.jpg)
លោកនាយករដ្ឋមន្ត្រី ហ៊ុន សែន ថ្លែងកាលពីថ្ងៃម្សិលមិញ។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន មិនអនុញ្ញាតឱ្យមានការលើកលែងការធ្វើចត្តាឡីស័ក ចំពោះអ្នកដែលមិនបានចាក់វ៉ាក់សាំងកូវីដ ១៩ ឡើយ បើទោះបីជានៅតាមប្រទេសនានាជាប់នឹងប្រទេសកម្ពុជាគ្រោងនឹងធ្វើការលើកលែងក៏ដោយដែលវិធានការបែបនេះ ដោយសារលោកមិនចង់ឱ្យស្ថានការណ៍ជំងឺកូវីដដើរថយក្រោយវិញ។
ក្នុងពិធីសំណេះសំណាលជាមួយក្រុមគ្រូពេទ្យស្ម័គ្រចិត្តយុវជន សម្តេចតេជោ (TYDA) នាថ្ងៃទី១៧ ឧសភា នៅសាលពិព័រណ៍ជ្រោយចង្វារ លោក ហ៊ុន សែន លើកឡើងថា រដ្ឋមន្ត្រីក្រសួងទេសចរណ៍ លោក ថោង ខុន បានស្នើឱ្យមានការលើកលែងការធ្វើចត្តាឡីស័កសម្រាប់អ្នកទេសចរដែលមិនបានចាក់វ៉ាក់សាំងកូវីដ ១៩ ប៉ុន្តែលោកមិនអនុញ្ញាតឡើយ។
លោកបញ្ជាក់ថា៖ «សម្រាប់ខ្ញុំ ខ្ញុំមិនយល់ព្រមទេ ផ្នែកឯកទេសថា យ៉ាងម៉េចថាចុះ។ ហេតុអី? យើងកំពុងតែនាំគ្នាជំរុញឱ្យមានការចាក់វ៉ាក់សាំងបែរជាចង់លើកលែងឱ្យអ្នកដែលមិនបានចាក់វ៉ាក់សាំង។ អ៊ីចឹង! តើមានអ្នកណាចង់ចាក់វ៉ាក់សាំង ហើយវាក៏ជះឥទ្ធិពលទៅលើប្រទេសនានា ដែលគេកំពុងតែជំរុញឱ្យមានការចាក់វ៉ាក់សាំងផងដែរ»។
ប្រទេសកម្ពុជាទទួលបានតែអ្នកចាក់វ៉ាក់សាំងកូវីដ ១៩ រួចរាល់ទេ ប្រសិនបើអ្នកដំណើរដែលចូលមកកម្ពុជាដោយមិនទាន់បានចាក់វ៉ាក់សាំង គឺត្រូវដាក់ឱ្យធ្វើចត្តាឡីស័ករយៈពេល ៧ ថ្ងៃ។ នេះបើតាមការលើកឡើងរបស់ប្រមុខរាជរដ្ឋាភិបាលកម្ពុជា។
លោកនាយករដ្ឋមន្ត្រីថ្លែងថា៖ «នៅពេលដែលយើងលើកលែងការធ្វើចត្តាឡីស័ក អ្នកទេសចរបរទេស ដែលមិនបានចាក់វ៉ាក់សាំង គឺនឹងតម្រង់ទិសមកកាន់ស្រុកខ្មែរតែម្តង។ អ៊ីចឹង! សូមកុំយកលុយជាធំ ត្រូវយកជីវិតជាធំ ហើយខ្ញុំមិនអាចឱ្យសភាពការណ៍នេះដើរថយក្រោយនោះទេ»។
កាលពីខែមេសា រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានប្រកាស កែសម្រួលលក្ខខណ្ឌធ្វើចត្តាឡីស័ក សម្រាប់អ្នកដំណើរបរទេសដែលមិនទាន់បានចាក់វ៉ាក់សាំង ហើយចូលមកកម្ពុជា ដោយបន្ថយថ្ងៃធ្វើចត្តាឡីស័កពី ១៤ ថ្ងៃ មកត្រឹមតែ ៧ ថ្ងៃប៉ុណ្ណោះ។
