ភ្នំពេញៈ លោកនាយករដ្ឋមន្ត្រី ហ៊ុន សែន ប្រាប់ក្រុមហ៊ុនប្រឹក្សាយោបល់ផ្នែកច្បាប់ឱ្យបញ្ចុះបញ្ចូលយ៉ាងណាកុំឱ្យមានការភាន់ច្រឡំលើទំនាក់ទំនងកម្ពុជា-អាមេរិក ដោយលោកលើកករណីកន្លងមកថា ការដែលសហរដ្ឋអាមេរិកបានចោទប្រកាន់កម្ពុជាថាមានវត្តមានយោធាចិននៅកំពង់ផែរាមគឺជារឿងមិនពិត។
លោកប្រាប់ទៅក្រុមហ៊ុនបញ្ចុះបញ្ចូលអាមេរិកដូច្នេះនៅក្នុងជំនួបជាមួយលោក ស្កុត ដេវីដ ផាវិន (Scott David Parven) តំណាងក្រុមហ៊ុនប្រឹក្សាយោបល់ និងបញ្ចុះបញ្ចូលផ្នែកច្បាប់របស់អាមេរិក នៅថ្ងៃទី ១២ ខែឧសភានៅរដ្ឋធានីវ៉ាស៊ីនតោន សហរដ្ឋអាមេរិកក្នុងឱកាសដែលលោកទៅចូលរួមកិច្ចប្រជុំកំពូលពិសេសអាស៊ាន-អាមេរិក នៅថ្ងៃទី ១២-១៣ ខែឧសភា។
ហ្វេសប៊ុកលោកនាយករដ្ឋមន្ត្រី ហ៊ុន សែន បញ្ជាក់ថា៖ «សម្តេចតេជោបានណែនាំទៅក្រុមហ៊ុនប្រឹក្សាយោបល់ និងបញ្ចុះបញ្ចូលរបស់អាមេរិកថា មានកិច្ចការមួយចំនួនទៀត ដែលត្រូវធ្វើបន្ត គឺធ្វើយ៉ាងណាកុំឱ្យមានការភាន់ច្រឡំលើទំនាក់ទំនងរវាងប្រទេសទាំង ២»។
ហ្វេសប៊ុកដដែលបន្តថា៖ «ដូចជាកន្លងមកអាមេរិក មានការចោទប្រកាន់លើកំពង់ផែរាមថា មានវត្តមានយោធាចិន ដែលជារឿងមិនត្រឹមត្រូវ និងមិនពិត ព្រោះកម្ពុជាមានគោលជំហរច្បាស់លាស់ ដោយប្រកាន់នយោបាយអព្យាក្រឹតអចិន្ត្រៃយ៍ មានចែងច្បាស់ក្នុងរដ្ឋធម្មនុញ្ញ ហើយកម្ពុជាគ្មាននយោបាយជ្រើសរើសរវាងចិន និងអាមេរិកនោះទេ»។
លោក ហ៊ុន សែន បានប្រាប់លោក Parven ថា ការផ្អាកធ្វើសមយុទ្ធជាមួយអាមេរិកកាលពីឆ្នាំ ២០១៧ គឺដោយសារកម្ពុជាត្រូវរៀបចំការបោះឆ្នោតក្រុមប្រឹក្សាឃុំ សង្កាត់នៅឆ្នាំ ២០១៧ នេះ ហើយកម្ពុជាក៏មិនមានបំណងបង្អាក់ទំនាក់ទំនងផ្នែកយោធាជាមួយអាមេរិកនោះទេ។
លោកបន្តថា ការអនុញ្ញាតឱ្យនាវាប្រទេសនានាចូលចតនៅកំពង់ផែរបស់កម្ពុជានាពេលកន្លងមកគឺជាការបង្ហាញឱ្យឃើញនូវការធ្វើទំនាក់ទំនងដោយបើកចំហរបស់កម្ពុជាជាមួយ «បណ្តាប្រទេសជាមិត្ត»។
ហ្វេសប៊ុកលោក ហ៊ុន សែន បានដកស្រង់សំដីលោក Parven ថា កន្លងមកក្រុមហ៊ុនររបស់លោកបានធ្វើជាច្រើនជាមួយស្ថានទូតកម្ពុជាប្រចាំនៅសហរដ្ឋអាមេរិក ដើម្បីជំរុញឱ្យទំនាក់ទំនងរវាងកម្ពុជា និងអាមេរិកមានភាពល្អប្រសើរ។
