.jpg)
ជនសង្ស័យទាំង ៣ នាក់ពេលត្រូវបានចាប់ខ្លួន។ រូបថត កងរាជអាវុធហត្ថ
បន្ទាយមានជ័យៈ កម្លាំងកងរាជអាវុធហត្ថខេត្តបន្ទាយមានជ័យនៅថ្ងៃទី ១៨ ខែឧសភាបានបញ្ជូនបុរស ៣ នាក់ទៅសាលាដំបូងខេត្ត ក្រោយពីចាប់ខ្លួនបាន ៣ ថ្ងៃ ពាក់ព័ន្ធនឹងការបន្លំស្លាកសញ្ញាសហព័ន្ធកីឡាបាល់ទាត់កម្ពុជាដាក់លើខោអាវកីឡាលក់នៅក្រុងប៉ោយប៉ែត ខេត្តបន្ទាយមានជ័យ។
លោក ព្រហ្ម ថេង ប្រធានមន្ទីរស្រាវជ្រាវ និងបង្ក្រាបបទល្មើសនៃបញ្ជាការដ្ឋានកងរាជអាវុធហត្ថខេត្តបន្ទាយមានជ័យបានឱ្យដឹងនៅថ្ងៃទី ១៨ ឧសភា ថា ជនសង្ស័យទី ១- ឈ្មោះ សុខ ចាន់ថន ហៅ ម៉ាប់ ភេទប្រុស អាយុ ៣៧ ឆ្នាំ ទី ២- ឈ្មោះ សេង ប៊ុនធី ភេទប្រុស អាយុ ៣៥ ឆ្នាំ និងឈ្មោះ ស្រ៊ី ហុងអ៊ូ ភេទប្រុស អាយុ ២៩ ឆ្នាំ។ ពួកគេត្រូវបានសមត្ថកិច្ចជំនាញរបស់លោកកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យនៅថ្ងៃទី ១៨ ឧសភា។
លោកបានប្រាប់ថា៖ «ករណីនេះ កម្លាំងយើងបានបញ្ជូនជនសង្ស័យទាំង ៣ នាក់នោះដល់តុលាការខេត្តនៅព្រឹកមិញនេះ (ថ្ងៃទី ១៨ ឧសភា)។ តែខ្ញុំមិនទាន់ដឹងថាតំណាងអយ្យការចោទប្រកាន់ឬនៅទេ»។
លោក ឡាក់ ភី ប្រធានមន្ទីរទំនាក់ទំនងកិច្ចការសាធារណៈនៃបញ្ជាការដ្ឋានកងរាជអាវុធហត្ថខេត្តប្រាប់នៅថ្ងៃទី ១៨ ខែឧសភា ថា មូលហេតុដែលនាំឱ្យមានការចាប់ខ្លួនបុរសសង្ស័យទាំង ៣ នាក់ គឺមុនថ្ងៃចាប់ខ្លួន មន្ត្រីសហព័ន្ធកីឡាបាល់ទាត់កម្ពុជាបានស្រាវជ្រាវឃើញនៅតាមហ្វេសប៊ុកមានដាក់លក់ខោអាវកីឡាគ្រប់ប្រភេទនៅក្រុងប៉ោយប៉ែត និងបានយកស្លាកសញ្ញាឡូហ្គោរបស់សហព័ន្ធកីឡាបាល់ទាត់កម្ពុជាទៅបោះពុម្ពលើខោអាវកីឡាដែលដាក់តាំងលក់ទាំងនោះផងដែរ។
បន្ទាប់ពីបានស្រាវជ្រាវឃើញពិតប្រាកដមែនហើយ ខាងសហព័ន្ធកីឡាបាល់ទាត់កម្ពុជាក៏បានដាក់ពាក្យបណ្តឹងនៅបញ្ជាការដ្ឋានកងរាជអាវុធហត្ថខេត្តបន្ទាយមានជ័យនៅថ្ងៃទី ១៥ ឧសភា ឆ្នាំ ២០២២។ ការងារនេះក៏មានការចូលរួមពីកម្លាំងកងរាជអាវុធហត្ថលើផ្ទៃប្រទេស ដឹកនាំដោយលោកឧត្តមសេនីយ៍ត្រី គង់ សត្ថារិន ស្នងការរងស្រាវជ្រាវ និងបង្ក្រាបបទល្មើស កងរាជអាវុធហត្ថលើផ្ទៃប្រទេសបានចុះស្រាវជ្រាវ និងឃាត់ខ្លួនជនសង្ស័យតែម្តង។
លោកប្រាប់ថា៖ «ក្រុមជនសង្ស័យបានយកស្លាកសញ្ញាឡូហ្គោដែលមានអក្សរ FFC របស់សហព័ន្ធកីឡាជម្រើសជាតិកម្ពុជាយកទៅឱ្យគេបោះពុម្ព ដើម្បីលក់ចែកចាយបន្ត។ កម្លាំងយើងចាប់ជនសង្ស័យតាមបណ្តឹងរបស់សហព័ន្ធបាល់ទាត់កម្ពុជា»។
បើតាមលោក ឡាក់ ភី ជនខិលខូចដែលជាម្ចាស់គណនីហ្វេសប៊ុកឈ្មោះ តាម៉ាប់លក់អាវកីឡា ឈ្មោះ សុខ ចាន់ថន SOK CHANTHORN និងម្ចាស់ហ្វេសប៊ុកឈ្មោះ POR POE LOVE, POR TRY SPORT មានដាក់លក់ឈុតកីឡាគ្រប់ប្រភេទ។ គណនីហ្វេសប៊ុកទាំង ៣ បានបង្ហោះលក់តាមផេចហ្វេសប៊ុក ដែលមានលក់ខោអាវក្រុមជម្រើសជាតិកម្ពុជាលើទីផ្សារដោយពុំមានច្បាប់អនុញ្ញាត។ ខោអាវទាំងនោះ គឺមិនមែនជាផលិតផលផ្លូវការរបស់សហព័ន្ធកីឡាបាល់ទាត់កម្ពុជាជាមួយក្រុមហ៊ុន VARAMAN (វរ្ម័ន) នោះឡើយ៕
