កំពង់ធំៈ រដ្ឋមន្ត្រីក្រសួងកសិកម្ម ណែនាំឱ្យនាយកដ្ឋានពូជដំណាំ និងមន្ទីរកសិកម្ម រុក្ខាប្រមាញ់ និងនេសាទរាជធានី-ខេត្ត និងដៃគូអភិវឌ្ឍន៍ វិស័យឯកជន សហគមន៍កសិកម្ម និងស្ថាប័នពាក់ព័ន្ធ បន្តគាំទ្រនិងជួយសហការអនុវត្តប្រព័ន្ធធានាគុណភាពពូជដំណាំ (បគព) ឱ្យទទួលបានជោគជ័យ សំដៅរួមគ្នាលើកស្ទួយវិស័យពូជដំណាំនៅកម្ពុជាឱ្យកាន់តែរីកចម្រើនបន្ថែមទៀត។
លោក វេង សាខុន បានលើកឡើងបែបនេះនៅពេលសម្ពោធដាក់ឱ្យប្រើប្រាស់ប្រព័ន្ធធានាគុណភាពពូជដំណាំ ប.គ.ព. (Quality Declared Seed-QDS) សម្រាប់ផលិតកម្ម និងអាជីវកម្មគ្រាប់ពូជស្រូវ កាលពីថ្ងៃទី ១១ ខែឧសភា នៅខេត្តកំពង់ធំ។ នាឱកាសនោះ លោក វេង សាខុន ក៏បានណែនាំឱ្យអគ្គនាយកដ្ឋានកសិកម្ម យកចិត្តទុកដាក់លើចំណុចសំខាន់ៗ ដូចជា ត្រូវជំរុញការផ្សព្វផ្សាយច្បាប់ស្តីពីការគ្រប់គ្រងពូជដំណាំ និងសិទ្ធិអ្នកបង្កាត់ពូជដំណាំ និងគោលនយោបាយពូជដំណាំនៅកម្ពុជាឱ្យបានទូលំទូលាយ ថែមទៀតគឺជា ទិសដៅអនុវត្តបន្ត។
លោកថ្លែងថា៖ «ត្រូវជំរុញឱ្យអ្នកផលិតពូជ និងអ្នកធ្វើអាជីវកម្មពូជដំណាំនៅកម្ពុជា ចុះបញ្ជីប្រភេទពូជដំណាំដើម្បីធានាបាននូវគ្រាប់ពូជដែលមានគុណភាពល្អ និងត្រូវពង្រឹងសមត្ថភាពមន្ទីរពិសោធន៍ជាតិកសិកម្មសម្រាប់វិភាគគុណភាពពូជដំណាំ ដើម្បីគាំទ្រដល់ការត្រួតពិនិត្យគុណភាពពូជដំណាំ ដែលស្ថិតនៅក្រោមប្រព័ន្ធផ្តល់វិញ្ញាបនបត្រ និងសម្រាប់តាមដានគុណភាពពូជដំណាំដែលចរាចរនៅលើទីផ្សារ» ។
ជាមួយគ្នានោះលោករដ្ឋមន្ត្រីកសិកម្ម ក៏បានលើកទឹកចិត្ត និងជំរុញផលិតកម្មគ្រាប់ពូជ ត្រូវផ្សារភ្ជាប់រវាងអ្នកផលិត ជាមួយសហគមន៍កសិករ ឬអ្នកផលិតជាមួយក្រុមហ៊ុន តាមរយៈការអនុវត្តផលិតកម្មគ្រាប់ពូជតាមកិច្ចសន្យា និងត្រូវចងក្រងបោះពុម្ពឯកសារបច្ចេកទេស និងគោលការណ៍ណែនាំផ្សេងៗទាក់ទងនឹង ប.គ.ព. ហើយផ្សាយឱ្យបានទូលំទូលាយ។
លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខប្រមាញ់ និងនេសាទខេត្តកំពង់ធំ ឱ្យដឹងថា ប.គ.ព.ត្រូវបានរៀបចំដោយផ្អែកលើសៀវភៅគោលការណ៍ណែនាំរបស់អង្គការ FAO នៅឆ្នាំ ២០០៦។ ចាប់តាំងពីឆ្នាំ ២០១៩ អគ្គនាយកដ្ឋានកសិកម្ម បានសហការជាមួយគម្រោងកម្មវិធីស្តីពី “ខ្សែចង្វាក់តម្លៃកសិកម្មកម្ពុជា-អូស្រ្តាលី ហៅកាត់ថា CAVAC" និង JICA ដើម្បីរៀបចំសិក្ខាសាលាផ្សព្វផ្សាយពី ប.គ.ព. ដល់អ្នកពាក់ព័ន្ធជាបន្តបន្ទាប់ សរុបចំនួន ៨៥ នាក់ ដែលអញ្ជើញមកពីមន្ទីរកសិកម្ម រុក្ខាប្រមាញ់ និងនេសាទខេត្ត និងកសិករផលិតគ្រាប់ពូជស្រូវនៅខេត្តចំនួន ៨ មានខេត្តតាកែវ បន្ទាយមានជ័យ សៀមរាប និងពោធិ៍សាត់ បាត់ដំបង កំពង់ឆ្នាំង ព្រៃវែង និងខេត្តកំពង់ធំ។
