ព្រះវិហារ: ខេត្តព្រះវិហារជាខេត្តទិសដៅទី ២ បន្ទាប់ពីខេត្តស្ទឹងត្រែងដែលត្រូវបានជ្រើសរើសយកមករៀបចំយុទ្ធនាការអន្ទាក់សូន្យនៅក្នុងតំបន់ការពារធម្មជាតិកម្ពុជា ដែលជាការផ្តួចផ្តើមគំនិត និងដឹកនាំដោយក្រសួងបរិស្ថាន ដោយមានការចូលរួមពីអង្គការដៃគូអភិរក្សនានាផងដែរ។
យុទ្ធនាការអន្ទាក់សូន្យនៅខេត្តព្រះវិហារត្រូវបានប្រារព្ធឡើងនៅថ្ងៃទី ១៦ ខែឧសភា ឆ្នាំ ២០២២ នៅក្នុងសហគមន៍ទេសចរណ៍ធម្មជាតិ ត្មាតប៉ើយធឿនក្រសាំង ស្ថិតក្នុងដែនជម្រកសត្វព្រៃគូលែនព្រហ្មទេព ក្នុងស្រុកជាំក្សាន្ត ក្រោមអធិបតីភាពលោក នេត្រ ភក្ត្រា រដ្ឋលេខាធិការក្រសួងបរិស្ថាន ដោយមានការចូលរួមពីរដ្ឋបាលខេត្តព្រះវិហារ អាជ្ញាធរស្រុក អង្គការដៃគូ និងបងប្អូនប្រជាសហគមន៍។
ថ្លែងនៅក្នុងសន្និសីទកាសែតនាថ្ងៃទី ១៦ ខែឧសភា ឆ្នាំ ២០២២ នៅស្នាក់ការដែនជម្រកសត្វព្រៃគូលែនព្រហ្មទេព ខេត្តព្រះវិហារ លោក នេត្រ ភក្ត្រា លើកឡើងថា ក្នុងក្របខ័ណ្ឌនៃយុទ្ធនាការអន្ទាក់សូន្យរយៈពេល ៦ ខែ ក្នុងខេត្តចំនួន ៦ នៅភាគខាងកើតទន្លេមេគង្គរួមមាន ខេត្តស្ទឹងត្រែង ក្រចេះ មណ្ឌលគិរី រតនគិរី ព្រះវិហារ និងកំពង់ធំ មានការផ្តួចផ្តើម និងដឹកនាំធ្វើដោយក្រសួងបរិស្ថាន និងអង្គការដៃគូដែលសហការក្នុងការងារអភិរក្ស។ យុទ្ធនាការនេះមន្ត្រីជាន់ខ្ពស់ក្រសួងបរិស្ថានមានជំនឿថា នឹងចូលរួមកែប្រែឥរិយាបថពលរដ្ឋមួយចំនួនដែលនិយមហូបសាច់សត្វ និងចូលរួមរកដំណោះស្រាយបញ្ចប់វិបត្តិអន្ទាក់ក្នុងតំបន់ការពារធម្មជាតិកម្ពុជា មិនត្រឹមតែផ្តល់ជម្រកកន្លែងរកចំណី និងប្រភពទឹកសម្រាប់សត្វព្រៃរស់នៅនោះទេតែក៏ ដើម្បីផ្តល់សុវត្ថិភាពដល់សត្វព្រៃ និងជីវចម្រុះក្នុងការរស់នៅផងដែរ។
លោកថ្លែងថា ការកំណត់យកខេត្តទាំង ៦ ជាគោលដៅនៃយុទ្ធនាការនេះ ក៏ព្រោះខេត្តទាំង ៦ នេះមានផ្ទៃដីភាគច្រើនគ្របដណ្តប់ដោយតំបន់ការពារធម្មជាតិដែលមានវត្តមានព្រៃឈើ និងសត្វព្រៃ ហើយខេត្តទាំងនេះមានសកម្មភាពលក់សាច់សត្វព្រៃខុសច្បាប់នៅតាមទីផ្សារ និងនៅតាមតំបន់នានានាពេលកន្លងមក ដែលយើងចាំបាច់ត្រូវអប់រំផ្សព្វផ្សាយ ទប់ស្កាត់ និងបង្ក្រាបឱ្យបានមានប្រសិទ្ធភាពខ្ពស់ ក៏ដូចជាកែប្រែឥរិយាបថពលរដ្ឋមួយចំនួនឱ្យបញ្ឈប់ការហូបសាច់សត្វព្រៃ និងបញ្ឈប់ការដាក់អន្ទាក់សត្វព្រៃ។