លោករដ្ឋមន្ត្រីបញ្ជាក់ថា អ្នកដំណើរមកពីបរទេសចូលតាមផ្លូវអាកាសត្រូវធ្វើតេស្តរហ័សនៅថ្ងៃទី ៧ ដើម្បីបញ្ចប់ការធ្វើចត្តាឡីស័ក ហើយអ្នកដំណើរមកពីបរទេសតាមព្រំដែនគោក ត្រូវធ្វើតេស្តរហ័សចំនួន ២ លើក។ លើកទី ១ នៅថ្ងៃទី ១ មុនពេលចូលមណ្ឌលចត្តាឡីស័ក និងលើកទី ២ នៅថ្ងៃទី ៧ ដើម្បីបញ្ចប់ការធ្វើចត្តាឡីស័ក។
សម្រាប់ប្រទេសកម្ពុជា ប្រតិបត្តិការប្រយុទ្ធប្រឆាំងការរាតត្បាតជំងឺកូវីដ ១៩ លោកនាយករដ្ឋមន្ត្រីបានដាក់ចេញវិធីសាស្ត្រ ៤ ដំណាក់កាល រួមមាន ដំណាក់កាលទី ១ ការទប់ស្កាត់ការឆ្លងចូលក្នុងសហគមន៍ចាប់ពីខែមីនា ឆ្នាំ ២០២០ ដល់ខែតុលា ឆ្នាំ ២០២១។ ដំណាក់កាលទី ២ ការគ្រប់គ្រងការឆ្លងកូវីដក្នុងសហគមន៍ចាប់ពីខែវិច្ឆិកា ឆ្នាំ ២០២០ ដល់ថ្ងៃទី ២០ ខែកុម្ភៈ ឆ្នាំ ២០២១។
ដំណាក់កាលទី ៣ គឺការបង្កើតភាពស៊ាំក្នុងសហគមន៍តាមយុទ្ធសាស្ត្រជាតិចាក់វ៉ាក់សាំងចាប់ពីថ្ងៃទី ២០ ខែកុម្ភៈ ដល់ខែតុលា ២០២១ និងដំណាក់កាលទី ៤ គឺការបើកដំណើរការប្រទេសពេញលេញ និងរស់នៅជាមួយកូវីដ ១៩ តាមគន្លងថ្មី។
ទាក់ទងនឹងវ៉ាក់សាំងកូវីដ ១៩ កម្ពុជាទទួលបានវ៉ាក់សាំងចំនួន ៥២ លានដូស ហើយបានប្រើប្រាស់អស់ជាង ៤២ លានដូស និងនៅសល់ក្នុងឃ្លាំងជិត ១០ លានដូស។ ចំណែក វ៉ាក់សាំង ដែលមិនទាន់ដឹកមកដល់គឺនៅសល់ប្រមាណ ២០,៥ លានដូស ដែលក្នុងនោះមានពីប្រទេសចិន ១៥ លានដូសពីសហរដ្ឋអាមេរិក ៥,៥ លានដូស។
លោក ហ៊ុន សែន មានប្រសាសន៍ថា៖ «អ្វីដែលខ្ញុំមានមោទនភាព វ៉ាក់សាំង ៥២ លានដូសដែលបានមកដល់ទាំងមុន និងក្រោយ គឺកម្ពុជាបានចំណាយលុយខ្លួនឯងទិញវ៉ាក់សាំងចំនួន ២៨,៥ លានដូស។ កម្ពុជាមានសមត្ថភាពដើម្បីចាក់ជូនប្រជាពលរដ្ឋរបស់ខ្លួន។ ប្រទេសយើងក្រ តែមិនបណ្តោយឱ្យប្រជាពលរដ្ឋខ្វះថ្នាំ ដែលយើងអាចរកទិញបាននោះទេ»។
