.jpg)
ជនសង្ស័យ ពេលសមត្ថកិច្ចចាប់ខ្លួន កាលពីថ្ងៃទី ១២ ឧសភា ។ រូបថត ប៉ូលិស
ព្រះសីហនុៈបុរសឈ្មោះ យ៉ែម ចិន្តា ដែលបានវ៉ៃប្រពន្ធមានផ្ទៃពោះ ៧ ខែ នៅភូមិជើងគោ ឃុំជើងគោ ស្រុកព្រៃនប់ បណ្ដាលឱ្យស្លាប់នៅមន្ទីរពេទ្យ ត្រូវបានតុលាការខេត្តព្រះសីហនុឃុំខ្លួនក្នុងពន្ធនាគារខេត្តពីថ្ងៃទី ១៤ ឧសភា បន្ទាប់ពីសមត្ថកិច្ចតាមចាប់ខ្លួននៅក្រុងច្បារមន ខេត្តកំពង់ស្ពឺក្រោយបង្កហេតុបាន ២ ថ្ងៃ។
លោក លី ចាន់ដារ៉ា អ្នកនាំពាក្យតុលាការខេត្តព្រះសីហនុបានឱ្យដឹងនៅថ្ងៃទី ១៥ ឧសភា ថា ជនឈ្មោះ យ៉ែម ចិន្តា អាយុ៤៣ឆ្នាំ ត្រូវបានចៅក្រមស៊ើបសួរសម្រេចឃុំខ្លួននៅពន្ធនាគារខេត្តព្រះសីហនុកាលពីថ្ងៃទី ១៤ ឧសភា ឆ្នាំ ២០២២។ ជនត្រូវចោទជាប់ពាក់ព័ន្ធបទល្មើសសម្លាប់ប្រពន្ធរបស់គាត់នៅភូមិ ជើងគោ ឃុំ ជើងគោ ស្រុកព្រៃ-នប់ កាលពីយប់ថ្ងៃទី ១០ ឧសភា ឆ្នាំ ២០២២។
លោកថ្លែងថា៖ «ជនម្នាក់នេះត្រូវដាក់ឱ្យស្ថិតនៅក្រោមការពិនិត្យពីបទឃាតកម្មដែលមានស្ថានទម្ងន់ទោសទាក់ទងនឹងជនរងគ្រោះ។ បទល្មើសដែលមានចែងនិងផ្តន្ទាទោសតាមបញ្ញាត្តិមាត្រា ២០២ នៃក្រមព្រហ្មទណ្ឌ»។
យោងមាត្រា ២០២ នៃក្រមព្រហ្មទណ្ឌ ប្រសិនបើតុលាការរកឃើញថា ជនត្រូវចោទពិតជាបានវាយសម្លាប់ជនរងគ្រោះមែននោះនឹងត្រូវជាប់ពន្ធនាគារពី ១៥ ដល់ ៣០ ឆ្នាំ។
លោក អ៊ួង វុទ្ធី អធិការនគរបាល ស្រុកព្រៃនប់បានឱ្យដឹងនៅថ្ងៃទី ១៥ ឧសភាថា ជនត្រូវចោទរូបនេះ មានរបរ ជាកម្មករដុតធ្យូង និងរស់នៅភូមិ-ឃុំកើតហេតុខាងលើ បានប្រើហិង្សាវាយដំប្រពន្ធរបស់គាត់ឈ្មោះ វុន វ៉ាន់ អាយុ ៣៦ ឆ្នាំ យ៉ាងធ្ងន់ធ្ងរ បណ្តាលឱ្យរលូតកូនក្នុងពោះរបួសធ្ងន់កាលពីថ្ងៃទី ១០ ឧសភា ហើយបានស្លាប់ក្រោយពេលបញ្ជូនដល់មន្ទីរពេទ្យបង្អែកស្រុកព្រៃនប់បាន ១ ថ្ងៃ ។
លោកបន្តថា ក្រោយបង្កហេតុភ្លាមៗ ជនត្រូវចោទបានរត់គេចខ្លួន ហើយលោក ឧត្តមសេនីយ៍ទោ ជួន ណារិន្ទ ស្នងការនគរបាលខេត្ត ព្រះសីហនុ បានបើកការស្រាវជ្រាវដោយសុំអន្តរាគមន៍ពីកម្លាំងនាយកដ្ឋានព្រហ្មទណ្ឌ នៃអគ្គស្នងការនគរបាលជាតិ និងសហការជាមួយនគរបាលខេត្តកំពង់ស្ពឺ ធ្វើការស្រាវជ្រាវពីថ្ងៃទី ១១ ឧសភា ដល់វេលាម៉ោងជាង ៥ ល្ងាចថ្ងៃទី ១២ ខែឧសភា ឆ្នាំ ២០២២ ទើបសមត្ថកិច្ចចម្រុះឃាត់ខ្លួនជនសង្ស័យបាននៅចំណុច ភ្លើងស្តុបហ្គោលឌិនហាវ ក្នុងភូមិពាណិជ្ជកម្ម សង្កាត់រកាធំ ក្រុងច្បារមន ខេត្តកំពង់ស្ពឺ។
លោកបញ្ជាក់ថា៖« ក្រោយឃាត់ខ្លួន និងបញ្ជូនមកអធិការដ្ឋានស្រុកព្រៃនប់ ជនសង្ស័យឆ្លើយប្រាប់សមត្ថកិច្ចយើងថា គាត់សម្លាប់ប្រពន្ធគាត់ដោយសារស្រវឹងស្រា ភ្លេចភ្លាំងស្មារតី និងមកពីរឿងប្រចណ្ឌប្រពន្ធផង»។
លោក ហុក ប្រឹម នាយនគរបាលប៉ុស្តិ៍ឃុំជើងគោ ស្រុកព្រៃនប់ ប្រាប់នៅថ្ងៃទី ១៥ ឧសភា ថា គ្រួសារនេះមានកូនចំនួន ៦ នាក់ (ស្រី ២ នាក់) ហើយបើតាមគ្រូពេទ្យពិនិត្យផ្ទៃពោះស្ត្រីរងគ្រោះ កាលពីយប់ថ្ងៃកើតហេតុគឺបញ្ជាក់ថានាងកំពុងមានផ្ទៃពោះកូននៅក្នុងផ្ទៃ ៧ ខែ៕
