.jpg)
បុរសម្នាក់របួសដាច់ជើង ដោយសារផ្ទុះមីនតោន ពេលកំពុងបើកត្រាក់ទ័រភ្ជួរស្រែ។ CMAC
ប៉ៃលិនៈ បុរសម្នាក់បានរបួសធ្ងន់ដោយដាច់ជើងឆ្វេងម្ខាងហើយត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ បន្ទាប់ពីគាត់បានបើកត្រាក់ទ័រភ្ជួរដីស្រែ ប៉ះចំលើគ្រាប់មីនតោនហើយផ្ទុះ កាលពីវេលាម៉ោង ១១ ព្រឹកថ្ងៃទី ១៥ ខែឧសភា នៅភូមិស្ទឹកុយ ឃុំសាលាក្រៅ ស្រុកសាលាក្រៅ ខេត្តប៉ៃលិន ខណៈត្រាក់ទ័រ ១ គ្រឿងដែលយកមកភ្ជួរដីនោះត្រូវបំផ្លាញទាំងស្រុង។
លោកវរសេនីយ៍ទោ មាឃ សារ៉ន អធិការនគរបាលស្រុកសាលាក្រៅបានឱ្យដឹងនៅថ្ងៃទី ១៦ ខែឧសភាថា ករណីផ្ទុះគ្រាប់មីនតោននេះ បណ្តាលឱ្យបុរសម្នាក់ជាអ្នកបើកបរត្រាក់ទ័ររបួសដាច់ជើងឆ្វេង និងត្រាក់ទ័រ ១ គ្រឿង ដែលគាត់បើកភ្ជួរដីស្រែត្រូវបំផ្លាញទាំងស្រុង។
លោកថា ក្រោយកើតហេតុភ្លាមៗ ជនរងគ្រោះត្រូវបានបញ្ជូនទៅសង្គ្រោះនៅមន្ទីរពេទ្យបង្អែកខេត្តប៉ៃលិន និងត្រូវបញ្ជូនបន្តទៅសង្គ្រោះនៅមន្ទីរពេទ្យខេត្តបាត់ដំបង។
លោកបានឱ្យដឹងទៀតថាបុរសរងគ្រោះរូបនោះមានឈ្មោះ មឿន សិលា អាយុ ២៥ ឆ្នាំ មុខរបរជាអ្នកបើកបរត្រាក់ទ័រស៊ីឈ្នួលឱ្យគេមានលំនៅបច្ចុប្បន្ននៅភូមិភ្នំកុយ ឃុំសាលាក្រៅ ស្រុកសាលាក្រៅ ខេត្តប៉ៃលិន។ ជនរងគ្រោះរបួសដាច់កជើងខាងឆ្វេងធ្ងន់ធ្ងរ របួសដងខ្លួន និងបែកក្បាល។
លោកថ្លែងថា៖ «និយាយរួមគាត់ភ្ជួរដីស្រែ មិនមែនទើបតែធ្វើថ្មីទេ គាត់ធ្វើច្រើនឆ្នាំហើយ ប៉ុន្តែមិនដឹងយ៉ាងម៉េចដីហ្នឹងរបៀបដូចថា ដីវាទើបតែរាក់ក៏មិនដឹង ពីមុនវានៅជ្រៅអ៊ីចឹងទៅ។ ម្ចាស់ដីហ្នឹងទៅជួលដីគេហើយអ្នកបើកហ្នឹងក៏ស៊ីឈ្នួលបើកត្រាក់ទ័រឱ្យគេដែរ ហើយម្សិលមិញហ្នឹងយើងបញ្ជូនទៅមន្ទីរពេទ្យបង្អែក ហើយបញ្ជូនបន្តទៅដល់បាត់ដំបងស្ថានភាពគាត់មិនគ្រោះថ្នាក់ដល់ជីវិតទេ»។
លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) ថ្លែងនៅថ្ងៃទី ១៦ ខែឧសភាថា ខេត្តប៉ៃលិនជាអតីតសមរភូមិសង្គ្រាមយូរជាងគេនិងមានភាពស្មុគស្មាញជាងគេ។ បច្ចុប្បន្នមានកម្លាំងស៊ីម៉ាក់ជាង ១០០ នាក់បាននិងកំពុងបោសសម្អាតគ្រាប់មីន និងគ្រាប់យុទ្ធភណ្ឌសល់ពីសង្គ្រាមនៅទីនោះដោយបោសសម្អាតបានផ្ទៃដីមានមីន និងគ្រាប់យុទ្ធភណ្ឌសល់ពីសង្គ្រាមបាន ៦០ ភាគរយហើយ។ លោកប្រាប់ថា ជាគោលដៅ CMAC នឹងបោសសម្អាតមីនឱ្យបានរួចរាល់សម្រាប់ខេត្តប៉ៃលិនជាខេត្តគ្មានមីន នៅឆ្នាំ ២០២៥។
ជាមួយគ្នានេះ លោក ហេង រតនា បានអំពាវនាវជាថ្មីឱ្យប្រជាពលរដ្ឋដែលរស់នៅក្នុងតំបន់អតីតសមរភូមិ ជាពិសេសប្រជាពលរដ្ឋនៅខេត្តប៉ៃលិនត្រូវមានការប្រុងប្រយ័ត្ន និងរាយការណ៍ជាបន្ទាន់ទៅកម្លាំងសមត្ថកិច្ច កម្លាំងស៊ីម៉ាក់ និងអាជ្ញាធរមូលដ្ឋាន ប្រសិនបើមានព័ត៌មានទាក់ទងនឹងយុទ្ធភណ្ឌមិនទាន់ផ្ទុះ ដើម្បីឱ្យសមត្ថកិច្ចអាចជួយអន្តរាគមន៍ទាន់ពេលវេលា និងធានាសុវត្ថិភាពជូន។
លោកថ្លែងថា៖ «ខ្ញុំសូមអំពាវនាវចំពោះប្រជាពលរដ្ឋ ជាពិសេសប្រជាពលរដ្ឋនៅខេត្តប៉ៃលិនជាតំបន់ដែលរងការគំរាមកំហែងដោយសារគ្រាប់មីនបើមានព័ត៌មានមានអីបន្ថែមសូមរាយការណ៍ទៅកម្លាំងសមត្ថកិច្ច ជាពិសេសកម្លាំងនគរបាលជាតិ អាជ្ញាធរមូលដ្ឋាន និងកម្លាំង CMAC នៅទីនោះ ដើម្បីយើងងាយស្រួលឆ្លើយតបតាមសំណូមពររុករកធានាសុវត្ថិភាព»៕
