.jpg)
រូបភាព Child Protection Unit
កំពង់ស្ពឺ/ព្រះសីហនុៈ បុរសជាប្តីត្រូវបានធ្វើការចាប់ខ្លួនក្នុងខេត្តកំពង់ស្ពឺកាលពីថ្ងៃទី ១២ ខែឧសភានេះ ក្រោយពីបានវាយប្រពន្ធមានផ្ទៃពោះ ៨ ខែស្លាប់ ហើយបានរត់គេចខ្លួននៅក្នុងស្រុកព្រៃនប់ ខេត្តព្រះសីហនុកាលពីព្រឹកថ្ងៃទី ១០ ខែឧសភា ឆ្នាំ ២០២២។ នេះបើយោងតាមអង្គភាពការពារកុមារ (CPU) នៅថ្ងៃសុក្រទី ១៣ ខែឧសភានេះ។
ប្រភពដដែលបានឱ្យដឹងថា នៅពេលមានការឈ្លោះប្រកែកគ្នានោះ ជនសង្ស័យជាប្តីបានយកវត្ថុរឹងទៅវាយទៅលើប្រពន្ធ ដែលបណ្តាលឱ្យមានរបួសធ្ងន់ធ្ងរ។ បុរសជាប្តីបានរត់គេចខ្លួនពីកន្លែងកើតហេតុ។ ស្ត្រីរងគ្រោះជាប្រពន្ធមានអាយុ ៣៦ ឆ្នាំ ហើយមានផ្ទៃពោះ ៨ ខែ។ ទាំងម្តាយ និងកូនក្នុងពោះបានបាត់បង់ជីវិតនៅមន្ទីរពេទ្យ ដោយសារតែរងរបួសធ្ងន់ពេក។ នគរបាលមូលដ្ឋានបានអះអាងថា ជនសង្ស័យជាមនុស្សប្រមឹកម្នាក់។
ស្នងការដ្ឋាននគរបាលខេត្តព្រះសីហនុបានសហការជាមួយស្នងការដ្ឋាននគរបាលខេត្តកំពង់ស្ពឺ និងនាយកដ្ឋាននគរបាលព្រហ្មទណ្ឌកម្រិតធ្ងន់ ដើម្បីធ្វើការស្វែងរកឃាត់ខ្លួនជនសង្ស័យ។
នៅថ្ងៃទី ១២ ខែឧសភា នៅវេលាម៉ោង ៥ និង ៣០ នាទីល្ងាច ជនសង្ស័យមានឈ្មោះ យ៉ែម ចន្ថា អាយុ ៤៣ ឆ្នាំ ត្រូវបានកម្លាំងសមត្ថកិច្ចឃាត់ខ្លួននៅក្នុងខេត្តកំពង់ស្ពឺ ហើយបានបញ្ជូនទៅកាន់ស្នងការដ្ឋាននគរបាលខេត្តព្រះសីហនុដើម្បីចាត់ការតាមនីតិវិធីច្បាប់៕
វីដេអូ៖
