.jpg)
លោកនាយករដ្ឋមន្ត្រី ហ៊ុន សែន សំណះសំណាលជាមួយពលរដ្ឋខ្មែរនៅអាមេរិក។ រូប SPM
ភ្នំពេញៈ មុនចាកចេញពីសហរដ្ឋអាមេរិកមកកាន់កម្ពុជាវិញ ក្រោយបញ្ចប់កិច្ចប្រជុំកំពូលពិសេស អាស៊ាន-អាមេរិក នាថ្ងៃទី ១៤ ឧសភា លោកនាយករដ្ឋមន្ត្រី ហ៊ុន សែន បានផ្ញើសារជាសំឡេងពិសេស បង្ហាញពីមោទនភាព និងការអគុណចំពោះជនរួមជាតិកម្ពុជារស់នៅក្រៅប្រទេសចំពោះការមិនតបតទៅនឹងក្រុមអមិត្តដែលបានធ្វើសកម្មភាពមិនល្អមកលើរូបលោក។
លោកថា លោកមានមោទនភាពចំពោះជនរួមជាតិកម្ពុជាដែលបានមករស់នៅក្រៅប្រទេស ជាពិសេសអ្នករស់នៅសហរដ្ឋអាមេរិក និងប្រទេសកាណាដា ដែលបានមកចូលរួមជាមួយលោកក្នុងភាពថ្លៃថ្នូរដោយមិនបានធ្វើការតបតណាមួយនឹងក្រុមអមិត្តដែលតែងតែបង្កហេតុ បើទោះបីជា ឧបទ្ទវហេតុបានកើតឡើងក៏ដោយ។
លោក ហ៊ុន សែន ថ្លែងថា៖ «សូម អរគុណដល់បងប្អូនយើងដែលបានរក្សានូវភាពអត់ធ្មត់ដោយការអំពាវនាវរបស់ខ្ញុំ។ សុំបងប្អូនបន្តការអត់ធ្មត់បន្តទៅទៀតជាមួយ នឹងសកម្មភាពញុះញង់ វាយប្រហារមកលើបងប្អូន។ នេះជាឥរិយាបថនៃភាពជ្រុលនិយមរបស់ក្រុមប្រឆាំងដែលចាត់ទុកថា ជាវីរជន នៅពេលដែលគេបានរំលោភបំពានលើច្បាប់ និងបង្ហាញនូវសារជាតិជាអំពើហិង្សាជ្រុលនិយម»។
លោកនាយករដ្ឋមន្ត្រីបន្ថែមថា លោកមានមោទនភាពជាមួយនឹងជនរួមជាតិ រស់នៅសហរដ្ឋអាមេរិក និងកាណាដា ដែលរក្សាបាននូវភាពថ្លៃថ្នូរ និងគោរពច្បាប់អាមេរិក ហើយក៏ទទួលបាននូវការរាប់អានលោក ក៏ដូចជាគណៈប្រតិភូពេលសម្រាកនៅទីនោះ។
ករណីមិនឱ្យមានការតបតនេះលោក យង់ ពៅ អគ្គលេខាធិការរាជបណ្ឌិត្យសភាកម្ពុជាចាត់ទុក នេះជាកាយវិការដ៏ល្អ និងជាការសន្ដោសប្រណីមួយរបស់លោកនាយករដ្ឋមន្ត្រីសម្រាប់ប្រជាជាតិខ្មែរទាំងអស់ បើទោះបីជាក្រុមប្រឆាំងបានប្រព្រឹត្តអំពើអសីលធម៌មកលើប្រមុខរាជរដ្ឋាភិបាលក្ដី។
លោកប្រាប់ថា៖ «តាមខ្ញុំយល់ បើយើងធ្វើការតបត ក៏មិនបានផលល្អជះមកវិញដែរ។ ដូចនេះ សម្តេច [ហ៊ុន សែន] ប្រកាសមិនតបតនេះគឺជាការល្អ ជាការសន្ដោសប្រណី និងបង្ហាញពីសីលធម៌ខ្មែរ ដែលមានការយោគយល់គ្នាទៅវិញទៅមកផងដែរ»។
