The Phnom Penh Post Search

Search form




Logo of Phnom Penh Post newspaper Phnom Penh Post - លោក​ ហ៊ុន សែន ​នឹង​ដឹកនាំ​គណៈប្រតិភូ​ទៅ​ចូលរួម​ប្រជុំ​របស់​វេទិកា​សេដ្ឋកិច្ច​ពិភពលោក ​ដែល​នឹង​ធ្វើ​នា​ថ្ងៃ​ទី ២២-២៦ ​ឧសភា

លោក​ ហ៊ុន សែន ​នឹង​ដឹកនាំ​គណៈប្រតិភូ​ទៅ​ចូលរួម​ប្រជុំ​របស់​វេទិកា​សេដ្ឋកិច្ច​ពិភពលោក ​ដែល​នឹង​ធ្វើ​នា​ថ្ងៃ​ទី ២២-២៦ ​ឧសភា

Content image - Phnom Penh Post
លោកហ៊ុន សែន ក្នុងកិច្ចប្រជុំតាមប្រព័ន្ធវីដេអូជាមួយនាយករដ្ឋមន្ត្រីឥណ្ឌា លោក Narendra Modi នាថ្ងៃទី ១៨ ឧសភា។ រូបថត SPM

លោក​ ហ៊ុន សែន ​នឹង​ដឹកនាំ​គណៈប្រតិភូ​ទៅ​ចូលរួម​ប្រជុំ​របស់​វេទិកា​សេដ្ឋកិច្ច​ពិភពលោក ​ដែល​នឹង​ធ្វើ​នា​ថ្ងៃ​ទី ២២-២៦ ​ឧសភា

ភ្នំពេញៈ លោក​នាយក​រដ្ឋមន្ត្រី​ហ៊ុន សែន ​នឹង​ដឹកនាំ​គណៈប្រតិភូ​ជាន់ខ្ពស់​ទៅ​ចូលរួម​កិច្ចប្រជុំ​ប្រចាំ​ឆ្នាំ២០២២ ​របស់​វេទិកា​សេដ្ឋកិច្ច​ពិភពលោក ​ក្រោម​មូលបទ​«ការត្រៀម​ខ្លួន​សម្រាប់​យុគសម័យ​ក្រោយ​ជំងឺ​កូវីដ» ​ដែល​នឹង​ប្រព្រឹត្ត​ទៅ​នៅ​ថ្ងៃ​ទី ២២-២៦ ​ខែឧសភា ​នៅ​ទីក្រុង​ដាវ៉ស-ក្លូស្ទ័រ ​(Davos-Klosters) ​ប្រទេស​ស្វីស ​តាម​ការអញ្ជើញ​របស់​លោក​ក្លោស ឆ្វាប់​(Klaus Schwab) ​ស្ថាបនិក ​និង​ជាប្រធាន​ប្រតិបត្តិ​វេទិកា​សេដ្ឋកិច្ច​ពិភព​លោក។

ក្រសួង​ការបរទេស​កម្ពុជា ​បញ្ជាក់​ក្នុង​សេចក្តី​ប្រកាស​ព័ត៌មាន​នា​ថ្ងៃទី១៩ ​ខែឧសភា ​ថា ​អមដំណើរ​លោក ​ហ៊ុន សែន ​នៅ​ក្នុង​កិច្ចប្រជុំ​នេះ ​រួមមាន ​លោក​ស៊ុន ចាន់ថុល ​ទេសរដ្ឋមន្រ្តី ​រដ្ឋមន្រ្តី​ក្រសួង​សាធារណការ ​និង​ដឹកជញ្ជូន ​លោក​ប៉ាន សូរស័ក្តិ ​រដ្ឋមន្រ្តី​ក្រសួង​ពាណិជ្ជកម្ម ​និង​មន្ត្រី​ជាន់ខ្ពស់​នៃ​រាជរដ្ឋាភិបាល​កម្ពុជា​មួយចំនួន​ផ្សេង​ទៀត​ ព្រមទាំង​សមាជិក​មួយ​ចំនួន​របស់​សភា​ពាណិជ្ជកម្ម​កម្ពុជា​ផង​ដែរ។

