ភ្នំពេញៈ លោកនាយករដ្ឋមន្ត្រី ហ៊ុន សែន ជំរុញឱ្យប្រព័ន្ធផ្សព្វផ្សាយអាមេរិកផ្សព្វផ្សាយពីការពិតរបស់កម្ពុជា ខណៈលោកអះអាងថា កម្ពុជាបានរងនូវភាពអយុត្តិធម៌កើតចេញពីការផ្សព្វផ្សាយព័ត៌មានមិនពិត។
លោកជំរុញបែបនេះនៅក្នុងជំនួបជាមួយលោក មីសែល ភីទ្រុសហ្សិលឡូ (Michael Petruzzello) ប្រធានក្រុមហ៊ុនទំនាក់ទំនងសាធារណៈ (PR Firm-Qorvis Communication) របស់អាមេរិកនាថ្ងៃទី ១២ ខែឧសភា ក្នុងឱកាសលោកទៅចូលរួមកិច្ចប្រជុំកំពូលពិសេសអាស៊ាន-អាមេរិក ដែលធ្វើឡើងនៅថ្ងៃទី ១២-១៣ ខែឧសភា នៅរដ្ឋធានីវ៉ាស៊ីនតោន សហរដ្ឋអាមេរិក។
នៅក្នុងជំនួបនេះលោក ហ៊ុន សែន ថ្លែងថា ការផ្សព្វផ្សាយនូវអ្វីដែលជាតថភាពជាក់ស្តែងរបស់កម្ពុជាគឺជារឿងសំខាន់ណាស់ ដោយស្ថានភាពរបស់កម្ពុជានាពេលបច្ចុប្បន្ន មិនដូចអ្វីដែលលើកឡើងនៅទំព័រសារព័ត៌មានប្រឆាំងនឹងកម្ពុជានោះទេ។
ទំព័រហ្វេសប៊ុកលោកនាយករដ្ឋមន្ត្រី ហ៊ុន សែន បញ្ជាក់ក្រោយជំនួបនេះថា៖ «សម្តេចតេជោ ក៏បានជំរុញឱ្យប្រព័ន្ធផ្សព្វផ្សាយរបស់អាមេរិកទស្សនកិច្ច និងសរសេរការពិតរបស់កម្ពុជា»។
លោក ហ៊ុន សែន ថ្លែងថា៖ «កម្ពុជាមិនចង់ឱ្យផ្សព្វផ្សាយនូវអ្វីដែលហួសពីការពិតរបស់កម្ពុជានោះដែរ ពោលគឺផ្សាយត្រឹមស្ថានភាពជាក់ស្តែងរបស់កម្ពុជាតែប៉ុណ្ណោះ។ កម្ពុជាបានរងនូវអយុត្តិធម៌ច្រើនណាស់ កើតចេញពីការផ្សព្វផ្សាយព័ត៌មានមិនពិត ប្រាស់ចាកពីសភាពពិតនៅកម្ពុជា»។
លោកបន្តថា ស្ថាប័នអន្តរជាតិមួយចំនួនតែងតែយកការផ្សព្វផ្សាយព័ត៌មានជាមូលដ្ឋានក្នុងការវាយតម្លៃរបស់ខ្លួន ហើយនាំឱ្យការវាយតម្លៃមិនបានត្រឹមត្រូវ ព្រោះព័ត៌មានដែលស្ថាប័នអន្តរជាតិទាំងនោះយកជាមូលដ្ឋានជាប្រភពផ្សព្វផ្សាយមិនបានឆ្លុះបញ្ចាំងពីការពិតនៅកម្ពុជា។
បើតាមហ្វេសប៊ុកលោក ហ៊ុន សែន លោក Petruzzello ចង់ឃើញកម្ពុជាបង្កើនការបណ្តុះបណ្តាលអ្នកនាំពាក្យ និងតំណាងរបស់កម្ពុជានៅគ្រប់វិស័យទាំងអស់ ដើម្បីបង្កើនសមត្ថភាពក្នុងការបង្ហាញ និងឆ្លើយតបបញ្ហារបស់កម្ពុជាទៅកាន់ពិភពលោក។
លោក ហ៊ុន សែន ប្រាប់លោក Petruzzello ថា កម្ពុជាកំពុងជំរុញការបណ្តុះបណ្តាលមន្ត្រីអ្នកនាំពាក្យឱ្យមានសមត្ថភាពកាន់តែខ្ពស់ ក្នុងការផ្តល់ព័ត៌មានជាក់ស្តែងស្តីពីការរីកចម្រើនរបស់កម្ពុជា ព្រោះការបណ្តុះបណ្តាលមន្ត្រីអ្នកនាំពាក្យជារឿងសំខាន់ណាស់សម្រាប់កម្ពុជា ដើម្បីពាំនាំការពិតរបស់កម្ពុជាទៅកាន់ពិភពលោក។
យោងតាមហ្វេសប៊ុកលោក ហ៊ុន សែន លោក Petruzzello បានសន្យាជួយជំរុញដល់ការផ្សព្វផ្សាយការពិតពីកម្ពុជា៕