លោកប្រធានមន្ទីរបញ្ជាក់ថា អគ្គនាយកដ្ឋានកសិកម្ម បានបណ្តុះបណ្តាលមន្ត្រីបង្គោលនៅថ្នាក់ជាតិ និងថ្នាក់ខេត្ត ដើម្បីសាកល្បងអនុវត្ត ប្រព័ន្ធ ប.គ.ព. លើផលិតកម្មគ្រាប់ពូជស្រូវ ក្នុងរដូវវស្សាឆ្នាំ ២០២០ និងឆ្នាំ ២០២១ ជាមួយសហគមន៍កសិកម្មចំនួន ១០។ ក្នុងឆ្នាំ ២០២២ បានរៀបចំចងក្រង និងបោះពុម្ពសម្រាប់ចែកជូនសហគមន៍អនុវត្តផងដែរ។
លោកថ្លែងថា៖ «ឯកសារសំខាន់ៗមួយចំនួនដែលបានបោះពុម្ព មានដូចជា គោលការណ៍ណែនាំស្តីពី ប.គ.ព.។ ឯកសារ ប.គ.ព. សម្រាប់ផលិតកម្ម និងអាជីវកម្មគ្រាប់ពូជស្រូវ និងគោលការណ៍ណែនាំបច្ចេកទេសត្រួតពិនិត្យគុណភាពគ្រាប់ពូជស្រូវតាម ប.គ.ព. ផងដែរ»។
លោកស្រី Miyahary AI តំណាងអង្គការ JICA និងតំណាងស្ថានទូតអូស្រ្តាលីបានធ្វើចំណាប់អារម្មណ៍ពាក់ព័ន្ធនឹងកម្មវិធីនេះ ដោយសម្តែងក្តីសង្ឃឹមថា ប.គ.ព. នឹងដើរតួនាទីយ៉ាងសំខាន់ក្នុងការធានាគុណភាពគ្រប់ពូជស្រូវ ដើម្បីចូលរួមបង្កើនផលិតភាពផលិតកម្មស្រូវទាំងបរិមាណ និងគុណភាព មានការប្រកួតប្រជែង ឆ្លើយតបតាមតម្រូវការទីផ្សារ។ ជាពិសេសចូលរួមលើកកម្ពស់កម្រិតជីវភាពរបស់សមាជិកសហគមន៍តាមរយ:ការផលិត និងលក់ចែកចាយគ្រាប់ពូជស្រូវមានគុណភាពជូនកសិករនាពេលអនាគត។
លោករដ្ឋមន្ត្រី វេង សាខុន បញ្ជាក់ថា សមិទ្ធផលដែលម្រេចបានកន្លងមកនេះបានឆ្លើយតបតាមគោលនយោបាយរបស់រាជរដ្ឋាភិបាល ក្នុងក្របខ័ណ្ឌកំណែទម្រង់ស៊ីជម្រៅសម្រាប់វិស័យកសិកម្ម គឺការធ្វើទំនើបកម្មវិស័យកសិកម្ម ការបង្កើនតម្លៃបន្ថែមនិងការអភិវឌ្ឍខ្សែច្រវាក់តម្លៃកសិកម្ម ដើម្បីឆ្លើយតបនឹងតម្រូវការនៃទីផ្សារ និងការប្រកួតប្រជែងក្នុងតំបន់ និងនៅលើសកលលោក។ ជាពិសេសការធានាចីរភាពកំណើនសេដ្ឋកិច្ច-សង្គម ការកាត់បន្ថយភាពក្រីក្រ ការបង្កើតការងារ កាត់បន្ថយចំណាកស្រុក និងធានាបាននូវប្រព័ន្ធសន្តិសុខស្បៀង ចីរភាព និងបរិយាប័ន្នដោយផ្សារភ្ជាប់ទៅនឹង “គោលដៅអភិវឌ្ឍន៍ប្រកបដោយចីរភាពកម្ពុជា”នៅឆ្នាំ ២០៣០៕