ភ្នំពេញៈក្រសួងអប់រំយុវជន និងកីឡាសហការជាមួយអង្គភាពចំណុះក្រសួងនៅថ្នាក់ក្រោមជាតិនិងអង្គការដៃគូបើកយុទ្ធនាការផ្សព្វផ្សាយសេចក្ដីណែនាំស្ដីពីការហាមឃាត់ការផ្សព្វផ្សាយពាណិជ្ជកម្ម និងការតាំងលក់ផលិតផលថ្នាំជក់ នៅតាមគ្រឹះស្ថានសិក្សាសាធារណៈ និងឯកជន។
ពិធីបើកយុទ្ធនាការនេះធ្វើឡើងក្រោមអធិបតីភាពលោកស្រី សឿ សុជាតា អនុរដ្ឋលេខាធិការក្រសួងអប់រំ យុវជន និងកីឡា និងលោក មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជា រួមទាំងវាគ្មិន និងសិស្ស-និស្សិតជាង៣០០នាក់កាលពីថ្ងៃទី១៨ ឧសភា២០២២ នៅសាកលវិទ្យាល័យភូមិន្ទភ្នំពេញ។
ការបើកយុទ្ធនាការនេះ បានផ្សព្វផ្សាយសេចក្ដីណែនាំស្ដីពីការហាមឃាត់ ការផ្សព្វផ្សាយពាណិជ្ជកម្ម និងការតាំងលក់ផលិតផលថ្នាំជក់ នៅតាមគ្រឹះស្ថានសិក្សាសាធារណៈ និងឯកជន ដោយកិច្ចសហការរបស់អង្គភាពចំណុះក្រសួង មន្ទីរអប់រំ យុវជន និងកីឡា រាជធានី-ខេត្ត ការិយាល័យអប់រំ យុវជន និងកីឡានៃរដ្ឋបាលក្រុង ស្រុក ខណ្ឌ គ្រឹះស្ថានសិក្សាគ្រប់កម្រិត ទាំងគ្រឹះស្ថានសិក្សាសាធារណៈ និងឯកជនជាមួយនឹងឧស្សាហករថ្នាំជក់។
បើតាមក្រសួងអប់រំ គោលបំណងនៃយុទ្ធនាការផ្សព្វផ្សាយសេចក្ដីណែនាំយសេចក្ដីណែនាំនេះ គឺហាមគ្រឹះស្ថានសិក្សាសាធារណៈ និងឯកជន មិនអនុញ្ញាតឱ្យចាប់ដៃគូសហការ ទទួលការឧបត្ថម្ភ ឬចុះអនុស្សរណៈយោគយល់គ្នាជាមួយឧស្សាហករថ្នាំជក់ ទោះក្នុងគោលបំណងណាមួយ។
ក្រសួងបញ្ជាក់ថា៖«ជាអាទិដូចជាសកម្មភាពសប្បុរសធម៌ ទស្សនកិច្ចសិក្សា ផ្លាស់ប្ដូរបទពិសោធ ឬសិក្សាស្រាវជ្រាវដើម្បីគាំទ្រដល់សកម្មភាពអប់រំតាមគ្រប់រូបភាព និងមិនអនុញ្ញាតឱ្យផ្ដល់ទីកន្លែងឬទីធ្លាគ្រឹះស្ថានសិក្សាសាធារណៈ និងឯកជនសម្រាប់រៀបចំកម្មវិធីផ្សព្វផ្សាយឬពិព័រណ៍ដែលជាកម្មវិធីរបស់ឧស្សាហករថ្នាំជក់ឡើយ»។
លោកស្រី សឿ សុជាតា ថ្លែងពេលបើកយុទ្ធនាការនេះថា ការបើយុទ្ធនាការផ្សព្វផ្សាយសេចក្ដីណែនាំនេះ គឺជាផ្នែកមួយនៃការចូលរួមអនុវត្តអនុសញ្ញាស្ដីពីការត្រួតពិនិត្យផលិតផលថ្នាំជក់។ លោកស្រីបន្តថាក្រោយពីមានការដាក់ចេញសេចក្ដីណែនាំនេះនៅគ្រប់គ្រឹះស្ថានសិក្សាទាំងអស់ បានចូលរួមអនុវត្តតាមបានល្អរួចមកហើយ ជាមួយគ្នានេះរដ្ឋអំណាចនៅតាមមូលដ្ឋាន ក៏បានចូលរួមគាំទ្រក្នុងការអនុវត្តនូវសេចក្ដីណែនាំនេះ និងបានចូលរួមពិនិត្យនៅតាមមូលដ្ឋានរបស់ខ្លួនផងដែរ។
លោកបញ្ជាក់ថា៖«បើយុទ្ធនាការផ្សព្វផ្សាយសេចក្ដីណែនាំនេះគឺជាការចូលរួមរបស់ក្រសួងអប់រំ យុវជន និងកីឡា ក្នុងការអនុវត្តវិធានការហាមឃាត់ការផ្សព្វផ្សាយលក់ ការស្វែងរកទីផ្សារលក់ផលិតផលថ្នាំជក់ ដែលត្រូវបានហាមឃាត់ទាំងស្រុងដោយច្បាប់ស្ដីពីការត្រួតពិនិត្យផលិតផលថ្នាំជក់»។
លោកស្រីបន្តថា៖«យុទ្ធនាការណ៍នេះដែរក៏ដើម្បីជាសារមួយក្នុងការដាស់តឿនដល់យុវជន ឱ្យចូលរួមទប់ស្កាត់នូវការជ្រៀតចូលផលិតផលថ្នាំជក់ នៅក្នុងគ្រឹះស្ថានសិក្សាទោះជាក្នុងរូបភាពណាមួយក៏ដោយ»។
ក្រសួងអប់រំបានបង្ហាញ ការស្រាវជ្រាវរបស់អង្គការសហប្រជាជាតិថា ការប្រើប្រាស់ថ្នាំជក់ជាកត្តាចម្បងមួយនៃការស្លាប់របស់ប្រជាពលរដ្ឋខ្មែរប្រមាណ១៥ ០០០នាក់ក្នុង១ឆ្នាំៗ ហើយថវិកាប្រមាណ ៦៤៩លានដុល្លារ សហរដ្ឋអាមេរិកត្រូវបានខាតបង់៕
វីដេអូ៖