ភ្នំពេញៈ តុលាការ​កំពូល​នៅ​ថ្ងៃទី​ ១៨ ​ឧសភា​បាន​ប្រកាស​សាលដីកា​កំបាំងមុខ​បុរស​ជាប់ចោទ​ម្នាក់ ដោយ​ច្រានចោល​សាលដីកា​សាលាឧទ្ធរណ៍​ខេត្ត​ព្រះសីហនុ​ និង​បង្គាប់​ឱ្យ​ជម្រះ​ឡើងវិញ​នូវ​សំណុំរឿង​សម្លាប់​នារី​ម្នាក់ ដោយ​អះអាង​ថា ការចោទប្រកាន់​គ្មាន​សំអាង​ហេតុ​ច្បាស់លាស់ បន្ទាប់ពី​ឧទ្ធរណ៍​បន្ថយទោស​មក​ឃុំខ្លួន​ដាក់ពន្ធនាគារ​ត្រឹម​ ១០ ​ឆ្នាំ ។

លោក​ចៅក្រម គង់ ស្រ៊ីម បាន​អាន​សាលដីកា​កំបាំងមុខ​ជនជាប់ចោទ​ក្នុង​បន្ទប់​សវនាការ​នៅ​ថ្ងៃទី​ ១៨ ឧសភា ថា ក្រោយពី​បាន​ស្តាប់​ការសន្និដ្ឋាន​របស់​មេធាវី​ការពារ​សិទ្ធិ​ឱ្យ​ជនជាប់ចោទ និង​ក្រោយពី​បាន​ស្តាប់​សេចក្តី​សន្និដ្ឋាន​របស់​តំណាង​មហាអយ្យការ​ដែល​បាន​បើកសវនាការ​ជំនុំជម្រះ​កាលពី​ថ្ងៃទី​ ១១ ឧសភា មក​ក្រុមប្រឹក្សា​ជំនុំជម្រះ​តុលាការ​កំពូល​យល់ឃើញ​ថា តាម​អង្គហេតុ​បាន​បង្ហាញថា ជនជាប់ចោទ​ឈ្មោះ​ សួង ភិន អាយុ ៣០ ​ឆ្នាំ បាន​សម្លាប់​ស្ត្រី​រងគ្រោះ​ជា​សង្សារ​កាលពី​ថ្ងៃទី​ ១៨ កក្កដា ឆ្នាំ​ ២០១៩ នៅ​ក្រុមទី​ ១១ ភូមិ​ ៣ សង្កាត់ ​៣ ក្រុងព្រះសីហនុ​។ ប៉ុន្តែ​តាម​ចម្លើយ​របស់​ជនជាប់ចោទ​ និង​យោងតាម​ការបំភ្លឺ​ពី​សាក្សី​ថា ជន​ជាប់ចោទ​បាន​ចេញពី​ខេត្ត​ព្រះសីហនុ​មក​រាជធានី​ភ្នំពេញ​តាំងពី​ថ្ងៃទី ​៧ ខែកក្កដា​ឆ្នាំ​ ២០១៩ មក​ម្ល៉េះ​។

លោក​ចៅក្រម​បន្តថា​៖ «​សាលាដំបូង​ខេត្ត​ព្រះសីហនុ និង​សាលាឧទ្ធរណ៍​ព្រះសីហនុ​លើក​យកតែ​សំអាង​ហេតុ តែ​មិនបាន​វាយតម្លៃ​ចំពោះ​ចម្លើយ​ណា​ជា​ចម្លើយ​ដាក់បន្ទុក និង​ចម្លើយ​ណា​ជា​ចម្លើយ​ដោះ​បន្ទុក ដើម្បី​កំណត់ថា ជនជាប់ចោទ​មាន​ពិរុទ្ធភាព​ទេ​»​។

លោក​បង្ហាញថា ការចោទប្រកាន់​របស់​សាលាឧទ្ធរណ៍​ខេត្ត​ព្រះសីហនុ​គ្មាន​មូលដ្ឋាន​គ្រប់គ្រាន់​សម្រាប់​ចោទប្រកាន់​ជនជាប់ចោទ​ទេ ហើយ​ការ​ចោទ​នោះ​ប្រហែល​ជា​តុលាការ​សំអាង​តែ​ទៅលើ​ចម្លើយ​របស់​សាក្សី​ដែល​បានឃើញ​រូប​ជនជាប់ចោទ​ក្នុង​ទូរស័ព្ទ​របស់​នារី​រង​គ្រោះ​ប៉ុណ្ណោះ​។ ​តាម​ចម្លើយ​សាក្សី​ថា ឃើញ​រូបថត​នារី​រងគ្រោះ​កៀកក​ជាមួយ​ជនជាប់ចោទ ហើយ​តាម​អង្គហេតុ នារី​រងគ្រោះ​បាន​បាត់​ខ្លួន​នៅ​ចន្លោះ ថ្ងៃទី​ ១០-១១ ឆ្នាំ​ ២០១៩​។

