.jpg)
ភ្នំពេញៈ ក្រុមមេដឹកនាំបណ្តាប្រទេសអាស៊ាន និងប្រធានាធិបតីសហរដ្ឋអាមេរិក លោក Joe Biden បានពិភាក្សាគ្នាអំពីការធានានូវសន្តិសុខ វិបុលភាព និងការគោរពសិទ្ធិមនុស្សសម្រាប់ប្រយោជន៍ដល់ប្រជាជន ១ ពាន់លាននាក់នៅក្នុងកិច្ចប្រជុំកំពូលពិសេសអាស៊ាន-អាមេរិក ដែលកម្ពុជា និងអាមេរិកធ្វើជាសហប្រធាន។
កិច្ចប្រជុំកំពូលពិសេសអាស៊ាន-អាមេរិកបានចាប់ផ្តើមនាថ្ងៃទី ១២ ខែឧសភា ហើយនឹងបញ្ចប់នៅថ្ងៃទី ១៣ ខែឧសភា នៅរដ្ឋធានីវ៉ាស៊ីនតោន សហរដ្ឋអាមេរិក ដោយលោកនាយករដ្ឋមន្ត្រី ហ៊ុន សែន ក្នុងនាមជាប្រធានកិច្ចប្រជុំអាស៊ានប្តូរវេនឆ្នាំនេះ និងលោក ចូ បៃឌិន ធ្វើជាសហប្រធាននៃកិច្ចប្រជុំកំពូលពិសេសអាស៊ាន-អាមេរិក នេះ។
លោក ចូ បៃឌិន បានសរសេរនៅលើ Twitter នាព្រឹកថ្ងៃទី ១៣ ខែឧសភា ថា៖ «ល្ងាចនេះ ខ្ញុំបានស្វាគមន៍មេដឹកនាំអាស៊ានមកកាន់សេតវិមានជាលើកដំបូងក្នុងប្រវត្តិសាស្ត្រ ហើយខ្ញុំបានបញ្ជាក់ជាថ្មីនូវការប្តេជ្ញាចិត្តរបស់សហរដ្ឋអាមេរិកចំពោះអាស៊ីអាគ្នេយ៍។ យើងបានពិភាក្សាអំពីសារៈសំខាន់នៃការធ្វើការរួមគ្នាដើម្បីធានាសន្តិសុខ វិបុលភាព និងការគោរពសិទ្ធិមនុស្សសម្រាប់ប្រជាជន ១ ពាន់លាននាក់របស់យើង»។
ដោយឡែក លោក Antony Blinken រដ្ឋមន្ត្រីការបរទេសសហរដ្ឋអាមេរិកបានសរសេរនៅលើ Twitter នាព្រឹកថ្ងៃទី ១៣ ខែឧសភា ថា អាស៊ីអាគ្នេយ៍គឺជាតំបន់ដែលមានការរីកលូតលាស់លឿន និងប្រកបដោយថាមពល។
តំបន់នេះទទួលបានជោគជ័យ ដោយសារបណ្តាប្រទេសក្នុងតំបន់នេះធ្វើការរួមគ្នា។
លោកថ្លែងថា៖ «ខណៈដែលយើងប្រារព្ធខួប ៤៥ ឆ្នាំនៃភាពជាដៃគូ សហរដ្ឋអាមេរិកនឹងបន្តធ្វើជាដៃគូដ៏រឹងមាំ ដែលមានទំនុកចិត្ត និងសកម្មក្នុងការគាំទ្រចក្ខុវិស័យរបស់អាស៊ានសម្រាប់អនាគត»៕
