ភ្នំពេញៈ លោក ទៀ បាញ់ រដ្ឋមន្ត្រីការពារជាតិកម្ពុជាបង្ហាញឆន្ទៈដល់ក្រុមមន្ត្រីជាន់ខ្ពស់ការពារជាតិអាស៊ាននិងអាស៊ានបូកក្នុងការជំរុញដំណោះស្រាយបញ្ហាក្នុងតំបន់ខណៈក្នុងតំបន់នៅតែប្រឈមនឹងអំពើភេរវកម្ម ការប្រែប្រួលអាកាសធាតុ សន្តិសុខលម្អសមុទ្រ និងគ្រោះមហន្តរាយធម្មជាតិជាពិសេសជំងឺរាតត្បាតកូវីដ ១៩។
កាលពីថ្ងៃទី១៨ ខែឧសភា លោក ទៀ បាញ់ បានជួបជាមួយប្រធានប្រតិភូឧត្តមមន្ត្រីការពារជាតិអាស៊ាននិងប្រទេសអាស៊ានបូក ក្នុងនាមលោកជាប្រធានកិច្ចប្រជុំរដ្ឋមន្ត្រីការពារជាតិអាស៊ានឆ្នាំ២០២២។
នៅក្នុងជំនួបនេះ លោកទៀ បាញ់ ថ្លែងថា«កម្ពុជាមានឆន្ទៈក្នុងការប្រើប្រាស់តួនាទី និងឯកសិទ្ធិជាប្រធាននេះ ដើម្បីលើកកម្ពស់ការដោះស្រាយបញ្ហាក្នុងតំបន់នានា ដោយសន្តិវិធីតាមផ្លូវការទូត ផ្លូវច្បាប់កិច្ចសហប្រតិបត្តិការ ការយោគយល់គ្នាទៅវិញទៅមក និងគោរពផលប្រយោជន៍រួម ដោយអនុលោមតាមមូលបទ«សាមគ្គីភាពដើម្បីសន្តិសុខ ប្រកបដោយភាពសុខដុម»។
នាយកដ្ឋានព័ត៌មានក្រសួងការពារជាតិកម្ពុជាបានដកស្រង់សម្ដីលោកថា កម្ពុជាចង់ឃើញភាពរឹងមាំនៃឯកភាព និងមជ្ឈភាពអាស៊ានដែលជាធាតុស្នូលសម្រាប់ការធានាបាននូវការរួមរស់ដោយសុខសន្តិភាពសុខដុមរមនានិងវិបុលភាពក្នុងតំបន់។
លោក ទៀ បាញ់ បន្តថា កម្ពុជា និងរដ្ឋជាសមាជិកអាស៊ានផ្សេងទៀតបានផ្តួចផ្តើមទស្សនទានមួយចំនួនដើម្បីជំរុញកិច្ចសហប្រតិបត្តិការជាក់ស្ដែងឱ្យកាន់តែស៊ីជម្រៅសម្រាប់ជាប្រយោជន៍ដល់បណ្តាប្រទេសដែលចូលរួមទាំងអស់ទៅតាមបរិបទសន្ដិសុខតំបន់បច្ចុប្បន្ន និងកំពុងលេចឡើងថ្មី។
លោកបន្តថា កម្ពុជាមានគោលដៅជំរុញការពង្រីកតួនាទីរបស់ស្ត្រីអាស៊ានក្នុងប្រតិបត្តិការក្សាសន្តិភាពរបស់អង្គការសហប្រជាជាតិការចែករំលែកបទពិសោធនិងគុណតម្លៃនៃប្រវត្តិសាស្ត្រយោធាក្នុងការកសាងនិងពង្រឹងសន្តិភាពក៏ដូចជាការលើកកម្ពស់តួនាទីនៃស្ថាប័នការពារជាតិដើម្បីគាំទ្រដល់ការស្តារឡើងវិញក្រោយជំងឺកូវីដ១៩។
លោក ទៀ បាញ់ បង្ហាញក្តីសង្ឃឹមថា កិច្ចប្រជុំឧត្តមមន្ត្រីការពារជាតិអាស៊ាន និងកិច្ចប្រជុំ ឧត្តមមន្ត្រីការពារជាតិអាស៊ានបូកក្នុងរយៈពេល ២ថ្ងៃ ចាប់ពីថ្ងៃទី១៧-១៨ ខែឧសភា នៅកម្ពុជានេះ នឹងជំរុញសាមគ្គីភាពក្នុងអាស៊ាន និងអាស៊ានបូក ដើម្បីលើកកម្ពស់សន្តិសុខ។
ក្រុមឧត្តមមន្ត្រីការពារជាតិអាស៊ាន បូកបានពិភាក្សាគ្នាលើបញ្ហាការពារជាតិ និងសន្តិសុខតំបន់ និងអន្តរជាតិ ដើម្បីពង្រឹងសន្តិសុខ សន្តិភាព និងស្ថិរភាពតំបន់។
សេចក្តីប្រកាសព័ត៌មានអគ្គនាយកដ្ឋាននយោបាយ និងកិច្ចការបរទេសនៃក្រសួងការពារជាតិកម្ពុជាបញ្ជាក់នាថ្ងៃទី១៩ខែឧសភាថា៖ «កិច្ចប្រជុំបានកត់សម្គាល់នូវទស្សនៈរួមមួយចំនួនដែលថា តំបន់យើងនៅតែប្រឈមនឹងសន្តិសុខមិនប្រពៃណីដូចជាអំពើភេរវកម្មការប្រែប្រួលអាកាសធាតុសន្តិសុខលម្ហសមុទ្រនិងគ្រោះមហន្តរាយធម្មជាតិជាពិសេសជំងឺរាតត្បាតកូវីដ១៩ដែលបានជះឥទ្ធិពលធ្ងន់ធ្ងរដល់សុខភាពមនុស្សជាតិនិងសេដ្ឋកិច្ច
