មន្ត្រីជាន់ខ្ពស់នៃក្រសួងកសិកម្ម រុក្ខាប្រមាញ់ និងនេសាទ បានស្នើឱ្យមន្ត្រីជំនាញផ្នែកវិភាគគុណភាពបន្លែ និងផ្លែឈើ ក្នុងខេត្តចំនួន ២៤ ត្រូវយកចិត្តទុកដាក់លើការធ្វើតេស្តរកសំណល់ថ្នាំកសិកម្មនៅលើបន្លែ ផ្លែឈើទាក់ទងនឹងការវិភាគគុណភាពបន្លែ-ផ្លែឈើ និងត្រូវវាយតម្លៃប្រកបដោយវិជ្ជាជីវៈ។
ការស្នើនេះ ត្រូវបានធ្វើឡើងក្នុងពិធីបិទវគ្គបណ្តុះបណ្តាលស្តីពី «ការប្រើប្រាស់សម្ភារពិសោធន៍ (Testing kits) និងការវិភាកគុណភាពបន្លែ និងផ្លែឈើ» នាថ្ងៃទី១២ ខែឧសភា នៅមជ្ឈមណ្ឌលប្រមូលផ្តុំ ត្រួតពិនិត្យគុណភាព និង ចែកចាយបន្លែសុវត្ថិភាព នៃមន្ទីរកសិកម្ម រុក្ខាប្រមាញ់ និងនេសាទខេត្តកណ្តាល។
លោក មាស ពិសិដ្ឋ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកកម្មវិធីASPIRE បានថ្លែងថា ការធ្វើតេស្តរកសំណល់ថ្នាំកសិកម្ម នៅលើបន្លែ ផ្លែឈើ និងការវិភាគគុណភាពបន្លែ និងផ្លែឈើ គឺពិតជាមានសារៈសំខាន់ និងទទួលបានការចាប់អារម្មណ៍ពីសំណាក់ ប្រជាពលរដ្ឋ និងថ្នាក់ដឹកនាំ ហើយទាំងអស់គ្នាត្រូវធ្វើប្រកបដោយវិជ្ជាជីវៈ និងប្រកបទៅដោយកិត្តិយស។
លោក មាស ពិសិដ្ឋ បានបន្ថែមថា ៖ «នៅពេលយើងទាំងអស់គ្នា បរិភោគនូវចំណីអាហារមិនល្អ បរិភោគចំណីអាហារដែលគ្មានអាហារូបត្ថម្ភ ធ្វើឱ្យប៉ះពាល់នូវសុខភាពរបស់យើងទាំងអស់គ្នា ដូចជាស្គមស្គាំង មិនលូតលាស់ ប្រាជ្ញាស្មារតីមិនល្អ ធ្វើឱ្យយើងមិនអាចកសាងជីវភាពគ្រួសារបានល្អ។ នៅពេលដែលយើងចាស់ទៅ ប្រឈមនឹងជំងឺផ្សេងៗជាច្រើន»។
លោកបានបន្តថា នៅពេលដែលគ្រប់គ្នាបរិភោគចំណីអាហារដែលមានអាហារូបត្ថម្ភល្អ ធ្វើឱ្យមានសុខភាពល្អ ប្រាជ្ញាស្មារតីពូកែ និងជួយឱ្យប្រទេសជាតិមានធនធានល្អជាច្រើនក្នុងការអភិវឌ្ឍប្រទេសផងដែរ។
ចំណែក លោក ប៊ុនទួន ស៊ីម៉ូណា ប្រធានមន្ទីរកសិកម្ម រុក្ខាប្រមាញ់ និងនេសាទ និងជាប្រធានអនុកម្មវិធីASPIREប្រចាំខេត្តកណ្ដាល បានឱ្យដឹងដែរថា វគ្គបណ្ដុះបណ្ដាលនេះមានគោលបំណង គាំទ្រខ្សែច្រវ៉ាក់ផលិតកម្មបន្លែសុវត្ថិភាព បង្កើននូវជំនឿទុកចិត្ត ពីផលិតករ ក្រុមហ៊ុនប្រមូលទិញ និងធានាសុវត្ថិភាពជូនអតិថិជន និងអ្នកបរិភោគផងដែរ៕