ភ្នំពេញៈ អង្គការសុខភាពពិភពលោក (WHO) ប្រកាសថា ប្រទេសចំនួន ២០ បានរាយការណ៍ពីការរកឃើញកុមារជាង ២០០ ករណីមានជំងឺរលាកថ្លើមស្រួចស្រាល់ប្រភេទថ្មីដែលកើតលើកុមារអាយុពី ១-១៦ ឆ្នាំ ប៉ុន្តែភាគច្រើននៃអ្នកជំងឺគឺក្រោមអាយុ ១០ ឆ្នាំ ហើយប្រហែលជា ១០% នៃកុមារទាំងនោះ ឬ ១៧ នាក់ គឺមានតម្រូវការត្រូវការផ្សាំថ្លើម។
មន្ត្រីជាន់ខ្ពស់ក្រសួងសុខាភិបាលកម្ពុជាឱ្យដឹងថា មកដល់ពេលនេះ អង្គការសុខភាពពិភពលោកមិនទាន់រកឃើញច្បាស់លាស់ថា បណ្តាលមកពីមូលហេតុណាមួយនៅឡើយទេ។ ជំងឺនេះត្រូវបានអ្នកជំនាញហៅថា ជាជំងឺអាថ៌កំបាំង។
លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានថ្លែងកាលពីថ្ងៃទី ១៣ ឧសភា ថា អង្គការសុខភាពពិភពលោកទទួលបានរបាយការណ៍ចាប់ពីខែមេសា ឆ្នាំ ២០២២ កន្លងទៅពីប្រទេសចំនួន ២០ ដែលមានការរកឃើញជំងឺនេះកើតមានឡើងលើកុមារ។ ការស្រាវជ្រាវជាបន្តបន្ទាប់ទាំងប្រទេសនៅខាងអឺរ៉ុប ទាំងសហរដ្ឋអាមេរិក និងប្រទេសអង់គ្លេស ភ្លាមៗនោះបានធ្វើការស្រាវជ្រាវយ៉ាងសកម្ម ហើយបានរកឃើញថា ជំងឺនេះមិនមានទំនាក់ទំនងគ្នាជាមួយនឹងជំងឺរលាកថ្លើមជាទូទៅឡើយ។
លោកស្រីថា ជំងឺរលាកថ្លើមជាទូទៅដែលត្រូវបានស្រាវជ្រាវឃើញ និងប្រជាពលរដ្ឋទូទៅនៅលើសកលលោកទទួលស្គាល់ដែរនោះ រួមមាន ជំងឺរលាកថ្លើមប្រភេទ A, B, C, D និងប្រភេទ E។ តាមការពិនិត្យ និងការស្រាវជ្រាវរបស់មន្ទីរពិសោធន៍រកឃើញមានវត្តមាននៃប្រភេទវីរុសអាដេណូវីរុស (adenovirus) ដែលវាជាប្រភេទវីរុសមួយដែលកន្លងមកនៅលើពិភពលោកមានវីរុសនេះហើយ។ វីរុសនេះវាធ្វើឱ្យមានបញ្ហារលាកផ្លូវដង្ហើម ប៉ុន្តែមិនមានឃើញមានការប៉ះពាល់ថ្លើមនោះឡើយ។
ជាមួយគ្នានេះ លោកស្រី ឱ វណ្ណឌីន បញ្ជាក់ដែរថា សម្រាប់ប្រទេសកម្ពុជាមិនទាន់មានការរកឃើញករណីជំងឺរលាកថ្លើមប្រភេទថ្មីនេះនៅឡើយទេ។ ប៉ុន្តែលោកស្រីអំពាវនាវឱ្យប្រុងប្រយ័ត្ន និងបានដាក់នូវការពង្រឹងយន្តការតាមដានអ្នកជំងឺ។