លោក កែន សិរីរដ្ឋា ប្រធានអង្គការសមាគមអភិរក្សសត្វព្រៃកម្ពុជា WCS តំណាងឱ្យអង្គការដៃគូអភិរក្សជាមួយក្រសួងបរិស្ថានបានអបអរសាទរចំពោះគំនិតផ្តួចផ្តើមក្នុងការរៀបចំយុទ្ធនាការអន្ទាក់សូន្យក្នុងតំបន់ការពារធម្មជាតិ ដោយលោកចាត់ទុកថាបានដើរតួនាទីសំខាន់ក្នុងការអភិរក្សធនធានជីវចម្រុះ និងធនធានធម្មជាតិ ដោយបញ្ឈប់តម្រូវការសាច់សត្វព្រៃក្នុងក្របខ័ណ្ឌខេត្តក៏ដូចជាក្នុងក្របខ័ណ្ឌទូទាំងប្រទេស។
លោកបន្តថា៖ «តាមរយៈយុទ្ធនាការនេះ យើងនឹងអាចឈានដល់ការរៀបចំលិខិតបទដ្ឋានបន្ថែម ដើម្បីកំណត់លើការប្រើប្រាស់អន្ទាក់សម្រាប់ដាក់សត្វព្រៃនិងជំរុញទៅលើការអនុវត្តច្បាប់ និងការផ្សព្វផ្សាយពីផលប៉ះពាល់ពីការដាក់អន្ទាក់ក្នុងតំបន់ការពារធម្មជាតិ»។
លោក នេត្រ ភក្ត្រា ក៏បានលើកឡើងដែរថា ធនធានសត្វព្រៃរបស់ប្រទេសកម្ពុជាកំពុងប្រឈមនឹងហានិភ័យខ្ពស់ ដោយសារវិបត្តិនៃការបរបាញ់ និងការដាក់អន្ទាក់ដែលបាននិងកំពុងកើតឡើង បណ្តាលមកពីការប្រើប្រាស់ និងជួញដូរសត្វព្រៃដោយខុសច្បាប់។
លោកបញ្ជាក់ថា៖ «ដើម្បីដោះស្រាយវិបត្តិនេះ ស្ថាប័ននៃរាជរដ្ឋាភិបាលពាក់ព័ន្ធនិងអង្គការអន្តរជាតិជាដៃគូក្នុងវិស័យបរិស្ថានបានមករួមគ្នានៅថ្ងៃនេះ ដើម្បីបើកយុទ្ធនាការអន្ទាក់សូន្យ នៅក្នុងតំបន់ការពារធម្មជាតិកម្ពុជា»។
លោកបន្តថា គោលដៅចម្បងនៃយុទ្ធនាការនេះគឺការឈានទៅលុបបំបាត់ការប្រើអន្ទាក់គ្រប់ប្រភេទក្នុងតំបន់ការពារធម្មជាតិរបស់កម្ពុជា។ ក្នុងឆ្នាំ ២០២១ ក្រសួងបរិស្ថាន និងស្ថាប័នអង្គការដៃគូបានដកអន្ទាក់សរុបបាន ៦១ ៦១១ អន្ទាក់ ចេញពីតំបន់ការពារធម្មជាតិចំនួន ៧២ និងច្រករបៀងជីវចម្រុះផ្សេងៗទៀតក្នុងប្រទេសកម្ពុជា។ ជាមធ្យម ក្នុង ១ ឆ្នាំមានអន្ទាក់ប្រមាណជាង ៤០ ០០០ ត្រូវបានដកចេញពីតំបន់ការពារធម្មជាតិ។
តាមរយ:យុទ្ធនាការនេះ ក្រសួងបរិស្ថានសូមអំពាវនាវដល់ប្រជាពលរដ្ឋទាំងអស់ឱ្យបញ្ឈប់ការទទួលទានសាច់សត្វព្រៃ និងជាវផលិតផលពីសត្វព្រៃដទៃទៀតជាដាច់ខាត។
លោក នេត្រ ភក្ត្រា អំពាវនាវថា៖ «យើងខ្ញុំសូមអំពាវនាវយ៉ាងទទូចដល់ប្រជាពលរដ្ឋទាំងអស់នៅក្នុងប្រទេសកម្ពុជាឱ្យនិយាយថាទេចំពោះសាច់សត្វព្រៃ និងចូលរួមក្នុងសកម្មភាពអភិរក្សធនធានធម្មជាតិរបស់ព្រះរាជាណាចក្រកម្ពុជាឱ្យនៅស្ថិតស្ថេរគង់វង្ស»។
ជាមួយគ្នានេះ លោក ភក្ត្រា បានអំពាវនាវដល់សមត្ថកិច្ចគ្រប់ជាន់ថ្នាក់ចូលរួមទប់ស្កាត់ និងបង្ក្រាបបទល្មើសនៃការចាប់ដាក់អន្ទាក់ ប្រមាញ់ និងប្រមូលពងសត្វព្រៃគ្រប់ប្រភេទ និងបទល្មើសនៃការជួញដូរសត្វព្រៃ និងសំណាកសត្វព្រៃ ដើម្បីចូលរួមការពារ និងអភិរក្សសត្វព្រៃ និងជីវចម្រុះគ្រប់ប្រភេទឱ្យបានគង់វង្ស និងរីកចម្រើនសម្រាប់បន្សល់ទុកដល់មនុស្សរាប់ជំនាន់ទៀត៕