ត្រី​ក្រសួង​ការបរទេស និង​សហប្រតិបត្តិការ​អន្តរជាតិ នៅឯ​សហរដ្ឋអាមេរិក លោកស្រី Wendy Ruth Sherman អនុរដ្ឋមន្ត្រី​ការបរទេស​សហរដ្ឋអាមេរិក​ក៏បាន​លើកឡើង​ពី​ការព្រួយបារម្ភ​ចំពោះ​សវនាការ​លោក​ កឹម សុខា ​ផងដែរ​។

លោក ចាន់ ចេន សហមេធាវី​របស់​លោក កឹម សុខា បាន​ប្រាប់​ភ្នំពេញ​ប៉ុស្តិ៍​នៅ​ថ្ងៃទី​ ១២ ខែឧសភា​ថា ចំពោះ​ការ​ថ្លែង​បដិសេធ​របស់​លោកនាយក​រដ្ឋមន្ត្រី ហ៊ុន សែន ថា សំណុំរឿង​កូនក្តី​របស់​លោក គឺ​លោក កឹម សុខា មិន​ជាប់​ពាក់ព័ន្ធ​ទៅ​​នឹង​សហរដ្ឋអាមេរិក គឺ​វា​គ្រប់គ្រាន់​សម្រាប់​ការទម្លាក់​ការចោទប្រកាន់​ទៅលើ​កូនក្តី​របស់លោក​។

លោក​ថ្លែងថា​៖ «​ចំណុច​នេះ គឺជា​ចំណុច​សំខាន់​មែនទែន ពីព្រោះ​នៅក្នុង​រឿងក្តី​នេះ​សំខាន់​គឺ​ភាគី​ដើមចោទ​ដែលមាន​រដ្ឋាភិបាល​ជា​អ្នកចោទ​ប្រកាន់​។ អ៊ីចឹង​បើ​ដើមចោទ ខាង​រដ្ឋាភិបាល​មិនបាន​ចោទប្រកាន់​ទេ វា​ច្បាស់​ហើយ​ថា ជា​រឿង​របស់​កូនក្តី​របស់ខ្ញុំ​ជាមួយ​នឹង​អាមេរិក​។ អ៊ីចឹង យើង​មិនចាំបាច់​ធ្វើការ​វិភាគ ឬ​លើកឡើង​នូវ​អំណះអំណាង​អី​ទេ ការលើក​ឡើង​របស់​ប្រមុខ​រាជរដ្ឋាភិបាល​ប៉ុណ្ណឹង វា​គ្រប់គ្រាន់​ក្នុងការ​ទម្លាក់​ការចោទប្រកាន់​មកលើ​កូនក្តី​របស់​យើងខ្ញុំ​»​។

លោក គិន ភា ប្រធាន​វិទ្យាស្ថាន​ទំនាក់ទំនង​អន្តរជាតិ​នៃ​រាជបណ្ឌិត្យ​សភា​កម្ពុជា​ប្រាប់​ភ្នំពេញ​ប៉ុស្តិ៍​នៅ​ថ្ងៃទី​ ១២ ខែឧសភា​ថា ករណី​សំណុំរឿង​លោក កឹម សុខា បើ​ផ្អែកទៅលើ​អង្គហេតុ​ដែលមាន​វីដេអូ​ឃ្លីប ដែល​លោក​ កឹម សុខា និយាយ គឺ​វា​ពាក់ព័ន្ធ​នឹង​លោក កឹម សុខា ដែលមាន​ការ​ទំនុកបម្រុង​របស់​សហរដ្ឋអាមេរិក​។

តែ​ទោះជា​យ៉ាងណា ពាក្យ​ថា សហរដ្ឋអាមេរិក​នេះ​មិនបាន​សំដៅ​ដល់​រដ្ឋាភិបាល​សហរដ្ឋ​អាមេរិក​ទេ ដោយ​មិនដឹងថា សហរដ្ឋអាមេរិក​ណា​ទេ​ជា​បុគ្គល​សហរដ្ឋអាមេរិក ឬ ក្រុម​ណាមួយ​នោះទេ​។

លោក​ថ្លែងថា​៖ «​តួអង្គ​ដែល​ពាក់ព័ន្ធ​នឹង​រឿង​ហ្នឹង គឺ​សហរដ្ឋ​អាមេរិក​ដែល​កំណត់​មិនបាន ហើយ​និង​តួអង្គ​លោក ​កឹម សុខា​។ បើ​យើង​ថា រដ្ឋាភិបាល​អាមេរិក គឺ​មិនមែន​ទេ ប៉ុន្តែ​រដ្ឋាភិបាល​កម្ពុជា​ជាដើម​បណ្តឹង​នៅក្នុង​ករណី​ហ្នឹង ពីព្រោះ​រាជរដ្ឋាភិបាល​មាន​ភារកិច្ច​រក្សា​នូវ​សណ្តាប់ធ្នាប់ និង​សន្តិសុខ​ជាតិ​។ អ្វីដែល​វា​ប៉ះពាល់​ដល់​សន្តិសុខ​ជាតិ ចាំបាច់​ត្រូវតែមាន​វិធានការ​ផ្លូវច្បាប់​»​។

លោក​ថា សំណុំរឿង​លោក កឹម សុខា ដែល​ត្រូវបាន​ចោទ​ពី​បទ​សន្ទិដ្ឋភាព​ជាមួយ​នឹង​បរទេស​នេះ វា​តិច ឬក៏​ច្រើន​តែងតែ​ប៉ះពាល់ និង​រំខាន​ដល់​ទំនាក់ទំនង​រវាង​កម្ពុជា និង​សហរដ្ឋអាមេរិក​មិន​ខាន​នោះទេ ពីព្រោះ​សហរដ្ឋអាមេរិក តែងតែ​លើកឡើង​រហូត​មកទល់​នឹង​បច្ចុប្បន្ននេះ​៕

វីដេអូ៖

អត្ថបទគួរចាប់អារម្មណ៍