លោកស្រីថ្លែងថា៖ «ក្នុងនាមក្រសួងជំនាញ យើងតែងតែមានការចាត់ចែងដោយភាពសកម្ម និងការទទួលខុសត្រូវដោយឱ្យបណ្តាញសុខាភិបាលនៅទូទាំងប្រទេសឱ្យមានការប្រុងប្រយ័ត្ន និងតាមដាន។ ជាពិសេសគឺការពង្រឹងការតាមដានស្ថានភាពជំងឺដែលអ្នកជំងឺចូលមកសម្រាកមន្ទីរពេទ្យ»។
មួយវិញទៀត ក្រសួងសុខាភិបាលក៏ធ្វើការពង្រឹងលើសមត្ថភាព មន្ទីរពិសោធន៍ដើម្បីត្រៀមលក្ខណៈក្នុងការវិភាគឱ្យបានហ្មត់ចត់ថែមទៀតទៅលើករណីដែលមានការសង្ស័យ ឱ្យបានទាន់ពេលវេលា។ ប៉ុន្តែមកដល់ពេលនេះមិនទាន់មានសំណាកណាមួយមានការសង្ស័យលើជំងឺនេះនៅឡើយទេ។
លោកស្រីបញ្ជាក់ថា៖ «តាមការណែនាំរបស់អង្គការសុខភាពពិភពលោក គឺសុំឱ្យឪពុកម្តាយ អាណាព្យាបាលត្រូវថែរក្សាអនាម័យលើកូនចៅឱ្យបានហ្មត់ចត់មែនទែន។ ជាពិសេសត្រូវបង្រៀនឱ្យចេះធ្វើអនាម័យល្អ ដោយសារគេនឹងធ្វើការស្រាវជ្រាវបន្តទៀតថា តើការឆ្លងនេះអាចបណ្តាលមកពីបរិស្ថាន ឬចំណីអាហារពុល ឬមកពីសារធាតុផ្សេងៗទៀត»។
លោកស្រីក៏បានណែនាំថា អ្វីដែលសំខាន់ជាងនេះទៀតនោះគឺការធ្វើអនាម័យដៃ ដែលវានៅតែជាកត្តាសំខាន់សម្រាប់ការពារសុខភាពកុមារ និងមនុស្សធំ ជាពិសេសការផ្គត់ផ្គង់អាហារលើកុមារ ត្រូវតែមានភាពស្អាត (Food Hygine)។ អាហារត្រូវឆ្អិនល្អ ព្រោះជំងឺនេះមានរោគសញ្ញាកើតលើកុមារដែលមានសុខភាពមាំទាំធម្មតា។ ប៉ុន្តែមានការសង្ស័យដោយសារកុមារមានរាក ក្អួត ឈឺពោះ និងមានរោគសញ្ញាលឿងលើស្បែក និងភ្នែក ក៏ដូចជាការប្រែពណ៌លើលាមកផងដែរ។
មជ្ឈមណ្ឌលគ្រប់គ្រង និងបង្ការជំងឺ (CDC) ឱ្យដឹងកាលពីដើមខែឧសភាថាបច្ចុប្បន្ន CDC កំពុងធ្វើការជាមួយមន្ទីរសុខាភិបាលទូទាំងប្រទេសដើម្បីកំណត់អត្តសញ្ញាណ កុមារដែលមានជំងឺរលាកថ្លើមដោយមិនដឹងមូលហេតុនេះ។
មន្ត្រី CDC និយាយថា ពួកគេមិនទាន់ដឹងថា តើវីរុសអាដេណូវីរុស គឺជាមូលហេតុពិតប្រាកដនោះនៅឡើយទេ។ Adenovirus គឺជា មេរោគធម្មតា ដែលជាធម្មតាបណ្តាលឱ្យមានរោគសញ្ញា ដូចជា ផ្តាសាយស្រាល ឬជំងឺផ្តាសាយ ឬបញ្ហាក្រពះ និងពោះវៀន។
ប្រភពដដែលបន្តថា៖ «វាមិនមែនជាមូលហេតុនៃជំងឺរលាកថ្លើមធ្ងន់ធ្ងរចំពោះកុមារ ដែលមានសុខភាពល្អនោះទេ ទោះបីជាវាត្រូវបានផ្សារភ្ជាប់ទៅនឹងជំងឺចំពោះ កុមារដែលមានប្រព័ន្ធការពាររាងកាយខ្សោយក៏ដោយ»៕