ភ្នំពេញៈ គណៈកម្មការចំពោះកិច្ចចាក់វ៉ាក់សាំងកូវីដ ១៩ នៃក្រសួងសុខាភិបាលបានប្រកាសផ្អាកការចាក់វ៉ាក់សាំងកូវីដ ១៩ នៅទូទាំងប្រទេសរយៈពេល ៣ ថ្ងៃ នៅដើមខែក្រោយ ដើម្បីសម្រួលដល់ប្រជាពលរដ្ឋ និងក្រុមការងារចាក់វ៉ាក់សាំងទាំងអស់ឱ្យទៅចូលរួមបោះឆ្នោតជ្រើសរើសក្រុមប្រឹក្សាឃុំសង្កាត់ដែលត្រូវប្រព្រឹត្តទៅនៅថ្ងៃទី ៥ ខែមិថុនា ខាងមុខនេះ។
លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក-១៩) បានឱ្យដឹងកាលពីថ្ងៃទី ១៦ ខែឧសភា ថា ការចាក់វ៉ាក់សាំងនឹងផ្អាកជាបណ្តោះអាសន្នចំនួន ៣ ថ្ងៃក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ ដែលប្រព្រឹត្តឡើងនៅថ្ងៃទី ៥ ខែមិថុនា ឆ្នាំ ២០២២។
លោកស្រីបានលើកឡើងតាមរយៈសេចក្តីជូនដំណឹងថា៖ «ការងារចាក់វ៉ាក់សាំងកូវីដ ១៩ នៅទូទាំងប្រទេសត្រូវបានផ្អាកជាបណ្តោះអាសន្នចំនួន ៣ ថ្ងៃ ចាប់ពីថ្ងៃទី ៤ ដល់ថ្ងៃទី ៦ ខែមិថុនា ដើម្បីសម្រួលដល់ប្រជាពលរដ្ឋ និងក្រុមការងារចាក់វ៉ាក់សាំងទាំងអស់អាចធ្វើដំណើរទៅចូលរួមក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅមូលដ្ឋានរបស់ខ្លួនរៀងៗខ្លួន»។
លោកស្រី ឱ វណ្ណឌីន បានបន្ថែមថា ការចាក់វ៉ាក់សាំងកូវីដ-១៩ ដល់ប្រជាជននឹងដំណើរការជាប្រក្រតីឡើងវិញចាប់ពីថ្ងៃទី ៧ ខែមិថុនា ដោយក្រុមការងារត្រូវរៀបចំឱ្យបានរួចរាល់ ដើម្បីធានាបានថាប្រជាជនអាចមកចាក់វ៉ាក់សាំងវិញនេះ។
យោងតាមរបាយកាណ៍របស់ក្រសួងសុខាភិបាលគិតត្រឹមយប់ថ្ងៃទី ១៧ ខែឧសភា អត្រាចាក់វ៉ាក់សាំងការពារកូវីដ ១៩ ដល់មន្ត្រីរាជការ ប្រជាពលរដ្ឋ និងកងកម្លាំងប្រដាប់អាវុធនៅទូទាំងប្រទេសសរុបបានចំនួនជាង ១៥ លាននាក់ ឬស្មើនឹង ៩៣,៨១ ភាគរយ។
របាយការណ៍ដដែលបានបន្តថា ពលរដ្ឋដែលមានអាយុ ១៨ ឆ្នាំឡើងចាក់វ៉ាក់សាំងបានចំនួនជាង ១០ លាននាក់, អាយុ ១២ ដល់ ១៨ ឆ្នាំចាក់បានចំនួនជាង ១,៨ លាននាក់, អាយុ ៦ ដល់ ១២ ឆ្នាំ ចាក់បានចំនួនជាង ២ លាននាក់, អាយុ ៥ ឆ្នាំចាក់បានចំនួនជាង ៤០ ម៉ឺននាក់ និងអាយុ ៣ ឆ្នាំដល់ក្រោម ៥ ឆ្នាំ ចាក់បានចំនួនជិត ៤០ ម៉ឺននាក់។