លោក យង់ ពៅ ថ្លែងថា ប្រសិនបើ អ្នកគាំទ្រគណបក្សប្រជាជនមានការតបតត្រឡប់ទៅវិញ វានឹងបង្ហាញពីការសងសឹក និងសីលធម៌ មិនល្អ មានគំនុំគុំកួន រវាងខ្មែរ និងខ្មែរផងដែរ។ លោកក៏បានអំពាវនាវដល់ប្រជាពលរដ្ឋខ្មែរគួររក្សាសីលធម៌គោរពគ្នាទៅវិញទៅមក។
លោកនាយករដ្ឋមន្ត្រី ហ៊ុន សែន កាលពីថ្ងៃទី ១០ ឧសភា បានដឹកនាំគណៈប្រតិភូជាន់ខ្ពស់កម្ពុជាទៅចូលរួមកិច្ចប្រជុំកំពូលពិសេសអាស៊ាន-សហរដ្ឋអាមេរិកនៅទីក្រុងវ៉ាស៊ីនតោន ដែលបានប្រព្រឹត្តទៅនៅថ្ងៃទី ១២-១៣ ខែឧសភា។ ក្នុងដំណើរបេសកកម្មនេះ លោកបានជួបជាមួយប្រជាពលរដ្ឋខ្មែររស់នៅទីនោះ និងប្រទេសកាណាដា ដែលបានមកស្វាគមន៍លោក។
ខណៈលោកកំពុងជួប និងថតរូបជាមួយពលរដ្ឋដែលមកស្វាគមន៍លោកនោះ ស្រាប់តែបុរសជនជាតិខ្មែរ ១ រូប ដែលត្រូវបានគេស្គាល់ឈ្មោះថា អ៊ុក ទូច ដែលជាសកម្មជនបក្សប្រឆាំងបានយកស្បែកជើងគប់សំដៅលោក ហ៊ុន សែន ប៉ុន្តែមិនត្រូវឡើយ។ លោក អ៊ុក ទូច ក៏ត្រូវបានសមត្ថកិច្ចអាមេរិកឃាត់ខ្លួន និងបានបណ្តេញចេញពីទីកន្លែងនោះផងដែរ។
ចំពោះទង្វើនេះ លោក ហ៊ុន ម៉ានី ប្រធានសហភាពសហព័ន្ធយុវជន កម្ពុជា និងជាកូនប្រុសពៅរបស់លោក ហ៊ុន សែន បានសរសេរសារលើបណ្តាញសង្គមរបស់ខ្លួនបង្ហាញនូវការមិនអាចទទួលយកបាននូវទង្វើរបស់លោក អ៊ុក ទូច។
លោកសរសេរថា៖ «ទង្វើដែលប្រមាថមកលើពុកមកលើនាយករដ្ឋមន្ត្រី មកលើប្រធានគណបក្សប្រជាជនកម្ពុជា គឺជាទង្វើដែលមិនអាចទទួលយកបានជាដាច់ខាត។ ទង្វើនេះពួកយើងទាំងអស់គ្នាជាសមាជិកគណបក្ស និងជាប្រជាជនខ្មែរដែលគាំទ្រគណបក្សប្រជាជនកម្ពុជាមិនអាចបន្ធូរបន្ថយ ឬសម្រាលទោសកំហុសដល់ពួកជ្រុលនិយមទាំងអស់នោះបានទេ»។
ចំណែកលោកស្រី ម៉ែន សំអន ឧបនាយករដ្ឋមន្ត្រី រដ្ឋមន្ដ្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច ក៏បានថ្កោលទោសយ៉ាងដាច់អហង្ការទៅលើទង្វើរបស់លោក អ៊ុក ទូច នេះ។
លោកស្រីបន្តថា៖ «នាងខ្ញុំមិនគាំទ្រនូវទង្វើរបស់បុគ្គល អ៊ុក ទូច និងសូមថ្កោលទោសយ៉ាងដាច់អហង្ការនូវទង្វើដ៏ថោកទាប ដែលប្រមាថមកលើសម្តេចនាយករដ្ឋមន្ត្រី អំឡុងពេលដែលសម្តេចកំពុងចូលរួមកិច្ចប្រជុំកំពូលពិសេស អាស៊ាន-សហរដ្ឋអាមេរិក»។
លោក ហ៊ុន សែន បានដឹកនាំគណៈប្រតិភូវិលមកដល់ប្រទេសកម្ពុជាវិញនាយប់ថ្ងៃទី ១៥ ខែឧសភា ឆ្នាំ ២០២២៕