ក្រសួង​ការបរទេស​បញ្ជាក់ថា​៖«ក្នុង​ឱកាស​ចូលរួម​ក្នុង​វេទិកា​នេះ ​សម្តេច​តេជោ​នាយករដ្ឋមន្រ្តី ​ហ៊ុន សែន ​នឹង​អញ្ជើញ​ថ្លែង​សុន្ទរកថា​ប្រកប​ដោយ​អត្ថន័យ​ខ្លឹមសារ​នៅ​ក្នុង​ពិធីបិទ​កិច្ចពិភាក្សា​ជាមួយ​ភាគី​ពាក់ព័ន្ធ ​ក្រោម​ប្រធានបទ ​ទស្សនវិស័យ​យុទ្ធ​សាស្ត្រ​លើ​អាស៊ាន ​និង​នៅក្នុង​កម្មវិធី​អាហារ​ការងារ​ថ្ងៃត្រង់​ក្រៅ​ផ្លូវការ ​ជាមួយ​ថ្នាក់ដឹកនាំ​សេដ្ឋកិច្ច​ពិភពលោក ​ក្រោម​ប្រធានបទ​ ការស្តារ​សន្តិភាព ​និង​សណ្តាប់​ធ្នាប់​ឡើង​វិញ»។

ក្រៅពី​អញ្ជើញ​ចូលរួម​ក្នុង​វេទិកា​នេះ ​លោក​ហ៊ុន សែន ​ក៏​រំពឹង​ថា ​នឹង​មាន​ជំនួប​ជាមួយ​ថ្នាក់ដឹកនាំ ​នៃ​ប្រទេស​មួយចំនួន ​ក៏​ដូចជា​ឥស្សរជន​នយោបាយ ​និង​ធុរជន​ពិភពលោក​ផង​ដែរ។

ក្នុង​ឱកាស​ស្នាក់នៅ​ប្រទេស​ស្វីស ​លោក​ហ៊ុន សែន ​នឹង​ថ្លែង​សុន្ទរកថា ​បើក​ «រាត្រីកម្ពុជា»​(CAMBODIA NIGHT) ​ដែល​ជា​ព្រឹត្តការណ៍​រៀបចំ​ដោយ​ក្រុមហ៊ុន​វើលដ៏ ​ប្រ៊ីជ ​គ្រុប ​(World Bridge Group) ​ក្នុង​គោល​បំណង​ដើម្បី​លើក​ស្ទួយ​អំពី​ធុរកិច្ច​បរទេស​នៅ​ប្រទេស​កម្ពុជា។ លោក​ក៏គ្រោង​នឹង​ជួប​សំណេះ​សំណាល​ជាមួយ​ពលរដ្ឋ​ខ្មែរ ​ដែល​រស់នៅ​ប្រទេស​ស្វីស​ និង​បណ្តា​ប្រទេស​អឺរ៉ុប​ផង​ដែរ។

លោក​ហ៊ុន សែន ​បានបញ្ជាក់​ក្នុង​បណ្តាញ​តេឡេក្រាម​នា​ថ្ងៃទី១៩ ​ខែឧសភា ​ថា ​នៅ​ម៉ោង​១.៣០​រំលង​អធ្រាត្រ ​ឆ្លង​ចូល​ថ្ងៃ​ទី២១ ​ឧសភា ​លោក​នឹង​ដឹកនាំ​គណៈប្រតិភូ​កម្ពុជា​ដើម្បី​ចូលរួម​វេទិកា​នេះ ​ហើយ​លោក​អរគុណ​ដល់​ពលរដ្ឋ​ខ្មែរ​ដែល​កំពុង​រស់នៅ​បណ្តា​ប្រទេស​នៅ​ទ្វីប​អឺរ៉ុប ​ដែល​បានចេញ​វីដេអូ ​អបអរសាទរ​ដំណើរ​របស់​លោក​ទៅកាន់​តំបន់​អឺរ៉ុប។

