.jpg)
លោក ស ខេង អមដោយលោក នេត សាវឿន និងមន្ត្រីនគរបាលជាច្រើនទៀតនៅក្រសួងមហាផ្ទៃកាលពីឆ្នាំមុន។ ហុង មិនា
ភ្នំពេញៈ រយៈពេលកន្លងមក កងកម្លាំងនគរបាលជាតិបានកសាងនូវស្នាដៃ និងសមិទ្ធផលធំៗ ដែលមានគុណប្រយោជន៍ជាច្រើន ពិសេសក្នុងដំណាក់កាលប្រទេសជាតិស្ថិតក្នុងបរិបទហានិភ័យនៃការឆ្លងរាតត្បាតជំងឺកូវីដ ១៩។ នេះជាការរៀបរាប់របស់រដ្ឋមន្ត្រីមហាផ្ទៃ លោក ស ខេង ក្នុងទិវារំឭកខួបថ្ងៃបង្កើតកងកម្លាំងនគរបាលជាតិ នាថ្ងៃទី ១៦ ឧសភា។
តាមរយៈសារលិខិតជូនកងកម្លាំងនគរបាលជាតិក្នុងទិវារំឭកខួបអនុស្សាវរីយ៍ លើកទី ៧៧ ថ្ងៃកំណើតនគរបាលជាតិ នាថ្ងៃទី ១៦ ខែឧសភា ឆ្នាំ ២០២២ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃលោក ស ខេង បានលើកឡើងថា នគរបាលជាតិបានទទួលបន្ទុករែកពុនការងារដ៏ធ្ងន់ធ្ងរក្នុងពេលតែមួយ តាមរយៈការបំពេញតួនាទីស្នូលក្នុងការធានាស្ថិរភាព សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គមផង និងបានបំពេញកាតព្វកិច្ចចូលរួមចំណែកយ៉ាងសកម្មក្នុងការប្រយុទ្ធប្រឆាំងការឆ្លងរាតត្បាតជំងឺកូវីដ ១៩ ផង។
អង្គប្រតិបត្តិច្បាប់ដែលត្រូវបានប្រសិទ្ធនាមថា «នគរបាលជាតិ» បានចាប់បដិសន្ធិនៅថ្ងៃទី ១៦ ខែឧសភា ឆ្នាំ ១៩៤៥ ក្រោម ស្នាព្រះហស្តរបស់ព្រះករុណា ព្រះមហាវីរក្សត្រ ព្រះបាទសម្តេច ព្រះនរោត្តម សីហនុ ព្រះបរមរតនកោដ្ឋក្នុងព្រះរាជបំណងពង្រឹងសន្តិសុខ សណ្តាប់ធ្នាប់សាធារណៈ និងសុវត្ថិភាព សង្គម ដែលគិតមកដល់ពេលនេះមានអាយុកាល ៧៧ ឆ្នាំហើយ។
លោក ស ខេង បញ្ជាក់ថា៖ «រហូតមកដល់បច្ចុប្បន្ននេះ បើទោះបីជាកម្ពុជានៅតែរក្សាបានបរិយាកាសសន្តិសុខល្អប្រសើរយ៉ាងណាក្តី ក៏ប៉ុន្តែកងកម្លាំងនគរបាលជាតិនៅតែជាកម្លាំងស្នូលឈានមុខ ក្នុងការបំពេញតួនាទី ធានារ៉ាប់រងចំពោះភាពសុខសាន្តរបស់ប្រជាពលរដ្ឋ និងការពារខឿនសន្តិសុខជាតិ ដែលជាមូលដ្ឋានគ្រឹះនៃការអភិវឌ្ឍប្រទេសជាតិលើគ្រប់វិស័យ»។
ក្នុងឆ្នាំ ២០២២ នេះកងកម្លាំងនគរបាលជាតិត្រូវបន្តបេសកកម្មរបស់ខ្លួន ដើម្បីដោះស្រាយបញ្ហាប្រឈមនានាដែលបណ្តាលមកពីឥទ្ធិពលអសន្តិសុខក្នុងតំបន់ និងសកលលោក ក៏ដូចជាសកម្មភាពនៃបទឧក្រិដ្ឋឆ្លងដែន បទល្មើសព្រហ្មទណ្ឌគ្រប់ប្រភេទ បទល្មើសគ្រឿងញៀន អំពើជួញដូរមនុស្ស ពិសេសស្ត្រី និងកុមារ និងបទល្មើសបច្ចេកវិទ្យា ដែលនៅតែបន្តកើតឡើង បង្កភាពភ័យខ្លាចដល់ប្រជាពលរដ្ឋ។
លោក ស ខេង បន្តថា៖ «ខ្ញុំមាន សេចក្តីសង្ឃឹម និងជឿជាក់យ៉ាងមុតមាំថា កងកម្លាំងនគរបាលជាតិនឹងបន្តលើកកម្ពស់សក្តានុពល និងមានភាពរីកចម្រើនប្រកបដោយកិត្តិយស សេចក្តីថ្លៃថ្នូរ ឈរយ៉ាងរឹងមាំជាសសរស្តម្ភនៃសន្តិសុខ សណ្តាប់ធ្នាប់សង្គម បម្រើផលប្រយោជន៍ប្រជាពលរដ្ឋ និងប្រទេសជាតិគ្រប់កាលៈទេសៈ»។
