.jpg)
លោក Jacques Pellet ឯកអគ្គរដ្ឋទូតបារាំងប្រចាំកម្ពុជា និងលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន។
ភ្នំពេញៈ ស្ថានទូតបារាំងប្រចាំកម្ពុជាប្រកាសថា នឹងជួយក្រសួងព័ត៌មានលើវិស័យព័ត៌មាន និងផ្សព្វផ្សាយ នៅពេលមានតម្រូវការស្នើឡើង ខណៈក្រសួងព័ត៌មានប្តេជ្ញាធ្វើកិច្ចសហការឱ្យបានល្អថែមទៀតជាមួយស្ថានទូតបារាំងលើវិស័យនេះ។
ការប្រកាសនេះធ្វើឡើងក្នុងជំនួបរវាង លោក Jacques Pellet ឯកអគ្គរដ្ឋទូតបារាំងប្រចាំកម្ពុជា និងលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន នាថ្ងៃទី១៣ ខែឧសភា នៅទីស្តីការក្រសួងព័ត៌មាន។
ក្រសួងព័ត៌មានបញ្ជាក់ថា៖ «ឯកឧត្តម Jacques Pellet ឯកអគ្គរដ្ឋទូតសាធារណរដ្ឋបារាំងប្រចាំព្រះរាជាណាចក្រកម្ពុជាបានបញ្ជាក់ពីជំហរក្នុងការបន្តសហការការងារជាមួយក្រសួងព័ត៌មានកម្ពុជាជាពិសេសលើ វិស័យព័ត៌មាន និងផ្សព្វផ្សាយ សម្រាប់ពេលបច្ចុប្បន្ន និងបន្ដទៅពេលខាងមុខទៀត»។
ប្រភពដដែលបន្តថា លោក Jacques Pellet បានជំរុញការបន្តពង្រឹង និងពង្រីកកិច្ចសហប្រតិបត្តិការរវាងក្រសួងព័ត៌មាន និងស្ថានទូតបារាំងប្រចាំកម្ពុជាលើវិស័យព័ត៌មាន និងផ្សព្វផ្សាយ។
ក្រសួងព័ត៌មានដកស្រង់សំដីលោក Jacques Pellet ថា៖ «ប្រទេសបារាំងនឹងជួយ ប្រសិនមានតម្រូវការលើកិច្ចការអ្វីដែលបានស្នើឡើង»។
ក្រសួងព័ត៌មានបញ្ជាក់នាថ្ងៃទី១៣ ខែឧសភាថា៖ «ឯកឧត្តមរដ្ឋមន្ត្រីបានបញ្ជាក់ពីការបន្តធ្វើកិច្ចសហការល្អបន្ថែមទៀតជាមួយ ឯកអគ្គរដ្ឋទូតបារាំងប្រចាំកម្ពុជា លើកិច្ចការងារទាក់ទងនឹងវិស័យព័ត៌មាន និងផ្សព្វផ្សាយ»៕
