ភ្នំពេញៈ លោក ញឹប អង្គាបុស្ស នាយកមន្ទីរពេទ្យកុមារជាតិ បានឲ្យដឹងថា រដ្ឋាភិបាល នៃសាធារណរដ្ឋឆែក បានផ្តល់ជំនួយជាសម្ភារឧបករណ៍វេជ្ជសាស្ត្រមានតម្លៃជិត ៤០ ម៉ឺនដុល្លារអាមេរិកជូនដល់មន្ទីរពេទ្យកុមារជាតិ នៅថ្ងៃទី ១៧ ខែឧសភា ដើម្បីបើកដំណើរការផ្នែកសម្ភព និងចូលរួមចូលរួមលើកកម្ពស់សុខុមាលភាពមាតា និងទារកនៅកម្ពុជាឱ្យកាន់តែប្រសើរឡើង។
លោកថ្លែងប្រាប់ ភ្នំពេញ ប៉ុស្តិ៍ នៅថ្ងៃទី ១៧ ខែឧសភាថា ពិធីទទួលសម្ភារវេជ្ជសាស្ត្រទាំងនោះបានធ្វើឡើង នៅថ្ងៃទី ១៧ ខែឧសភា ក្រោមវត្តមានលោក ម៉ម ប៊ុនហេង រដ្ឋមន្ដ្រីក្រសួងសុខាភិបាល និងលោក ម៉ាទីន វ៉ាវរ៉ា ( Martin Vávra) ឯកអគ្គរដ្ឋទូត នៃស្ថានទូតសាធារណរដ្ឋឆែក ប្រចាំព្រះរាជាណាចក្រកម្ពុជា។
លោក ប្រាប់ថា នេះជាលើកទី ៣ ហើយ ដែលមន្ទីរពេទ្យកុមារជាតិ បានទទួលសម្ភារឧបករណ៏វេជ្ជសាស្ត្របន្ថែមពីសាធារណរដ្ឋឆែក។ ការទទួលបានលើកនេះមានសម្ភារចំនួន ២៧ មុខ ស្មើនឹង ១២៤ គ្រឿង គិតជាទឹកប្រាក់ចំនួន ជិត៤០ម៉ឺនដុល្លារសហរដ្ឋអាមេរិក ផ្តល់ឲ្យក្នុងគោលបំណងបើកឲ្យដំណើរការអគារផ្នែកសម្ភពនៃមន្ទីរពេទ្យកុមារជាតិ និងចូលរួមលើកកម្ពស់សុខុមាលភាពមាតានិងទារកនៅកម្ពុជា។
លោក ថ្លែងថា សម្ភារបរិក្ខារពេទ្យលើកទី ១ ដែលសាធារណរដ្ឋឆែកផ្តល់ឲ្យគឺ សរុបជាទឹកប្រាក់ជាង ៣០ ម៉ឺនដុល្លារ បានដាក់ឲ្យដំណើរការនៅផ្នែកជំងឺទារក និងផ្នែកជំងឺធ្ងន់នៅឆ្នាំ ២០២០ រួមជាមួយការបណ្តុះបណ្តាល ពង្រឹងសមត្ថភាពគ្រូពេទ្យ និងគិលានុបដ្ឋាកលើជំនាញព្យាបាលថែទាំជំងឺទារក និងលើកទី ២ ផ្តល់សម្ភារផ្នែកបណ្តុះបណ្តាល ចំនួន ៨ មុខ ស្មើនឹង ៤៩ គ្រឿង រួមនិងសម្ភារសម្រាប់វិជ្ជសាស្ត្រផ្នែកកូវីដ១៩ ដែលសរុបជាទឹកប្រាក់ជិត ៣០ ម៉ឺនផងដែរ។ ការទទួលបាន សម្ភារវេជ្ជសាស្ត្រទំនើបបែបនេះធ្វើឲ្យមានភាពងាយស្រួលក្នុងការទទួលព្យាបាល និងធ្វើឲ្យគុណភាពនៃការព្យាបាលបានកាន់តែល្អប្រសើ។
លោកថ្លែងថា៖«ជាធម្មតាពេលយើងមានសម្ភារវេជ្ជសាស្ត្រទំនើប មានអី អ៊ីចឹងទៅ វាជួយឲ្យគុណភាពនៃ ការព្យាបាលហ្នឹងកាន់តែបានល្អ។ មានសម្ភារហ្នឹងគឺអាចជួយទាំងម្តាយនិងទារកអីសព្វគ្រប់បែបយ៉ាងទាំងអស់។ សម្ភារទំនើបដូចស្រុកគេអ៊ីចឹង គេមានអីយើងមានហ្នឹងដែរបាទ» ។
លោកថា ក្រៅពីជំនួយសម្ភារវេជ្ជសាស្ត្ររដ្ឋាភិបាល នៃសាធារណរដ្ឋឆែក បានជួយបណ្តុះបណ្តាលបុគ្គលិកពេទ្យក្នុងមន្ទីរពេទ្យកុមារជាតិ និងបានផ្តល់វេជ្ជបណ្ឌិតជំនាញនៅផ្នែកសម្ភពម្នាក់មកជួយការងាររយៈពេលមួយឆ្នាំផងដែរ។ គុណភាពនៃគ្រូពេទ្យកម្ពុជានៅមន្ទីរពេទ្យកុមារជាតិកាន់តែមានចំណេះដឹងប្រកបដោយគុណភាពជាងមុន តាមរយៈបានទទួលការសិក្សានៅសាធារណរដ្ឋឆែក ជាក់ស្តែង នៅឆ្នាំ ២០២៣ ខាងមុខនេះ គ្រូពេទ្យជំនាញផ្សេងៗមាន ឆ្មបជាដើម សរុបចំនួនប្រមាណ ២០ នាក់ នឹងចេញទៅសិក្សារៀនសូត្រនៅជំនាញបន្ថែមនៅសាធារណរដ្ឋឆែក។
លោកថា ក្នុងការចូលរួមទទួលសម្ភារវេជ្ជសាស្ត្រនេះ លោក ម៉ម ប៊ុនហេង បានសម្តែងភាពរីករាយ និងបានលើកឡើងពីក្តីសង្ឃឹមថា ធនធានទាំងនេះនឹងជួយដល់មន្ទីរពេទ្យកុមារជាតិឲ្យកាន់តែរឹងមាំ និងមានទំនុកចិត្តខ្លាំងក្នុងការផ្តល់ជូននូវសេវាសុខាភិបាលពេញលេញផ្នែកសម្ភព និងទារក ដែលជួយទាំងស្ត្រីមានផ្ទៃពោះ និងទារកតាំងពីនៅក្នុងផ្ទៃម្តាយ រហូតដល់ប្រសូតចេញ។ ជាមួយគ្នានេះសម្ភារវេជ្ជសាស្ត្រទាំងនេះនឹងចូលរួម ថែទាំព្យាបាលបន្តលើបញ្ហាសុខភាពផ្សេងៗរបស់ទារក និងកុមារ ព្រមទាំងជាមជ្ឈមណ្ឌលបណ្តុះបណ្តាលយ៉ាងសកម្ម ស្របតាមទស្សនវិស័យ និងជំហានអភិវឌ្ឍន៍របស់មន្ទីរពេទ្យកុមារជាតិ៕