ក្នុងឱកាសនោះដែរ លោក នេត សាវឿន អគ្គស្នងការនគរបាលជាតិបានសម្តែងការគោរពស្ញប់ស្ញែងចំពោះគុណូបការៈដ៏ធំធេងដែលបុព្វបុរសរៀមច្បង រួមទាំងនិវត្តជននគរបាលជាតិគ្រប់ជំនាន់បានតស៊ូប្រកបដោយវីរភាពអង់អាចក្លាហាន បូជាសាច់ ស្រស់ឈាមស្រស់ ដោយមិនគិត អំពីសេចក្តីសុខ និងអាយុជីវិតរបស់ខ្លួន កសាងនូវសមិទ្ធផលស្នាដៃជាច្រើនរាប់មិនអស់ ដើម្បីបុព្វហេតុសន្តិសុខមាតុភូមិ។
ឆ្នាំ ២០២១ កន្លងទៅ គ្រប់គោលដៅនយោបាយ ការទូត សេដ្ឋកិច្ច វប្បធម៌ ទេសចរណ៍ និងព្រះរាជបេសកកម្មរបស់ព្រះមហាក្សត្រ ព្រះមហាក្សត្រិយានី ព្រះវររាជមាតាជាតិខ្មែរ បេសកកម្មរបស់ឥស្សរជនជាន់ខ្ពស់ជាតិ-អន្តរជាតិ និងព្រឹត្តិការណ៍ជាតិ-អន្តរជាតិសំខាន់ៗប្រមាណ ១២ ១៨០ លើក ត្រូវបានធានាសុវត្ថិភាពទាំងស្រុង។ នេះបើតាមការបញ្ជាក់ពីលោក នេត សាវឿន។
លោកបានបន្តថា ស្ថានភាពសន្តិសុខ សណ្តាប់ធ្នាប់សង្គមកាន់តែមានភាពល្អប្រសើរជាលំដាប់ ដោយបានកាត់បន្ថយបទល្មើសព្រហ្មទណ្ឌជារួមប្រមាណ ៦% ជាពិសេសលទ្ធផលបង្ក្រាបមានកម្រិតខ្ពស់រហូតដល់ ៩៣% ស្របពេលដែលហេតុការណ៍គ្រោះថ្នាក់ចរាចរណ៍ថយចុះ ១៧% អ្នកស្លាប់ថយចុះ ៩% និងអ្នករបួសថយចុះ ២៣%។
ចំពោះយុទ្ធនាការប្រយុទ្ធប្រឆាំងគ្រឿងញៀនខុសច្បាប់អំពើជួញដូរមនុស្ស និងអាជីវកម្មផ្លូវភេទ ពិសេសស្ត្រី និងកុមារ ការលុបបំបាត់ការដាក់ប៉ុស្តិ៍ត្រួតពិនិត្យអនាធិបតេយ្យ ល្បែងស៊ីសងគ្រប់ប្រភេទ ក្មេង-ទំនើង យុទ្ធនាការការពារធន-ធានធម្មជាតិ ការបង្ក្រាបបទល្មើសព្រៃឈើ និងជលផលត្រូវបានសហការចាត់តាំងអនុវត្តយ៉ាងសកម្មផុលផុស ដោយទទួលបានលទ្ធផលគួរឱ្យកត់សម្គាល់។
លោកលើកឡើងថា ក្នុងអំឡុងឆ្នាំ ២០២២ នេះ សភាពការណ៍សន្តិសុខសកលលោកនៅតែបន្តប្រែប្រួលប្រកបដោយភាពស្មុគស្មាញ ដែលហេតុការណ៍មួយចំនួនអាចជះឥទ្ធិពលដោយផ្ទាល់ និងប្រយោលដល់កម្ពុជា។ ក្នុងអំឡុងពេលដូចគ្នានេះដែរ ព្រឹត្តិការណ៍នយោបាយជាតិ និងព្រឹត្តិការណ៍អន្តរជាតិមួយចំនួននឹងត្រូវរៀបចំប្រព្រឹត្តទៅនៅព្រះរាជាណាចក្រកម្ពុជាទៀតផង។
លោកអគ្គស្នងការនគរបាល នេត សាវឿន បានបញ្ជាក់ថា៖ «បញ្ហាប្រឈមមួយចំនួននៅតែបន្តកើតមានឡើង ដែលទាមទារចាំបាច់ឱ្យកងកម្លាំងនគរបាលជាតិបន្តលើកកម្ពស់ស្មារតីប្រុងប្រយ័ត្ន ខិតខំប្រឹងប្រែងអនុវត្តឱ្យបានម៉ឺងម៉ាត់ ហ្មត់ចត់នូវរាល់ផែនការ វិធានការ និងយុទ្ធនាការសំខាន់ៗរបស់រាជរដ្ឋាភិបាល និងក្រសួងមហាផ្ទៃ ដើម្បីធ្វើឱ្យបរិយាកាសសង្គមមានភាពកក់ក្តៅ»៕
