ភ្នំពេញៈ ក្រសួងសុខាភិបាល ជំរុញប្រជាពលរដ្ឋបន្តចាក់វ៉ាក់សាំងកូវីដ ១៩ ដូសជំរុញ និងដូសបន្តបន្ទាប់ទៀត ដើម្បីរក្សាភាពស៊ាំខ្លាំងក្នុងការប្រយុទ្ធប្រឆាំងនឹងកូវីដ១៩ ទោះបីស្ថានភាពជំងឺកូវីដ១៩ នៅកម្ពុជាកាន់តែល្អប្រសើរឡើង ប៉ុន្តែជំងឺនេះមិនទាន់បានផុតរលត់បាត់ទៅវិញនោះទេ។
លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានថ្លែងក្នុងសេចក្តីប្រកាសព័ត៌មាននាថ្ងៃទី១៤ ខែឧសភា ថា វាជាការគួរឱ្យគោរពស្រឡាញ់ណាស់នៅពេលដែលឃើញមនុស្សមានសុខភាពកាន់តែល្អ និងកាន់តែសប្បាយរីករាយជាងពេលមុនៗ ទោះបីជាមានភាពមិនច្បាស់លាស់នៃបញ្ហាប្រឈមផ្នែកសុខភាពសាធារណៈក៏ដោយ។
លោកស្រីថ្លែងថា ស្ថានភាពជំងឺកូវីដ១៩ នៅកម្ពុជាកាន់តែល្អប្រសើរឡើង ប៉ុន្តែមិនមែនមានន័យថា កូវីដ១៩ បានផុតរលត់បាត់ទៅវិញនោះទេ។ ប្រជាពលរដ្ឋកម្ពុជាអាចឆ្លងឡើងវិញបានគ្រប់ពេលវេលា ប្រសិនបើពួកគេមិនបន្តអាកប្បកិរិយាការពារត្រឹមត្រូវ។
អ្នកនាំពាក្យរូបនេះបន្តថា៖ «វ៉ាក់សាំងកូវីដ ១៩ គឺជាឧបករណ៍ដ៏មានសារ:សំខាន់មួយក្នុងការជួយសង្គ្រោះអាយុជីវិតមនុស្ស ដូច្នេះហើយសូមលោកអ្នកបន្តទទួលយកវ៉ាក់សាំងដូសជំរុញរបស់លោកអ្នក (ដូសទី៣ ដូសទី៤ និងដូសបន្តបន្ទាប់ទៀត ប្រសិនបើដល់វេនរបស់លោកអ្នក) គឺជាជម្រើសដ៏ល្អប្រសើរក្នុងការបង្ការ និងរក្សាភាពស៊ាំខ្លាំងរបស់លោកអ្នក ដើម្បីប្រយុទ្ធប្រឆាំងនឹងកូវីដ១៩ រួមជាមួយនឹងវិធានការផ្សេងៗទៀត និងស្ថិតនៅក្នុងភាពប្រុងប្រយ័ត្នដោយមិនភ្លេចខ្លួន នៅក្នុងពេលកំពុងអនុវត្តដំណើរការ បើកឡើងវិញនូវសង្គម និងសេដ្ឋកិច្ចប្រកបដោយនិរន្តរភាពក្នុងជីវិតធម្មតាថ្មីរបស់យើងទាំងអស់គ្នា»៕