ភ្នំពេញៈ ពិធីបុណ្យ «ច្រត់ព្រះនង្គ័ល» ឆ្នាំនេះមិនត្រូវបានរៀបចំប្រារព្ធធ្វើឡើងនោះទេ ដោយសារនៅបារម្ភខ្លាចការឆ្លងរាលដាលនៃជំងឺកូវីដ១៩។ នេះបើតាមការលើកឡើងរបស់លោកហេង សំរិន ប្រធានរដ្ឋសភា តាមរយៈហ្វេសប៊ុកផេក របស់លោកកាលពីព្រឹក ថ្ងៃទី១៩ ខែឧសភា ឆ្នាំ២០២២។
តាមរយៈសំណេរនៅលើហ្វេសប៊ុកនោះ លោក ហេង សំរិន បានរៀបរាប់ថា ព្រះរាជពិធីបុណ្យច្រត់ព្រះនង្គ័លគឺជាពិធីមួយដែលមានការផ្សព្វផ្សាយដំណឹង អំពីការមកដល់នៃរដូវវប្បមង្គល ដើម្បីឱ្យប្រជាកសិករ នៅតាមទីជនបទស្រែចម្ការ ត្រៀមសព្វគ្រឿងប្រដាប់សម្រាប់ធ្វើកសិកម្មដាំដុះដំណាំគ្រប់ប្រភេទ ជាពិសេសដំណាំស្រូវ។
លោកបានបញ្ជាក់ថា៖«ការរៀបចំប្រារព្ធព្រះរាជពិធីបុណ្យច្រត់ព្រះនង្គ័លនេះ គឺក្នុងគោលបំណងផ្សងមើលប្រផ្នូលរបស់ស្រុកទេសនិងការងារបង្កបង្កើនផលរបស់ប្រជាកសិករតាមរយៈការបរិភោគរបស់សត្វគោឧសភរាជ»។
បើតាមការរៀបរាប់របស់លោក ហេង សំរិន ពិធីបុណ្យទសមាសនេះ ត្រូវបានរៀបចំធ្វើឡើងជារៀងរាល់ឆ្នាំ។ ប៉ុន្តែចាប់តាំងមានការឆ្លងរីករាលដាលនៃជំងឺកូវីដ១៩ ជាសកលដ៏ខ្លាំងក្លានាឆ្នាំ២០២០មក ពិធីនេះមិនត្រូវបានរៀបចំធ្វើឡើងនោះទេ ហើយឆ្នាំ២០២២នេះ គឺជាឆ្នាំទីបីហើយដែលកម្ពុជាមិនអាចរៀបចំប្រារព្ធព្រះរាជពិធីដ៏សំខាន់នេះឡើងប៉ុន្តែមន្ត្រីរាជការកម្មករនិយោជក នៅតែត្រូវបានអនុញ្ញាតឱ្យឈប់សម្រាកពីការងារ ដើម្បីជួបជុំក្រុមគ្រួសារនិងធ្វើដំណើរកម្សាន្តនៅទូទាំងប្រទេសដោយក្តីសប្បាយរីករាយ។
ថ្វីបើពិធីនេះមិនត្រូវបានប្រារព្ធធ្វើឡើងនៅក្នុងឆ្នាំនេះ ប៉ុន្តែ លោកបានបង្ហាញនូវភាពសុទិដ្ឋិនិយមយ៉ាងមុតមាំថា ប្រជាកសិករនៅទូទាំងប្រទេស នឹងប្រកបកិច្ចការស្រែចម្ការ«ទទួលបានទិន្នផលល្អ» នៅក្នុងឆ្នាំនេះ។
