ភ្នំពេញៈ មន្ត្រីជាន់ខ្ពស់ក្រសួងសុខាភិបាលបានអំពាវនាវ និងណែនាំទៅដល់មន្ត្រីសុខាភិបាលត្រូវយកចិត្តទុកដាក់ពិនិត្យ និងព្យាបាលជំងឺដល់ប្រជាពលរដ្ឋដែលមានបញ្ហាសុខភាពប្រកបដោយក្រមសីលធម៌ វិជ្ជាជីវៈ និងសមធម៌ ដោយមិនប្រកាន់និន្នាការនយោបាយ ប្រកបដោយការទទួលខុសត្រូវតាមវិជ្ជាជីវៈ។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានថ្លែងដូចនេះនៅថ្ងៃទី ១៨ ខែឧសភា ក្នុងពិធីសម្ពោធដាក់ឱ្យប្រើប្រាស់នូវអគារសម្ភព និងថែទាំទារកនៃមន្ទីរពេទ្យបង្អែកខេត្តបាត់ដំបង ក្រោមជំនួយរបស់សាធារណរដ្ឋកូរ៉េ តាមរយៈមូលនិធិកូរ៉េសម្រាប់ការថែទាំសុខភាពអន្តរជាតិ (KOFIH)។
លោកថា ការផ្តល់ជំនួយជាអគារនេះពីសាធារណរដ្ឋកូរ៉េមកដល់ប្រជាពលរដ្ឋក្នុងខេត្តបាត់ដំបងនេះ ពិតជាមានសារៈសំខាន់ខ្លាំងណាស់ ដោយសារអគារនេះបានបំពាក់នូវឧបករណ៍បរិក្ខារទំនើបៗមានវិសាលភាពទូលំទូលាយជាងមុន និងអាចឆ្លើយតបទៅនឹងតម្រូវការចាំបាច់សម្រាប់ប្រជាជនផងដែរ។
លោក ម៉ម ប៊ុនហេង មានប្រសាសន៍ថា៖ «ខ្ញុំសុំស្នើឱ្យមន្ត្រីសុខាភិបាលទាំងអស់ត្រូវបន្តយកចិត្តទុកដាក់ពិនិត្យ និងព្យាបាលជំងឺដល់ប្រជាពលរដ្ឋដែលមានបញ្ហាសុខភាពប្រកបដោយក្រមសីលធម៌វិជ្ជាជីវៈ និងសមធម៌ ដោយមិនប្រកាន់និន្នាការនយោបាយ ពូជសាសន៍ ពណ៌សម្បុរ និងត្រូវមានចិត្តសប្បុស ប្រកបដោយការទទួលខុសត្រូវតាមវិជ្ជាជីវៈ»។
លោកបានបន្តថា ជាពិសេសត្រូវយកចិត្តទុកដាក់ចំពោះអ្នកមានជីវភាពក្រីក្រ ចាស់ជរា ស្ត្រី កុមារ និងទុរគតជន ដែលមានការលំបាក និងត្រូវការឱ្យក្រុមគ្រូពេទ្យជួយ។
រាជរដ្ឋាភិបាលកម្ពុជាតែងតែខិតខំប្រឹងប្រែងយកចិត្តទុកដាក់ដល់ប្រជាពលរដ្ឋដោយបង្ខិតសេវាឱ្យទៅនៅជិតប្រជាពលរដ្ឋ ជាពិសេសសេវាសុខាភិបាល និងរដ្ឋបាលសាធារណៈដោយបង្កើតជាមណ្ឌលសុខភាព មន្ទីរពេទ្យថ្មីៗបន្ថែម និងការកែលម្អហេដ្ឋារចនាសម្ព័ន្ធសុខាភិបាលផងដែរ។ នេះបើតាមការបន្ថែមរបស់លោក ម៉ម ប៊ុនហេង។