ជាមួយគ្នានេះ លោក ហ៊ុន សែន ក៏បានស្នើឱ្យក្រសួងសុខាភិបាលត្រូវជំរុញដល់វិស័យឯកជនដែលទទួលបានសិទ្ធិក្នុងការបង្កើតរោងចក្រផលិតវ៉ាក់សាំង ក៏ត្រូវដំណើរការផលិតវ៉ាក់សាំងផងដែរ។
លោកថ្លែងថា៖ «ក្រសួងត្រូវពិនិត្យមើលទៅលើក្រុមហ៊ុន ដែលទទួលបានអាជ្ញាប័ណ្ណក្នុងការផលិតវ៉ាក់សាំង ថាតើ ធ្វើឬមិនធ្វើ។ បើមិនធ្វើ ត្រូវដកយកមកវិញ ដោយសារខាងភាគីចិនថា ខាងកម្ពុជាយើងមានការយឺតយ៉ាវមិនមានធ្វើអី»។
លោក ហ៊ុន សែន បានបញ្ជាឱ្យលោក ម៉ម ប៊ុនហេង ត្រូវរាយការណ៍ជូនលោកក្នុង ១ អាទិត្យម្តងស្តីពីវឌ្ឍនភាពនៃរោងចក្រផលិតវ៉ាក់សាំង។ ប្រសិនបើខាងវិស័យឯកជនមិនអាចធ្វើបានទេ លោកនឹងបញ្ចេញទុនសម្រាប់រដ្ឋជាអ្នកផលិតវ៉ាក់សាំងដោយខ្លួនឯង ដោយសហការជាមួយនឹងដៃគូប្រទេសចិនតែម្តង។
គួរបញ្ជាក់ថា សមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) ត្រូវបានបង្កើតឡើងកាលពីថ្ងៃទី ១៧ ខែធ្នូ ឆ្នាំ ២០១២ ក្រោមការផ្តួចផ្តើមគំនិតផ្ទាល់របស់លោកនាយករដ្ឋមន្ត្រី ហ៊ុន សែន។ សមាគមគ្រូពេទ្យធីតាដឹកនាំផ្ទាល់ដោយលោក ហ៊ុន ម៉ាណែត និងលោកស្រី ពេជ ចន្ទមុន្នី ក្នុងគោលបំណងផ្តល់សេវាព្យាបាលដល់ប្រជាពលរដ្ឋក្រីក្រនានាទូទាំងប្រទេស ដោយមិនប្រកាន់និន្នាការនយោបាយ។
បច្ចុប្បន្នក្រុមគ្រូពេទ្យមកពីសមាគមគ្រូពេទ្យស្ម័គ្រចិត្តយុវជនសម្តេចតេជោបានព្យាបាលជូនប្រជាពលរដ្ឋក្រីក្រនៅទូទាំងប្រទេសបានជាង ៣៣ ម៉ឺននាក់។ ក្នុងនោះអ្នកជំងឺធ្ងន់ជាង ៦ ពាន់នាក់ត្រូវបានបញ្ជូនទៅព្យាបាលនៅរាជធានី-ភ្នំពេញ និងជាមួយដៃគូសហការនានា។ ក្នុងចំណោមអ្នកជំងឺធ្ងន់ ក៏មានអ្នកជំងឺបេះដូងធ្ងន់ធ្ងរ ៥៦ នាក់ផងដែរ។
ក្នុងពេលកម្ពុជាទទួលរងនូវការរាតត្បាតនៃជំងឺកូវីដ ១៩ ក្រុមគ្រូពេទ្យនៃសមាគមគ្រូពេទ្យស្ម័គ្រចិត្តយុវជនសម្តេចតេជោជិត ៨០០ នាក់ បានស្ម័គ្រចិត្តចូលរួមក្នុងសកម្មភាពប្រយុទ្ធប្រឆាំងនឹងជំងឺកូវីដ ១៩ ជាមួយរាជរដ្ឋាភិបាលដោយឥតរួញរាផងដែរ៕
វីដេអូ៖
