កណ្ដាលៈក្មេងស្រីជាសិស្សសាលា ២ នាក់ក្នុងចំណោម ៤ នាក់ដែលនាំគ្នាទៅឈរលើការុងខ្សាច់លេងនៅមាត់ច្រាំងទន្លេ ហើយបានធ្លាក់ចូលក្នុងទឹកបណ្ដាលឱ្យស្លាប់ នៅភូមិ-ឃុំ ព្រែកដាច់ ស្រុក លើកដែក ខេត្តកណ្ដាល ត្រូវបានរកឃើញសាកសពហើយ កាលពីយប់ថ្ងៃទី ១៤ ឧសភា បន្ទាប់ពីបាត់ខ្លួន ១ ថ្ងៃ ។
លោក ភន ភឿន នាយនគរបាលប៉ុស្តិ៍ឃុំព្រែកដាច់ ប្រាប់ភ្នំពេញប៉ុស្តិ៍នៅថ្ងៃទី១៥ឧសភាថា ក្មេងស្រីរងគ្រោះ ឈ្មោះ វណ្ណៈ ស៊ីមាន អាយុ១២ឆ្នាំ និងឈ្មោះ ប៊ុនធឿន ស្រីល័ក្ខ អាយុ ១២ ឆ្នាំ។ ពួកគេជាសិស្សសា លា និងរស់នៅភូមិ
តាហ៊ីង ឃុំព្រែកដាច់ ស្រុកលើកដែក ខេត្តកណ្តាល។ សពក្មេងរងគ្រោះទាំង ២ នាក់ ត្រូវបានរកឃើញនៅវេលាម៉ោង ៩ និង ១៤ នាទីយប់ ថ្ងៃទី ១៤ ឧសភា។
លោកប្រាប់ថា៖ «សាកសពរបស់ពួកគេបានផុសឡើងអណ្តែតទឹកនៅចម្ងាយពីកន្លែងបាត់ខ្លួនប្រហែល ២០ ម៉ែត្រ។កាលពីល្ងាចបាត់ខ្លួនយើងជានគរបាលប៉ុស្តិ៍រួមសហការជាមួយឪពុកម្តាយក្មេងរងគ្រោះ និងអ្នកភូមិនាំគ្នារកសពដែរ តែរកមិនឃើញ។ លុះស្អែកឡើងពេលយប់ទើបយើងរកឃើញ»។
លោករៀបរាប់ថា មុនកើតហេតុ កាលពីវេលាម៉ោងជាង ៣ រសៀលថ្ងៃទី ១៣ ឧសភា ដោយសារតែគ្រូមិនបានបង្រៀន ក្មេងស្រីរងគ្រោះទាំង ២ នាក់ និងក្មេងស្រីជាមិត្តរួមថ្នាក់ ២ នាក់ទៀត បាននាំគ្នាទៅឈរលេងនៅលើការុងខ្សាច់ទប់ច្រាំងទន្លេ។ នៅពេលនោះដែរ អ្នកភូមិដែលកំពុងចូកដីខ្សាច់ច្រកក្នុងការុងដែលនៅចម្ងាយប្រហែលពីគ្នា ៣០ ម៉ែត្រពីកន្លែងកើតហេតុបានស្រែកដេញឱ្យក្មេងទាំង ៤ នាក់ទៅផ្ទះដែរ តែពួកគេមិនព្រមទៅ។ លុះបានមួយសម្ទះក្រោយមក អ្នកភូមិបានឮសំឡេងស្រែកឱ្យជួយ ដែលភ្លាមៗនោះ ក្រុមអ្នកធ្វើការចូកដីខ្សាច់បានរត់ទៅជួយស្រង់ក្មេងពីទឹកបាន ២ នាក់ ខណៈក្មេងស្រី ២ នាក់ទៀតបានលិចទឹកបាត់។
លោកបន្តថា បន្ទាប់ពីដឹងថា នៅមានក្មេង ២ នាក់ទៀតលង់ទឹករកមិនឃើញ ក្រុមអ្នកភូមិរួមនឹងសមត្ថកិច្ចរបស់លោកនាំគ្នាចុះមុជទឹករាវរកជនរងគ្រោះក៏នៅតែរកមិនឃើញដដែល។ លុះស្អែកឡើងថ្ងៃទី ១៤ ឧសភា ក៏នាំគ្នាមុជក្នុងទឹករាវរកលើកទី ២ ក៏នៅតែរកមិនឃើញ រហូតដល់យប់វេលាម៉ោង ៩ និង ១៤ នាទី ក៏ឃើញសពក្មេងរងគ្រោះទាំង ២ នាក់ ផុសដំណាលគ្នាពីក្នុងទឹក ទើបនាំគ្នាស្រង់មកលើគោក ហើយឪពុកម្តាយក្មេងបានយកសពទៅផ្ទះរៀងៗខ្លួន។
លោក ខ្មៅ រ៉ន មេឃុំព្រែកដាច់ បានឱ្យដឹងនៅថ្ងៃទី ១៥ ឧសភា ថា គ្រួសារឪពុកម្តាយក្មេងរងគ្រោះទាំង ២ នាក់ជាគ្រួសារក្រីក្រ ហើយអាជ្ញាធរមូលដ្ឋាននិងអាជ្ញាធរស្រុកលើកដែកបានជួយជាប្រាក់កាក់ និងជាអង្ករមួយចំនួនដល់គ្រួសារសពក្មេងទាំង ២ នាក់ផងដែរ។
ក្មេងរងគ្រោះឈ្មោះ ប៊ុនធឿន ស្រីល័ក្ខ និងឈ្មោះ វណ្ណៈ ស៊ីមាន រៀនថ្នាក់ទី ៧ នៅសាលាអនុវិទ្យាល័យព្រែកតូច ក្នុងភូមិព្រែកតូច ឃុំព្រែកដាច់ ស្រុកលើកដែក ខេត្តកណ្តាល។
លោកថា៖ «ដោយសារមានជំនឿពីបុរាណរៀងមកឪពុកម្តាយក្មេងរងគ្រោះទាំង ២ នាក់បានធ្វើពិធីសុំម្ចាស់កំពង់ទឹកឱ្យពួកគាត់ឆាប់រកឃើញកូនៗរបស់ពួកគាត់ ហើយសពនោះក៏អណ្តែតឡើងក្រោយមានការបន់ស្រន់។ តែនេះគ្រាន់ជាជំនឿប៉ុណ្ណោះ»៕
វីដេអូ៖