ភ្នំពេញៈ មេដឹកនាំអាស៊ាន និងមេដឹកនាំអាមេរិកអំពាវនាវដល់ប្រទេសដែលជាភាគីនៃជម្លោះសមុទ្រចិនខាងត្បូងបន្តដោះស្រាយជម្លោះដោយសន្តិវិធី ស្របតាមច្បាប់អន្តរជាតិ និងអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS)។
នៅក្នុងកិច្ចប្រជុំកំពូលពិសេស អាស៊ាន-អាមេរិក កាលពីថ្ងៃទី១២-១៣ ខែឧសភា នៅរដ្ឋធានីវ៉ាស៊ីនតោន មេដឹកនាំអាស៊ាន-អាមេរិក បានកត់សម្គាល់អត្ថប្រយោជន៍នៃការមានសមុទ្រចិនខាងត្បូងថា ជាសមុទ្រនៃសន្តិភាព ស្ថិរភាព និង វិបុលភាព ដោយបានជំរុញឱ្យមានវិធានការជាក់ស្តែងដែលអាចកាត់បន្ថយភាពតានតឹង និងហានិភ័យនៃគ្រោះថ្នាក់ ការយល់ច្រឡំ និងការវិនិច្ឆ័យខុស។
អាស៊ាន និង អាមេរិក បានចេញសេចក្តីថ្លែងការណ៍រួមគ្នា នៅក្នុងកិច្ចប្រជុំកំពូលពិសេសអាស៊ាន-អាមេរិក ដែលលោកនាយករដ្ឋមន្ត្រី ហ៊ុន សែន និងលោក ចូ បៃឌិនប្រធានាធិបតីសហរដ្ឋអាមេរិកធ្វើជាសហប្រធាន។
សេចក្តីថ្លែងការណ៍រួមនេះបញ្ជាក់ថា មេដឹកនាំអាស៊ាន-អាមេរិក បានជំរុញឱ្យមានការអនុវត្តការកសាងទំនុកចិត្ត និងវិធានការបង្ការ ដើម្បីបង្កើនភាពជឿជាក់ និងទំនុកចិត្តក្នុងចំណោមភាគីផ្សេងៗទៀតជាដើម។
មេដឹកនាំទាំងនេះបានបញ្ជាក់ក្នុងសេចក្តីថ្លែងការណ៍រួមនេះថា៖ «យើងបានបញ្ជាក់ជាថ្មីថែមទៀតនូវតម្រូវការក្នុងការបន្តការដោះស្រាយជម្លោះប្រកបដោយសន្តិវិធីស្របតាមគោលការណ៍ទទួលស្គាល់ជាសកលនៃច្បាប់អន្តរជាតិ រួមទាំង UNCLOS ឆ្នាំ ១៩៨២ ផងដែរ។ យើងបានគូសបញ្ជាក់អំពីសារៈសំខាន់នៃការអនុវត្តពេញលេញ និងប្រកបដោយប្រសិទ្ធភាពនៃសេចក្តីប្រកាសឆ្នាំ ២០០២ ស្តីពីការប្រតិបត្តិនៃភាគីនានានៅសមុទ្រចិនខាងត្បូង (DOC) ទាំងស្រុង។
មេដឹកនាំអាស៊ាន និងអាមេរិក បានអំពាវនាវឱ្យមានការរក្សានិងលើកកម្ពស់បរិយាកាសដែលអំណោយផលដល់ការចរចាអំពីក្រមប្រតិបត្តិនៅសមុទ្រចិនខាងត្បូង (COC) និងបានឯកភាពស្វាគមន៍ចំពោះវឌ្ឍនភាពបន្ថែមទៀតឆ្ពោះទៅរកការបញ្ចប់ឱ្យបានឆាប់នៃ COC ប្រកបដោយប្រសិទ្ធភាព និងខ្លឹមសារ ស្របតាមច្បាប់អន្តរជាតិ រួមទាំង UNCLOS ឆ្នាំ១៩៨២ ផងដែរ៕