.jpg)
ហ្វេសប៊ុកលោក ស ខេង ដែលពលរដ្ឋតាមដានផ្ញើសំណូមពរសុំឱ្យដោះស្រាយ។ ហេង ជីវ័ន
ភ្នំពេញៈ មតិយោបល់ ឬសំណូមពររបស់ប្រជាពលរដ្ឋដែលផ្ញើចូលមកកាន់ទំព័រហ្វេសប៊ុករបស់រដ្ឋមន្ត្រីក្រសួងមហាផ្ទៃលោក ស ខេង ស្នើឱ្យមានដំណោះស្រាយកាលពីខែមេសា ឆ្នាំ ២០២២ ក្រុមការងារតាមដានដោះស្រាយបានចំនួន ៦៧ គណនី នៅសល់ជាង ១០០ គណនី ឯគណនី ៦៥០ ក្នុងឆ្នាំមុនដោះស្រាយបាន ១២៥ គណនី និងរាប់រយទៀតមន្ត្រីកំពុងដោះស្រាយ។
ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស ខេង បានសរសេរលើហ្វេសប៊ុករបស់លោកនាថ្ងៃទី ១១ ឧសភា ថា តាមរយៈទំព័រហ្វេសប៊ុករបស់លោកប្រចាំខែមេសា ក្រុមការងារបានឆ្លើយតបទៅម្ចាស់គណនី និងដោះស្រាយបាន ៦៧ គណនី និង ១១៨ គណនីទៀតកំពុងស្ថិតក្នុងដំណាក់កាលដោះស្រាយ។ ទន្ទឹមគ្នានេះក៏មានសំណូមពរ សំណួរ និងបញ្ហាខ្លះទៀតត្រូវបានរកឃើញខុសពីសមត្ថកិច្ចក្រសួងមហាផ្ទៃ និងបានជូនយោបល់បង្វែរទៅស្ថាប័នមានសមត្ថកិច្ច។
លោកបញ្ជាក់ថា៖ «វឌ្ឍនភាពការងារនេះអាចសម្រេចបាន ដោយសារកិច្ចខិតខំប្រឹងប្រែង និងការសហការគ្នាដ៏ល្អរវាងថ្នាក់ដឹកនាំ និងមន្ត្រីស្ថិតក្នុងដែនសមត្ថកិច្ច ក្រសួងមហាផ្ទៃ ទាំងថ្នាក់ជាតិថ្នាក់ក្រោមជាតិ និងក្រុមការងារគេហទំព័រហ្វេសប៊ុករបស់ខ្ញុំ»។
ជាមួយគ្នានេះ លោកបានស្នើឱ្យថ្នាក់ដឹកនាំ និងមន្ត្រីពាក់ព័ន្ធ ដែលស្ថិតក្រោមសមត្ថកិច្ចក្រសួងមហាផ្ទៃទាំងអស់ គប្បីខិតខំពន្លឿនការដោះស្រាយ ហើយការដោះស្រាយទាំងអស់នោះត្រូវតែធានាឱ្យបានល្អគ្រប់ជ្រុងជ្រោយពិតប្រាកដនៃបញ្ហា និងចប់ចុងចប់ដើម ដោយមិនគ្រាន់តែធ្វើជាលិខិតស្នាមបញ្ជាតាមបែបបទរដ្ឋបាលនោះទេ។
លោកក៏បានថ្លែងអំណរគុណដល់ពលរដ្ឋ ជនរួមជាតិ ដែលបានលើកជាមតិយោបល់ និងសំណូមពរនានាមកកាន់ តាមរយៈទំព័រហ្វេសប៊ុក ដើម្បីរួមគ្នាដោះស្រាយបញ្ហានានាក្រៅប្រព័ន្ធតុលាការ ជួយសម្រួលជីវភាពរស់នៅរបស់ប្រជាពលរដ្ឋ និងរួមគ្នាអភិវឌ្ឍសង្គមជាតិ។
លោកបន្តថា៖ «ជាថ្មីម្តងទៀត ខ្ញុំក៏សូមយកឱកាសនេះ ស្នើសុំការយល់យោគអធ្យាស្រ័យពីបងប្អូនជនរួមជាតិ ចំពោះករណីមួយចំនួនទៀត ដែលក្រុមការងារ និងភាគីពាក់ព័ន្ធ នៅមិនទាន់បានដោះស្រាយចប់សព្វគ្រប់ អាស្រ័យលើករណីខ្លះទាមទារពេលវេលា និងអនុវត្តទៅតាមនីតិវិធី»។
បើតាមរបាយការណ៍បូកសរុបស្តីពីការទទួលមតិយោបល់ ឬសំណូមពររបស់មហាជនដែលបានបញ្ចេញមតិ និងផ្ញើសារក្នុងគេហទំព័រហ្វេសប៊ុករបស់លោក ស ខេង គណនីដែលនៅសល់ក្នុងឆ្នាំ ២០២១ ក្រុមការងារបានធ្វើការបូកសរុបតាមដានដោយឡែកមាន ៦៥០ គណនី ក្នុងនោះដោះស្រាយបាន ១២៥ គណនី និងកំពុងដោះស្រាយ ៥២៥ គណនី។
នាយករងទទួលបន្ទុកផ្នែកឃ្លាំមើល និងការពារសិទ្ធិមនុស្សនៃអង្គការលីកាដូ លោក អំ សំអាត ថ្លែងថា ការបង្កើតឱ្យមានការទទួលបណ្តឹង ឬសំណូមពរពលរដ្ឋ ដោយផ្ទាល់តាមហ្វេសប៊ុករបស់លោក ស ខេង បែបនេះ ជាវិធីជួយសម្រួលដល់ពលរដ្ឋ ដោយមិនចាំបាច់ចំណាយពេលធ្វើដំណើរ និងថវិកាច្រើនមកដាក់បណ្ដឹង។ ពលរដ្ឋអាចលើកពីបញ្ហាអសកម្ម និងការព្រងើយកន្តើយពីមន្ត្រីមូលដ្ឋានជម្រាបជូនដល់ថ្នាក់ដឹកនាំ។ ទោះយ៉ាងណា លោកស្នើក៏ដូចជាជំរុញក្រុមការងារ ពន្លឿនការដោះស្រាយបញ្ហានានាប្រកបដោយតម្លាភាព និងគ្មានការរើសអើង។
លោកបានថ្លែងថា៖ «អ្វីដែលជាការសំណូមពរបន្ថែម យើងឃើញថា បញ្ហាប្រជាពលរដ្ឋមានច្រើន ហើយការដោះស្រាយនៅមានកម្រិតនៅឡើយ។ អ៊ីចឹងត្រូវធ្វើម៉េចបង្កើនការដោះស្រាយឱ្យបានច្រើន។ យើងដឹងហើយបញ្ហាខ្លះ ក្រសួងមហាផ្ទៃអាចដោះស្រាយខ្លួនឯង ហើយបញ្ហាខ្លះបញ្ជូនទៅស្ថាប័នពាក់ព័ន្ធ»។
មន្ត្រីសិទ្ធិមនុស្សរូបនេះបានបន្ថែមថា៖ «តែយ៉ាងណាយើងសូមឱ្យការដោះស្រាយនោះប្រកបដោយតម្លាភាព គឺថាមិនមានការរើសអើង ពីព្រោះប្រជាពលរដ្ឋទាំងអស់ ទោះបីគាត់មាននិន្នាការនយោបាយណាក៏ដោយ»៕