ជាមួយគ្នានោះដែរ សម្រាប់អ្នកដែលបានចាក់ដូសទី ៣ មានចំនួនជាង ៩ លាននាក់ និងអ្នកបានចាក់ដូសទី ៤ មានជាង ២ លាននាក់ផងដែរ។
ទាក់ទងនឹងការចាក់វ៉ាក់សាំងនេះដែរ លោកនាយករដ្ឋមន្ត្រី ហ៊ុន សែន បានថ្លែងក្នុងពិធីសំណេះសំណាលជាមួយក្រុមគ្រូពេទ្យស្ម័គ្រចិត្តយុវជនសម្តេចតេជោ (TYDA) នៅសាលពិព័រណ៍ជ្រោយចង្វារ កាលពីថ្ងៃទី ១៧ ឧសភាថា ការចាក់វ៉ាក់សាំងកូវីដ ១៩ នៅកម្ពុជាមិនមានយកប្រាក់នោះឡើយ បើទោះបីជាត្រូវចាក់ដល់ដូសទី ១០ ឬដូសទី ២០ ក៏ដោយ។
លោកមានប្រសាសន៍ថា៖ «បងប្អូនខ្លះគាត់ឱ្យយោបល់ខ្ញុំថាចាក់ដូសទី ១ ទី ២ មិនយកថ្លៃ ឥឡូវចាក់ដូសទី ៣ គួរតែយកថ្លៃ ខ្ញុំបានប្រាប់ទៅវិញ ខ្ញុំថា អត់ទេ យកមកក៏មិនក្លាយទៅជាអ្នកមានបានដែរ។ ថវិការបស់យើងក្តី ជំនួយក្តី ចាក់ជូនដោយឥតគិតថ្លៃ ហើយក៏គ្មានការរើសអើងណាមួយដែរ ទាំងបញ្ហានយោបាយ ទាំងជាតិសាសន៍ ទាំងសាសនាទាំងតំបន់ទីក្រុង តំបន់ជនបទទទួលបានដូចៗគ្នា»។
លោក ហ៊ុន សែន បានបន្តទៀតថា៖ «ត្រូវធានាបើទោះបីជាដូសទី ១០ ឬដូសទី ២០ ក៏នៅតែមិនយកលុយដែរ ពេលវេលានេះមិនមែនជាពេលវេលាយកលុយពីប្រជាជននោះទេ គឺជាពេលវេលាជួយប្រជាជន»។
ដោយឡែក ស្ថានភាពនៃការឆ្លងមេរោគកូវីដ ១៩ នៅក្នុងកម្ពុជាក្នុងរយៈពេល ១១ ថ្ងៃជាប់គ្នានេះ កម្ពុជាមិនមានរកឃើញអ្នកឆ្លងមេរោគនេះឡើយ ហើយអ្នកជំងឺដែលនៅសល់នៅទូទាំងប្រទេសមានចំនួនតែ ៨ នាក់ទៀតប៉ុណ្ណោះ។
យោងតាមរបាយការណ៍របស់ក្រសួងសុខាភិបាលគិតត្រឹមថ្ងៃទី ១៧ ខែឧសភា បានឱ្យដឹងថា កម្ពុជាមានអ្នកឆ្លងវីរុសកូវីដ ១៩ សរុបទូទាំងប្រទេសចំនួន ១៣៦ ២៦២ នាក់ អ្នកជាសះស្បើយ សរុបចំនួន ១៣៣ ១៩៨ នាក់ និងអ្នកស្លាប់មានចំនួន ៣ ០៥៦ នាក់។
លោក ហ៊ុន សែន បានលើកឡើងថា ជោគជ័យរបស់ប្រទេសកម្ពុជាក្នុងការប្រយុទ្ធប្រឆាំងនឹងជំងឺកូវីដ ១៩ រហូតដល់ដំណើរការបើកប្រទេសឡើងវិញ និងគ្មានអត្រាឆ្លងនាពេលនេះ មិនមែនជារឿងចៃដន្យនោះទេ។
លោកមានប្រសាសន៍ថា៖ «មកដល់ពេលនេះ មិនមែនជាការចៃដន្យទេនៃជោគជ័យដែលយើងបានយកឈ្នះកូវីដ គ្រាន់តែប៉ុណ្ណោះអាចផ្ដល់នូវសញ្ញាដឹងថា ហ៊ុន សែន មិនដែលខ្វះការគិតអំពីសេណារីយោច្រើនបែបនោះទេ»៕