.jpg)
ជនសង្ស័យពីបទប្លន់ដែលត្រូវបានសមត្ថកិច្ចចាប់ខ្លួន កាលពីថ្ងៃទី១៦ ឧសភា នៅរាជធានីភ្នំពេញ។ រូបថត ប៉ូលិស
ភ្នំពេញៈ នគរបាលព្រហ្មទណ្ឌកម្រិតធ្ងន់រាជធានីភ្នំពេញ កំពុងរៀបចំកសាងសំណុំរឿងបញ្ជូនជនសង្ស័យម្នាក់ដែលសកម្មខាងប្លន់ទៅសាលាដំបូងរាជធានីភ្នំពេញ ក្រោយពីសមត្ថកិច្ចចាប់ខ្លួនបានកាលពីថ្ងៃទី ១៦ ឧសភា នៅភូមិដំណាក់ធំ៣ សង្កាត់ស្ទឹង មានជ័យទី៣ ខណ្ឌមានជ័យ ។
លោក អេង សោភា នាយការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញ ឱ្យដឹងនៅថ្ងៃទី១៧ ឧសភា ថា បុរសសង្ស័យឈ្មោះលី បូរិទ្ធ ដែលពាក់ព័ន្ធបទល្មើសប្លន់ កំពុងត្រូវបានសមត្ថកិច្ចជំនាញរបស់លោករៀបចំសំណុំរឿងដើម្បីបញ្ជូនទៅសាលាដំបូងរាជធានីភ្នំពេញ។
លោកថ្លែងថា៖«ជនសង្ស័យយើងកំពុងតែកសាងសំណុំរឿងតាមនីតិវិធី ដើម្បីបញ្ជូនគាត់ទៅតុលាការរាជធានីភ្នំពេញបន្ត។ ព្រោះអីគាត់មានបទល្មើស៣ករណីហើយយើងបំបែកសំណុំរឿងជា៣ដែរ»។
លោកប្រាប់ថា កាលពីវេលាម៉ោងជាង១២រំលងអធ្រាត្រ ឈានចូលថ្ងៃទី១១ ឧសភា ជនសង្ស័យបានប្រើកាំភ្លើងខ្លីធ្វើសកម្មភាពបាញ់ប្លន់នារីរងគ្រោះម្នាក់ចំនួន២គ្រាប់ តែមិនចំនៅចំណុចមុខផ្ទះលេខ៣៥B ផ្លូវ៤១៨ ភូមិ៤ សង្កាត់ទួលទំពូងទី២ ខណ្ឌចំការមន។ ធ្វើឱ្យនារីរងគ្រោះម្នាក់នោះភ័យសន្លប់ តែមិនយកបានម៉ូតូស្កូបពី ពណ៌ស សេរី២០២២របស់នាងទេដោយសារតែមានអន្តរាគមន៍ពីសមត្ថកិច្ច។
លោកបន្តថា លើកទី២ជនសង្ស័យបានធ្វើសកម្មភាពភ្ជង់ប្លន់ជនរងគ្រោះនៅវេលាម៉ោង២២ និង១០នាទី យប់ថ្ងៃទី១២ ខែ ឧសភា ឆ្នាំ២០២២ នៅក្រុមទី៤២ ភូមិ៥ សង្កាត់បឹងកេងកងទី២ ខណ្ឌបឹងកេងកង ភ្ជង់យកម៉ូតូពីជនរងគ្រោះម៉ាក សេ១២៥ ពណ៌ខ្មៅ ស៊េរី២០១៦ ពាក់ស្លាកលេខ 1-DH4502 និងធុងដឹកជញ្ជូនម៉ាក EGETS ពណ៌ទឹកក្រូច។ លើកទី៣ នៅវេលាម៉ោង៥ និង៤៥នាទីព្រឹកថ្ងៃទី១៥ ខែឧសភា ឆ្នាំ២០២២ ជនសង្ស័យបានភ្ជង់ប្លន់យកម៉ូតូពណ៌ក្រហម១គ្រឿង ពីជនរងគ្រោះ ពាក់ស្លាកលេខHZ0553 ស្ថិតនៅភូមិដំណាក់ធំ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។
បើតាមលោកសោភា បន្ទាប់ពីជនសង្ស័យធ្វើសកម្មភាពទាំង៣លើកមក សមត្ថកិច្ចជំនាញនៅតាមខណ្ឌដែលជនសង្ស័យធ្លាប់ធ្វើសកម្មភាពប្លន់នោះ បានសហការជាមួយកម្លាំងជំនាញព្រហ្មទណ្ឌ នៃស្នងការដ្ឋាននគរបាលរាជធានីភ្នំពេញដែលទទួលបានគោលការណ៍ពីលោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ឱ្យកម្លាំងរបស់លោកបើកការស្រាវជ្រាវឈានតាមចាប់ខ្លួនជនសង្ស័យឈ្មោះលី បូរិទ្ធ នៅចំណុចផ្ទះបិទស្កុតម៉ូតូ ផ្លូវ៣០ម៉ែត នៅភូមិដំណាក់ធំ៣ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។
ទន្ទឹមនឹងការចាប់បានជនសង្ស័យខាងលើ កម្លាំងសមត្ថកិច្ចរបស់ចម្រុះដកហូតបានវត្ថុតាង ដូចជា កាំភ្លើងខ្លី ចំនួន២ដើម ម៉ាក់ k 54 មានគ្រាប់ចំនួន១៤គ្រាប់ អាយកូមចំនួន២គ្រឿង ម៉ូតូម៉ាកអាយខុន ពណ៌សត្រួយចេក ពាក់ស្លាកលេខ AR- 9589 និង ម៉ាកអិចស៊ិចទ័រ ពណ៌ខ្មៅ ពាក់ផ្លាកលេខAV-៨៨៨៨៕