លោករដ្ឋមន្ត្រីបានបញ្ជាក់ថា៖ «អគារសម្ភព និងថែទាំទារកនេះនឹងប្រើប្រាស់ប្រកបដោយប្រសិទ្ធភាព និងជួយដល់ប្រជាពលរដ្ឋចៀសវាងនូវការព្យាបាលដោយមិនសមស្របតាមច្បាប់ និងមិនមានការទទួលស្គាល់ពីអាជ្ញាធរសុខាភិបាល។ ខ្ញុំមិនចង់ឮមិនចង់ឃើញស្ត្រីមានផ្ទៃពោះមានបញ្ហាគ្រោះថ្នាក់ ឬបាត់បង់ជីវិត ដោយសារមិនបានទទួលសេវាពិនិត្យព្យាបាលឱ្យបានសមស្រប និងទាន់ពេលវេលានោះឡើយ»។
លោក ផាក ឃឿងយ៉ុង (Park Heung-Kyeong) ឯកអគ្គរដ្ឋទូតនៃសាធារណរដ្ឋកូរ៉េប្រចាំកម្ពុជាបានថ្លែងនាឱកាសនោះដែរថា ក្រសួងសុខាភិបាលកម្ពុជា និងមូលនិធិកូរ៉េសម្រាប់ការថែទាំសុខភាពអន្តរជាតិ (KOFIH) បានធ្វើកិច្ចសហប្រតិបត្តិការអស់រយៈកាលជាង ១ ទសវត្សរ៍កន្លងទៅនេះលើការអនុវត្តសមាហរណកម្មថែទាំសុខភាពមាតា ទារក និងកុមារនៅក្នុងភូមិភាគពាយព្យ ជាអាទិ៍មាន ខេត្តបាត់ដំបង ពោធិ៍សាត់ និងខេត្តប៉ៃលិន។
លោកបានបន្តថា ប្រជាពលរដ្ឋប្រមាណជា ១,៧ លាននាក់នៅក្នុងភូមិភាគនេះដែលអាចទទួលបានអត្ថប្រយោជន៍ពីកម្មវិធីនេះ ក្នុងនោះក៏មានស្ត្រី និងទារកទើបនឹងកើតផងដែរ។
លោក ផាក ឃឿងយ៉ុង បានបញ្ជាក់ថា៖ «តាមរយៈការផ្តួចផ្តើមនេះ យើងបានមើលឃើញនូវវឌ្ឍនភាពប្រសើរឡើងជាលំដាប់ជារួមមានម្តាយជាច្រើនសម្រាលកូនប្រកបដោយសុវត្ថិភាព និងមានទារកដែលទើបនឹងកើតក៏ទទួលបាននូវការថែទាំសមស្រប និងទាន់ពេលវេលានៅក្នុងភូមិភាគនេះ»។
ឯកអគ្គរដ្ឋទូតនៃសាធារណរដ្ឋកូរ៉េប្រចាំកម្ពុជាបានបន្ថែមថា អគារនេះគឺជាផ្នែកមួយដែលមានសារៈសំខាន់ក្នុងការផ្តល់សេវាឱ្យកាន់តែប្រសើរ ប្រកបដោយគុណភាពដល់មាតា និងទារក ជាច្រើននាក់។
អគារសម្ភព និងថែទាំទារកនៃមន្ទីរពេទ្យបង្អែកខេត្តបាត់ដំបងនេះមានកម្ពស់ ២ ជាន់ ដោយមានលទ្ធភាពដាក់គ្រែបានរហូតដល់ ៧០ គ្រែ ដោយមានបែងចែកនូវសេវាសំខាន់ៗរួមមាន ផ្នែកទារកសង្គ្រោះទើបនឹងកើត បន្ទប់វះកាត់ចំនួន ២ បន្ទប់ បន្ទប់សម្រាប់សម្រាលកូន ២ បន្ទប់ និងបន្ទប់អ្នកជំងឺចំនួន ៥ បន្ទប់៕