លោក​បញ្ជាក់ថា ​តាម​ការគ្រោង​ទុក ​លោក​នឹង​ជួប​ពលរដ្ឋ​ខ្មែរ​នៅ​ទីក្រុង​សូរិក ​(Zurich) ​ប្រទេស​ស្វីស​ នៅ​ល្ងាច​ថ្ងៃ​ទី២១​ ខែឧសភា ​ដោយ​សរសេរថា​៖«សូម​ជម្រាប​លា​បងប្អូន​ជន​រួមជាតិ​នៅ​ក្នុង​ប្រទេស​មួយរយ:​ខ្លី​ ហើយ​និង​ជួប​បង​ប្អូន​ជន​រួម​ជាតិ​នៅ​តំបន់​អឺរ៉ុប​ក្នុង​ពេល​ប្រមាណ​៦០ម៉ោង​ទៀត»។

លោក​គិន ភា ​ប្រធាន​វិទ្យាស្ថាន​ទំនាក់​ទំនង​អន្តរជាតិ​នៃ​រាជបណិ្ឌត្យ​សភា​កម្ពុជា ​ប្រាប់​ភ្នំពេញ​ប៉ុស្តិ៍​នា​ថ្ងៃទី១៩ ​ខែឧសភា ​ថា​ ដំណើរ​ទស្សនកិច្ច​របស់​លោក​ហ៊ុន សែន ​នេះ​មាន​សារៈ​សំខាន់​ណាស់ ​ពីព្រោះ​វា​ពាក់ព័ន្ធ​នឹង​តួនាទី​ដ៏​សំខាន់​របស់​កម្ពុជា​ក្នុង​ឋានៈ​ជាប្រធាន​អាស៊ាន ​ដែលជា​អង្គការ​តំបន់​មាន​សក្តានុពល​មួយ។ ដំណើរ​ទស្សនកិច្ច​នេះ​ក៏​បង្ហាញ​ពីភាព​សកម្ម​ក្នុង​ការធ្វើ​ពិពិធកម្ម​ការទូត​របស់​កម្ពុជា​តាមរយៈ​ដំណើរ​ទស្សនកិច្ច​របស់​លោក​ហ៊ុន សែន ​ទៅ​ក្រៅ​ប្រទេស​ជាបន្តបន្ទាប់ ​ដែល​នឹង​ធ្វើឱ្យ​កម្ពុជា​កាន់តែ​មាន​ទំនាក់​ទំនង​ជាមួយ​បណ្តា​ប្រទេស​ផ្សេងៗ​ទៀត​កាន់តែ​មាន​ភាពប្រសើរ​ឡើង។

លោក​គិន ភា ​ថ្លែងថា​៖«សម្រាប់​ដំណើរ​ទស្សនកិច្ច​នេះ ​នៅ​ពេល​ដែល​សម្តេច​ជួប​ពិភាក្សា​ជាមួយ​ថ្នាក់​ដឹកនាំ​ធុរកិច្ច​ផ្សេង​ទៀត​ហ្នឹង ​គឺជា​ឱកាស​ដែល​កម្ពុជា​អាច​ពន្យល់​នូវ​សក្តានុពល​នៃ​ការវិនិយោគ​និង​ការផ្លាស់ប្តូរ​ពាណិជ្ជកម្ម​របស់​កម្ពុជា​ជាមួយ​បណ្តា​ប្រទេស​ផ្សេងៗ ​ពីព្រោះ​យើង​មាន​កិច្ចព្រមព្រៀង​ពាណិជ្ជកម្ម​សេរី​ហ្នឹង​ច្រើន​ រូបភាព​ជាក្របខ័ណ្ឌ​ទ្វេភាគី ​និង​ជាក្រប​ខ័ណ្ឌ​ពហុភាគី»៕

អត្ថបទគួរចាប់អារម្មណ៍