អគ្គលេខាធិការរងគណៈកម្មាធិការជាតិរៀបចំបុណ្យជាតិ-អន្តរជាតិនិងជានាយកគណៈកម្មការហោរាសាស្ត្រកម្ពុជា លោក អ៊ឹម បូរិន បញ្ជាក់បន្ថែមថា ទោះបីជាជំងឺកូវីដ១៩បានធូរស្រាល ប៉ុន្តែរដ្ឋាភិបាលមិនបានរៀបចំផែនការដើម្បីប្រារព្ធពិធីច្រត់ព្រះនង្គ័លឡើយ ហើយថាការខកខានមិនបានរៀបចំពិធីបុណ្យច្រត់ព្រះនង្គ័លនេះ វាមិនប៉ះពាល់ដល់ប្រពៃណីខ្មែរនោះទេ។
លោកបានបញ្ជាក់ថា៖«ព្រះពិធីច្រត់ព្រះនង្គ័លហ្នឹង គឺជាព្រះពិធីមួយក្នុងចំណោមព្រះពិធីបុណ្យទសមាសទាំង១០ ដែលតាមទំនៀមទម្លាប់ប្រពៃណីខ្មែរយើង ព្រះរាជពិធីបុណ្យនេះ គឺព្រះមហាក្សត្រ ព្រះអង្គចង់បញ្ជាក់ប្រាប់ប្រជានុរាស្ត្ររបស់ព្រះអង្គអំពីការចូលមកដល់នៃរដូវវប្បមង្គល ឬ រដូវធ្វើស្រែចម្ការមកហើយប៉ុណ្ណោះ មិនមានអ្វីធំដុំនោះទេ។ ការខកខានមិនបានរៀបចំពិធីបុណ្យច្រត់ព្រះនង្គ័លនៅឆ្នាំនេះ និងប៉ុន្មានឆ្នាំមុននេះវាមិនមានអ្វីប៉ះពាល់ដល់ប្រពៃណីទំនៀមទម្លាប់ខ្មែរយើងឡើយ»។
តាមជំនឿនិងទំនៀមរបស់ខ្មែរពីយូរលង់មក ព្រះរាជពិធីច្រត់ព្រះនង្គ័លត្រូវបានប្រារព្ធធ្វើឡើង ជារៀងរាល់ឆ្នាំ នៅក្នុងថ្ងៃ៤រោច ខែពិសាខ នៅឯវាលព្រះស្រែ ឬវាលមេរុ ដែលមានទីតាំងស្ថិតនៅខាងជើងនៃព្រះបរមរាជវាំង។ ប៉ុន្តែឆ្នាំខ្លះព្រះរាជពិធីបុណ្យនេះ ក៏ត្រូវបានប្រារព្វធ្វើនៅតាមបណ្ដាខេត្តនានាផងដែរ។ ពិធីនេះត្រូវបានគេផ្ដោតសំខាន់ទៅលើការផ្សងប្រផ្នូលតាមរយៈសត្វគោឧសភរាជ បរិភោគចំណីអាហារ៧មុខ រួមមាន ស្រូវ ពោត សណ្ដែក ល្ង ស្មៅ ទឹក និង ស្រាស ដែលត្រូវបានគេដាក់តាំងសម្រាប់ឱ្យវាស៊ី ក្រោយធ្វើការភ្ជួររាស់ដីចំនួន៣ជុំនៅលើទីវាលព្រះស្រែ។ ប្រផ្នូលថាស្រុកទេសសម្បូរសប្បាយ ប្រជាពលរដ្ឋមានស្បៀងអាហារគ្រប់គ្រាន់ សម្រាប់ជួយគាំទ្រដល់ការអភិវឌ្ឍប្រទេស តាមផែនការរបស់រាជរដ្ឋាភិបាល ប្រកបដោយសុខសន្តិភាព ប្រសិនបើ គោឧសភរាជ ទៅបរិភោគ ស្រូវ ពោត សណ្ដែក ល្ង និងទឹក។ ផ្ទុយទៅវិញ បើគោឧសភរាជ ទៅបរិភោគស្មៅ និង ស្រាស ប្រផ្នូលថាស្រុកទេសនឹងកើតមាន គ្រោះចង្រៃ ចម្បាំងរាំងជល់ និងជំងឺដង្កាត់ឆ្លងរាតត្បាតពេញផ្ទៃប្រទេស៕