លោក Parven ត្រូវបានស្រង់សំដីថា ក្រុមហ៊ុនរបស់លោកបានទាក់ទងជាមួយថ្នាក់ដឹកនាំរបស់អាមេរិកនៅស្ថាប័នសភា ក៏ដូចជារដ្ឋាភិបាលធ្វើយ៉ាងណាឱ្យអាមេរិកយល់ពីជំហររបស់កម្ពុជាទាំងទំនាក់ទំនងទ្វេភាគី ការងារអាស៊ាន និងការងារអន្តរជាតិ ជាពិសេសគោលជំហររបស់កម្ពុជាពាក់ព័ន្ធការឈ្លានពានរបស់រុស្ស៉ី លើអ៊ុយក្រែន ការបម្រែបម្រួលអាកាសធាតុ ពាណិជ្ជកម្ម និងការខិតខំរបស់កម្ពុជាខាងផ្នែកមនុស្សធម៌។
ទំព័រហ្វេសប៊ុកលោក ហ៊ុន សែន បានដកស្រង់សំដី លោក Parven មកផ្សព្វផ្សាយថា តាមរយៈជំនួបជាមួយថ្នាក់ដឹកនាំស្ថាប័នសភា និងរដ្ឋាភិបាលអាមេរិកនោះ លោក Parven បានគូសរំលេចថា អ្វីដែលកម្ពុជាបានធ្វើនាពេលកន្លងមកនេះ ជារឿងដ៏ល្អ ដែលគួរតែអបអរសាទរ និងផ្តល់តម្លៃសម្រាប់កម្ពុជា។
នៅចំពោះមុខ លោក Parven នៅក្នុងជំនួបនេះ លោក ហ៊ុន សែន បញ្ជាក់ថា ទំនាក់ទំនងរវាងកម្ពុជា និងអាមេរិកនាពេលបច្ចុប្បន្នបានឈានដល់កម្រិតល្អប្រសើរមួយមិនធ្លាប់មានក្នុងប្រវត្តិសាស្ត្រនៃទំនាក់ទំនងរវាងប្រទេសទាំង ២។
ទំព័រហ្វេសប៊ុកលោក ហ៊ុន សែន បានឱ្យដឹងថា អ្វីដែលអាមេរិកមិនធ្លាប់មានពីមុនមកក្នុងទំនាក់ទំនងជាមួយកម្ពុជា គឺបានមានក្នុងពេលធ្វើទំនាក់ទំនងជាមួយរដ្ឋាភិបាលកម្ពុជា ដែលដឹកនាំដោយលោក ហ៊ុន សែន ដូចជាការជួយឱ្យមានទីតាំងស្ថានទូតជាក់លាក់ ការរីកចម្រើនផ្នែកសេដ្ឋកិច្ច ពាណិជ្ជកម្ម និងការវិនិយោគរវាងប្រទេសទាំង ២។
លោក ហ៊ុន សែន អះអាងថា ក្នុងរយៈពេល ៤ ខែឆ្នាំ ២០២២ ទំហំពាណិជ្ជកម្មរវាងកម្ពុជា និងអាមេរិក មានកំណើនគួរឱ្យសម្គាល់ទោះបីស្ថិតក្នុងវិបត្តិជំងឺកូវីដ ១៩។
ក្នុងនោះកម្ពុជាបាននាំទំនិញទៅកាន់សហរដ្ឋអាមេរិក កើនឡើងដល់ទៅ ៤៤ ភាគរយ។
លោកបន្តថា សហរដ្ឋអាមេរិកបានជួយការអភិវឌ្ឍជាច្រើននៅកម្ពុជា ដូចជាជំរុញពាណិជ្ជកម្ម វិនិយោគ ការដោះមីន ការបណ្តុះបណ្តាល និងការផ្តល់វ៉ាក់សាំងសម្រាប់ប្រយុទ្ធប្រឆាំងនឹងជំងឺកូវីដ ១៩ ជាដើម៕