ភ្នំពេញៈ គណបក្សភ្លើងទៀនបានសម្រេចអនុម័តគោលនយោបាយជាអាទិភាព ទាំង ៧ ចំណុច និងបានសម្រេចចូលរួមក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ខាងមុខនេះ។ ការម្រេចនេះធ្វើឡើងក្នុងសមាជវិសាមញ្ញគណបក្សភ្លើងទៀន ថ្ងៃទី ១៥ ខែឧសភា ភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ។
លោក ថាច់ សេដ្ឋា អនុប្រធានគណបក្សភ្លើងទៀន ថ្លែងនៅថ្ងៃទី ១៥ ខែឧសភាថា ការសម្រេចរបស់គណបក្សភ្លើងទៀនបែបនេះ ដោយគោរពតាមការចង់បានរបស់អ្នកគាំទ្រនៅមូលដ្ឋានមានការផុលផុសច្រើនចង់ឲ្យមានការផ្លាស់ប្តូរនៅមូលដ្ឋាន។ ក្នុងពិធីសាមាជដែលគ្រោងថានឹងមានអ្នកចូលរួមតែប្រមាណ ២ ០០០ នាក់ ប៉ុន្តែ ជាក់ស្តែងមានអ្នកចូលរួមមកពីមូលដ្ឋានផ្សេងៗទូទាំងប្រទេសសរុបប្រមានដល់ជាង ៥ ០០០ នាក់ ។
លោកអនុប្រធានគណបក្សភ្លើងទៀនរូបនេះបានឲ្យដឹងថា ការជួបជុំក្នុងសមាជគណបក្សភ្លើងទៀនដែលមានអ្នកចូលរួមច្រើនលើសការគ្រោងទុកនេះគឺជា សារទៅកាន់ដៃគូបដិបក្ខថា មិនអាចបំបាក់ស្មារតីប្រជាពលរដ្ឋបានទេ។ ប្រជាពលរដ្ឋខ្មែរត្រូវការផ្លាស់ប្តូរជាវិជ្ជមានតាមបែបប្រជាធិបតេយ្យ។ លោកថាតាមបទពិសោធន៍ដែលបានចុះផ្ទាល់នៅមូលដ្ឋានគឺមានបញ្ហាប្រឈមច្រើន ទាំងការរៀបចំបេក្ខជន រៀបចំភ្នាក់ងារ និងបញ្ហាផ្សេងៗទៀតជាច្រើន។
លោកថ្លែងថា៖ «រៀបបេក្ខជនក៏ពិបាករៀប ភ្នាក់ងារក៏ពិបាក មិនតែប៉ុណ្ណោះគេនៅរកមធ្យោបាយចេញដីការចាប់ខ្លួន។ គ.ជ.ប បានរំលាយគណបក្សយើងនៅ ១១ ឃុំសង្កាត់ ប៉ុន្តែទីបំផុត យើងមើលឃើញថាយើងនៅតែប្តេជ្ញាចិត្តតាំងពីលើដល់មូលដ្ឋាន យើងបានរៀបចំដោយជោគជ័យ ១៦២៣ ឃុំសង្កាត់» ។
លោក ថាច់ សេដ្ឋាបានលើកឡើងទៀតថា គណបក្សភ្លើងទៀននៅតែរក្សាបាននូវខ្សែក្រវាត់លំដាប់គណបក្សធំបំផុតទី២នៅក្នុងប្រទេសកម្ពុជា ហើយក៏រក្សាបានថាជាគណបក្សប្រឆាំងដ៏ធំផុតនៅក្នុងប្រទេសកម្ពុជា ។
