ភ្នំពេញៈ រដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានអំពាវនាវដល់ពលរដ្ឋត្រូវខិតខំធ្វើគ្រប់យ៉ាងដោយខ្លួនឯងឱ្យកាន់តែសកម្ម និងមានការទទួលខុសត្រូវបន្ថែមទៀតលើការដាំដុះដំណាំ ការចិញ្ចឹមសត្វ ក៏ដូចជាការប្រកបរបររកទទួលទានប្រចាំថ្ងៃ ត្រូវគិតពីកត្តាសុខភាពចម្បងដើម្បីលើកកម្ពស់សុវត្ថិភាពស្បៀង កម្រិតជីវភាព និងការអភិវឌ្ឍ។
លោកបានថ្លែងដូចនេះនៅថ្ងៃទី ១៥ ខែឧសភា ក្នុងពេលចុះបេសកកម្មការងារនៅខេត្តកំពង់ចាម និងខេត្តត្បូងឃ្មុំ ដោយលោកបានបញ្ជាក់ថា សុខភាពជាកត្តាចម្បង សម្រាប់ការសិក្សារៀនសូត្រ ការរកទទួលទាន ការចូលរួមសកម្មភាពសង្គម និងការអភិវឌ្ឍសេដ្ឋកិច្ចគ្រួសារ និងសុភមង្គលក្នុងគ្រួសារ។
លោក វេង សាខុន បានណែនាំថា៖ «បងប្អូនត្រូវខិតខំយកចិត្តទុកដាក់ថែរក្សាសុខភាពឱ្យបានល្អ ដោយរស់នៅស្អាត ហូបស្អាត និងផឹកស្អាត និងត្រូវបន្ថយ ៣ គឺបន្ថយខ្លាញ់ ផ្អែម និងប្រៃ និងត្រូវបង្កើនការហាត់ប្រាណឱ្យទៀងទាត់»។
ទាក់ទងនឹងបញ្ហាសុខភាពនេះដែរ លោក មាស ពិសិដ្ឋ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកកម្មវិធី ASPIRE ធ្លាប់បានស្នើកាលថ្ងៃទី ១២ ឧសភា ឱ្យមន្ត្រីជំនាញផ្នែកវិភាគគុណភាពបន្លែ និងផ្លែឈើក្នុងខេត្តចំនួន ២៤ ត្រូវយកចិត្តទុកដាក់លើការធ្វើតេស្តរកសំណល់ថ្នាំកសិកម្មនៅលើបន្លែ ផ្លែឈើ ដោយត្រូវវាយតម្លៃប្រកបដោយវិជ្ជាជីវៈ។
ការស្នើនេះត្រូវបានធ្វើឡើងក្នុងពិធីបិទវគ្គបណ្តុះបណ្តាលស្តីពី «ការប្រើប្រាស់សម្ភារពិសោធន៍ (Testing kits) និងការវិភាគគុណភាពបន្លែ និងផ្លែឈើ» នៅមជ្ឈមណ្ឌលប្រមូលផ្តុំត្រួតពិនិត្យគុណភាព និងចែកចាយបន្លែសុវត្ថិភាពនៃមន្ទីរកសិកម្ម រុក្ខាប្រមាញ់ និងនេសាទ ខេត្តកណ្តាល។
លោក មាស ពិសិដ្ឋ បានថ្លែងថា ការធ្វើតេស្តរកសំណល់ថ្នាំកសិកម្មនៅលើបន្លែ ផ្លែឈើ និងការវិភាគគុណភាពបន្លែ និងផ្លែឈើ គឺពិតជាមានសារៈសំខាន់ និងទទួលបានការចាប់អារម្មណ៍ពីសំណាក់ ប្រជាពលរដ្ឋ និងថ្នាក់ដឹកនាំ ហើយទាំងអស់គ្នាត្រូវធ្វើប្រកបដោយវិជ្ជាជីវៈ និងប្រកបទៅដោយកិត្តិយស។
លោកបានបន្ថែមថា៖ «នៅពេលយើងទាំងអស់គ្នា បរិភោគចំណីអាហារមិនល្អ បរិភោគចំណីអាហារដែលគ្មានអាហារូបត្ថម្ភធ្វើឱ្យប៉ះពាល់នូវសុខភាពរបស់យើងទាំងអស់គ្នា ដូចជា ស្គមស្គាំង មិនលូតលាស់ ប្រាជ្ញាស្មារតីមិនល្អធ្វើឱ្យយើងមិនអាចកសាងជីវភាពគ្រួសារបានល្អ។ នៅពេលដែលយើងចាស់ទៅប្រឈមនឹងជំងឺផ្សេងៗជាច្រើន»។
លោកបានបន្តថា នៅពេលដែលគ្រប់គ្នាបរិភោគចំណីអាហារដែលមានអាហារូបត្ថម្ភល្អធ្វើឱ្យមានសុខភាពល្អ ប្រាជ្ញាស្មារតីពូកែ និងជួយឱ្យប្រទេសជាតិមានធនធានល្អជាច្រើនក្នុងការអភិវឌ្ឍប្រទេសផងដែរ។
ចំណែកលោក ប៊ុនទួន ស៊ីម៉ូណា ប្រធានមន្ទីរកសិកម្ម រុក្ខាប្រមាញ់ និងនេសាទ និងជាប្រធានអនុកម្មវិធី ASPIRE ប្រចាំខេត្តកណ្ដាលបានឱ្យដឹងដែរថា វគ្គបណ្ដុះបណ្ដាលនេះមានគោលបំណងគាំទ្រខ្សែចង្វាក់ផលិតកម្មបន្លែសុវត្ថិភាព បង្កើននូវជំនឿទុកចិត្តពីផលិតករ ក្រុមហ៊ុនប្រមូលទិញ និងធានាសុវត្ថិភាពជូនអតិថិជន និងអ្នកបរិភោគផងដែរ៕