ពិភពលោក»។
សេចក្តីប្រកាសព័ត៌មានបញ្ជាក់ថា ក្រុមឧត្តមមន្ត្រីការពារជាតិអាស៊ានបូកនៅតែចាត់ទុកកិច្ចប្រជុំរដ្ឋមន្ត្រីការពារជាតិអាស៊ានបូកជាវេទិកាសំខាន់ក្នុងការពិភាក្សានិងពិគ្រោះយោបល់ពាក់ព័ន្ធវិស័យការពារជាតិនិងសន្តិសុខ ព្រមទាំងដាក់ចេញនូវគោលការណ៍អនុវត្តកិច្ចសហប្រតិបត្តិការជាក់ស្តែងក្នុងតំបន់។
ប្រភពដដែលបន្តថា ប្រទេសទាំងអស់នៅតែគាំទ្រដល់មជ្ឈភាពអាស៊ាននិងតួនាទីស្នូលរបស់អាស៊ាន ក្នុងការនិម្មាបនកម្មតំបន់។កិច្ចប្រជុំបានឯកភាពលើខ្លឹមសាររបស់សេចក្តីព្រាងសេចក្តីប្រកាសរួមកិច្ចប្រជុំរដ្ឋមន្ត្រី ការពារជាតិអាស៊ាន-បូកនិងបានប្រគល់ជូនក្រុមការងារពិភាក្សាចុងក្រោយលើនីតិវិធីនៃការអនុម័តដោយកិច្ចប្រជុំរដ្ឋមន្ត្រីការពារជាតិអាស៊ានបូក។
ក្នុងកិច្ចប្រជុំនេះ កម្ពុជាបានផ្សព្វផ្សាយសៀវភៅសការពារជាតិឆ្នាំ២០២២ និងបានបកស្រាយសង្ខេបអំពីខ្លឹមសារៈសំខាន់ៗនៃឯកសារយុទ្ធសាស្ត្រការពារជាតិនេះ។ ឯកសារនេះជាសមិទ្ធផលមួយនៃអាទិភាពទាំង៦ របស់ក្រសួងការពារជាតិកម្ពុជាសម្រាប់ការធ្វើជាម្ចាស់ផ្ទះក្នុងឆ្នាំ២០២២។
រាល់ខ្លឹមសារដែលបានសម្រេចដោយឧត្តមមន្ត្រីការពារជាតិអាស៊ានបូកគឺជាការប្រុងប្រៀបសម្រាប់កិច្ចប្រជុំរដ្ឋមន្ត្រីការពារជាតិអាស៊ានលើកទី១៦ដែលគ្រោងធ្វើនៅថ្ងៃទី២១-២២ ខែមិថុនានិងកិច្ចប្រជុំរដ្ឋមន្ត្រីការពារជាតិអាស៊ានបូកលើកទី៩ ដែលគ្រោងធ្វើនៅថ្ងៃទី២២-២៣ ខែវិច្ឆិកា។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាពប្រាប់ភ្នំពេញប៉ុស្តិ៍នាថ្ងៃទី១៩ ខែឧសភា ថា អាស៊ានពិបាកនឹងធ្វើឱ្យមានឯកភាពគ្នា«ណាស់»។ ចំពោះការឯកភាពគ្នានេះកម្ពុជាប្រហែលជាមិនអាចប្រើឆន្ទានុសិទ្ធិ ឬឆន្ទៈផ្ទាល់ខ្លួនដើម្បីសម្រេចឱ្យមានការរួបរួមនៅក្នុងអាស៊ានបាននោះទេ។វាទាល់តែឈរលើការស្រុះស្រួលមូលមតិគ្នាឬហៅថាកុងសង់ស៊ីសជាមួយគ្នានៅក្នុងចំណោមបណ្តាប្រទេសអាស៊ានទើបអាចដោះស្រាយបញ្ហានេះបាន។
លោកថ្លែងថា៖«ឆន្ទៈរបស់កម្ពុជានៅក្នុងការធ្វើឱ្យមានឯកភាពជាតិនេះក៏វាជាចំណែកសំខាន់មួយ ប៉ុន្តែប្រសិនបើប្រទេសទាំងអស់នៅក្នុងតំបន់អាស៊ានហ្នឹងសុទ្ធតែមានឆន្ទៈថាឱ្យមានឯកភាពគ្នាក្នុងការលើកកម្ពស់ការដោះស្រាយបញ្ហានៅក្នុងតំបន់អី អាហ្នឹងជាការប្រសើរ»។
លោកបន្ថែមថា៖«ប៉ុន្តែគ្រាន់ថាគោលការណ៍របស់អាស៊ានគឺគោលការណ៍កុងសង់ស៊ីសនេះគឺធ្វើឱ្យអាស៊ានមិនសូវទទួលបានជោគជ័យនៅក្នុងការដោះស្រាយបញ្ហាក្នុងតំបន់ទេ។ម្យ៉ាងវិញទៀតអាស៊ានគឺឈរលើគោលការណ៍ថាមិនជ្រៀតជ្រែកកិច្ចការផ្ទៃក្នុងគ្នាទៅវិញទៅមកហ្នឹង។ អ៊ីចឹង គោលការណ៍ហ្នឹងបានរារាំងអាស៊ានក្នុងការដោះស្រាយបញ្ហាប្រកបដោយប្រសិទ្ធភាពនៅក្នុងតំបន់អាស៊ានដែរ»៕