អ្នកវិភាគជើងចាស់គឺ លោកឡៅ ម៉ុង ហៃ ថ្លែងនៅថ្ងៃទី ១៥ ខែឧសភាថា ជាភាពខ្លាំងដ៏អស្ចារ្យមួយនៃគណបក្សភ្លើងទៀន ដែលក្នុងរយៈពេលជាង៣ខែ អាចរៀបចំបានរចនាសម្ព័ន្ធនៅឃុំសង្កាត់រហូតជិតបានស្មើនិងគណបក្សកាន់អំណាច។ លោកថ្លែងថា៖ «ខ្ញុំឃើញថាគណបក្សភ្លើងទៀននេះបានជោគជ័យយ៉ាងចម្លែកខុសពីគណបក្សដទៃទៀត ដែលកកើតក្នុងរយៈពេលស្របាលគ្នា គឺក្នុងរយៈពេលមិនដល់៤ខែផង គណបក្សមួយដែលដេកលក់ ក្រោកឡើងស្រាប់តែខ្លាំងរឹងមាំតែម្តង ដែលគេហៅថាគណបក្សលំដាប់ជាតិ» ។
លោកបន្តថា ភាពជោគជ័យថ្មីក្នុងការងើបឡើងនៃគណបក្សភ្លើងទៀនគឺឆ្លុះបញ្ជាំងនូវការវិវឌ្ឍមួយនៅប្រទេសកម្ពុជាច្រើនបែប ព្រមទាំងឆ្លុះបញ្ជាំងនូវការគាំទ្ររបស់ប្រជាពលរដ្ឋទូទៅទូទាំងប្រទេស។ បន្ថែមលើនោះក៏ឆ្លុះបញ្ជាំងនូវទឹកចិត្ត ស្មារតីរបស់ប្រជាពលរដ្ឋខ្មែរដែលសម្តែងឲ្យឃើញនៅក្នុងការបោះឆ្នោតឆ្នាំ ២០១៣ ។
លោក សុខ គឹមសេង ប្រធានក្រុមការងារគណបក្សភ្លើងទៀនខេត្តសៀមរាបថ្លែងថា ការរៀបចំរចនាសម្ព័ន្ធឡើងដោយឆាប់រហ័សនៃគណបក្សភ្លើងទៀនមិនមែនជារឿងចៃដន្យនោះទេ គឺមានកេមរតក ២៧ឆ្នាំ ដែលស្ថាបនិកដំបូងបានបន្សល់ទុកធ្វើឲ្យមហាជនមានការជឿជាក់។ មួយវិញទៀតគឺមានសកម្មជនដែលមានជំហរស្មោះត្រង់ អង់អាចក្លាហាន។
លោក យី សីហា ប្រធាននាយកដ្ឋានកិច្ចការបោះឆ្នោត និង ជាស្ថាបនិកគណបក្សកម្ពុជានិយម ថ្លែងនៅថ្ងៃទី ១៥ ខែឧសភាថា ការលើកឡើងរបស់តំណាងគណបក្សភ្លើងទៀន ថាខ្លួនជាអ្នកខ្លាំងទី ២ និងជាគណបក្សប្រឆាំងធំជាងគេនៅកម្ពុជានោះ គឺជាសិទ្ធរបស់គាត់ក្នុងការបង្ហាញពីសក្តានុពលរបស់គណបក្សខ្លួនទៅដល់សាធារណជន ប៉ុន្តែលោកថា បក្សខ្លាំងមិនអាស្រ័យលើចំនួន នៃសមាជិកគាំទ្រ ការរៀបចំបក្សបានលឿនរហ័ស ឬជាបក្សដែលមានបណ្តាញច្រើននោះទេ។
លោកថា បក្សខ្លាំង ជាបក្សដែលមានរបៀបដឹកនាំតាមគោលការណ៍ និងជាបក្សដែលអនុវត្តតាមច្បាប់ និងគិតពីផលប្រយោជន៍ជាតិពិតប្រាកដ។ មួយវិញទៀតបក្សខ្លាំងជាបក្សដែលមានសមត្ថភាពដោះស្រាយបញ្ហាជូនប្រជាពលរដ្ឋបានដោយប្រសិទ្ធភាព និងនិរន្តភាព៕