លោក​ថ្លែង​ក្នុង​បន្ទប់​សវនាការ​នៅ​ថ្ងៃទី​ ១៨ ឧសភា ថា​៖ «​សាលដីកា​របស់​សាលាឧទ្ធរណ៍​ខេត្ត​ព្រះសីហនុ ចុះ​ថ្ងៃទី​ ២២ កញ្ញា ឆ្នាំ​ ២០២១ មិន​ត្រឹមត្រូវ​តាមច្បាប់​ និង​ត្រូវបញ្ជូន​សំណុំ​រឿងនេះ​ទៅ​សាលាឧទ្ធរណ៍​ខេត្ត​ព្រះសីហនុ​ជម្រះ​ឡើងវិញ​»​។

គួររំឭកថា កាលពី​ថ្ងៃ​ជំនុំជម្រះ​ទី​ ១១ ឧសភា ជនជាប់ចោទ​ឈ្មោះ សួង ភិន បាន​ឆ្លើយ​ប្រាប់​ចៅក្រម​ក្នុង​បន្ទប់​សវនាការ​តុលាការ​កំពូល​ថា គាត់​ធ្វើជា​កម្មករ​សំណង់​នៅ​ក្រុងព្រះសីហនុ ហើយ​បាន​ស្គាល់​នារី​រងគ្រោះ​ឈ្មោះ ឈឺន ចាន់រដ្ឋ អាយុ​ ២៩ ​ឆ្នាំ តាមរយៈ​ប្អូនស្រី​គាត់​។ បន្ទាប់មក​គាត់ និង​នាង​បាន​ស្រឡាញ់គ្នា​ និង​មាន​គម្រោង​ចូល​ស្តីដណ្តឹង​ធ្វើជា​ប្រពន្ធ​ផង​។

លោក ​សួង ភិន ប្រាប់​តុលាការ​បន្តថា​៖ «​ប៉ុន្តែ​ខ្ញុំ​ចេញមក​រាជធានី​ភ្នំពេញ​នៅ​ថ្ងៃ​​ទី​ ៧ ខែកក្កដា ឆ្នាំ​ ២០១៩ បំណង​ធ្វើជា​កម្មករសំណង់​នៅ​បុរី​ប៉េងហួត​បឹងស្នោ​។

តែ​ក្រោយមក​ ៣​ ខែ ប៉ូលិស​ខេត្ត​ព្រះសីហនុ​ហៅ​ខ្ញុំ​សាកសួរ​ហើយ​ចាប់ខ្លួន​ខ្ញុំ​តែម្តង​។ ​ខ្ញុំ​ពិតជា​មិនបាន​សម្លាប់​នាង​ទេ​»​។

តាម​អង្គហេតុ​របស់​តុលាការ​កំពូល​បង្ហាញថា ជនជាប់ចោទ​ត្រូវបាន​សមត្ថកិច្ច​ខេត្ត​ព្រះសីហនុ​ចាប់ខ្លួន​ពីថ្ងៃ​ទី​ ៩​ តុលា ឆ្នាំ​ ២០១៩​។ ជនជាប់ចោទ​ត្រូវ​បាន​សាលាដំបូង​ខេត្ត​ព្រះសីហនុ​បើក​​សវនាការ​ និង​ប្រកាស​សាលក្រម​នៅ​ថ្ងៃទី​ ១៣ តុលា ឆ្នាំ​ ២០២០ ចោទ​បទ​ឃាតកម្ម​ និង​ផ្តន្ទាទោស​ដាក់ពន្ធនាគារ​ ១២ ​ឆ្នាំ​ និង​បង្គាប់​ឱ្យ​សង​ទៅ​គ្រួសារ​នារី​រងគ្រោះ ​៤០ ​លាន​រៀល​។ ​ក៏ប៉ុន្តែ​ដោយ​មិន​សុខ​ចិត្តនឹង​សាលក្រម​នេះ ជន​ជាប់ចោទ​បាន​ប្តឹង​ឧទ្ធរណ៍​នៅ​ខេត្ត​ព្រះសីហនុ​ហើយ​ត្រូវបាន​សាលាឧទ្ធរណ៍​ខេត្ត​បើក​​សវនាការ និង​ប្រកាស​សាលដីកា​នៅ​ថ្ងៃទី​ ២២ កញ្ញា ឆ្នាំ​ ២០២១ សម្រេច​បន្ថយទោស​មក​នៅ​ ១០​ ឆ្នាំ​វិញ រីឯ​សំណង​នៅ​ដដែល​៕