.jpg)
អ្នកដំណើរឆ្លងកាត់វេទិកាត្រៀមរៀបចំឃោសនាបោះឆ្នោត។ ហេង ជីវ័ន
ភ្នំពេញៈ គណៈបក្សនយោបាយចំនួន ១៧ ដែលមានសិទ្ធិចូលរួមការបោះឆ្នោតជ្រើសរើសក្រុមប្រឹក្សាឃុំ សង្កាត់ ដែលគ្រោងនឹងប្រព្រឹត្តទៅនៅថ្ងៃអាទិត្យទី ៥ ខែមិថុនា ឆ្នាំ ២០២២ បានត្រៀមបើកយុទ្ធនាការឃោសនាបោះឆ្នោត ដើម្បីប្រកួតប្រជែងដណ្ដើមអាសនៈសរុបចំនួន ១ ៦៥២ ឃុំសង្កាត់នៅទូទាំងប្រទេស។
លោក ហង្ស ពុទ្ធា អ្នកនាំពាក្យ គ.ជ.ប ប្រាប់ ភ្នំពេញ ប៉ុស្តិ៍ នៅថ្ងៃទី ១៩ ខែឧសភា ថា កាលបរិច្ឆេទនៃការឃោសនាបោះឆ្នោតរបស់គណបក្សនយោបាយនឹងប្រព្រឹត្តទៅចាប់ពីថ្ងៃទី ២១ ខែឧសភា ដល់ថ្ងៃទី ៣ ខែមិថុនា ឆ្នាំ ២០២២។ ការឃោសនាបោះឆ្នោតរបស់គណបក្សនយោបាយនេះនឹងត្រូវចាប់ផ្តើមពីម៉ោង ៦ ព្រឹកដល់ម៉ោង ១០ យប់។ ចាប់ពីម៉ោង ១០ យប់ ទៅដល់ម៉ោង ៦ ព្រឹក ជាពេលវេលាត្រូវសម្រាក។ ដោយឡែកម៉ោង ១២ ថ្ងៃត្រង់រហូតដល់ម៉ោង ២ រសៀល គឺធ្វើសកម្មភាពឃោសនាដោយចែកខិត្តប័ណ្ណ ប៉ុន្តែការប្រើឧបករណ៍បំពងសំឡេងត្រូវហាមឃាត់ ហើយការប្រើប្រាស់ឧបករណ៍បំពងសំឡេងនៅក្បែរមន្ទីរពេទ្យ និងសាលារៀនដែលមានសិស្សកំពុងតែរៀនក៏ត្រូវហាមឃាត់ដែរ។ ដូច្នេះការឃោសនាបោះឆ្នោតរបស់គណបក្សនយោបាយត្រូវតែស្របទៅតាមនីតិវិធីរបស់ គ.ជ.ប ដោយត្រូវជូនដំណឹងទៅគណៈកម្មការឃុំសង្កាត់រៀបចំការបោះឆ្នោតឱ្យបានយ៉ាងហោចណាស់ ៣ ថ្ងៃមុន ដើម្បីរៀបចំតម្រាយផ្លូវកុំឱ្យគណបក្សនយោបាយហែក្បួនប៉ះគ្នា។
លោកថ្លែងថា៖ «ការហែក្បួនតាមនីតិវិធីកំណត់ក្នុងអំឡុងពេលឃោសនានេះ គណបក្សនយោបាយមានសិទ្ធិហែក្បួនធំតែ ២ ដងទេ ប៉ុន្តែអ្នកឃោសនាក៏ត្រូវចៀសវាងនូវការប្រើប្រាស់អំពើគំរាមកំហែង បំភិតបំភ័យ ឬហិង្សា ឬបង្ខំដោយសន្យា ឬផ្តិតមេដៃ ឬក៏ទិញសន្លឹកឆ្នោតជាដើម។ បន្ថែមពីនេះ គ.ជ.ប នឹងបើកកិច្ចប្រជុំជាមួយភាគីពាក់ព័ន្ធ ដើម្បីជម្រាបជូនបន្ថែមដល់គណបក្សនយោបាយនៅថ្ងៃទី ២០ ខែឧសភា មុន ១ ថ្ងៃនៃការចាប់ផ្តើមហែក្បួនយុទ្ធនាការឃោសនា»។
នៅថ្ងៃទី ១៩ ខែឧសភានេះ គណបក្សនយោបាយមួយចំនួនបានបង្ហាញនូវគម្រោងទ្រង់ទ្រាយឃោសនាផ្សេងៗគ្នាឱ្យភ្នំពេញប៉ុស្តិ៍ដឹង ដូចជា លោក ខឿយ ស៊ីនឿន អនុប្រធានគណបក្សខ្មែរស្រឡាញ់ជាតិថា ថ្ងៃទី ១ នៃយុទ្ធនាការឃោសនាបោះឆ្នោត គណបក្សស្រឡាញ់ជាតិនឹងធ្វើនៅតាមឃុំសង្កាត់ដែលបានចុះបញ្ជី មិនមានការជួបជុំអ្នកគាំទ្រសម្រាប់បើកយុទ្ធនាការទ្រង់ទ្រាយធំនោះទេ ប៉ុន្តែនឹងរៀបចំធ្វើនៅពេលសមស្របណាមួយ នៅក្រោយពេលដែលគណបក្សនានាធ្វើរួចហើយ។
លោក ញឿន រ៉ាដែន អ្នកនាំពាក្យគណបក្សហ្វុនស៊ិនប៉ិច ថា គណបក្សហ្វុនស៊ិនប៉ិចនឹងរៀបចំបើកយុទ្ធនាការទ្រង់ទ្រាយធំនៅចំថ្ងៃទី ២២ ខែឧសភា ឆ្នាំ ២០២២ ផ្តើមចេញពីផ្លូវ ៦០ ម៉ែត្រ សង្កាត់ព្រែកហូរ ដោយមានក្បួនរថយន្ត និងក្បួនម៉ូតូដែលមានអ្នកគាំទ្រប្រមាណពី ៥០០ នាក់ទៅ ១ ០០០ នាក់ ដឹកនាំដោយព្រះអង្គម្ចាស់នរោត្តម ចក្រាវុធ ព្រះប្រធានគណបក្ស។
លោកថ្លែងថា៖ «គណបក្សបើកយុទ្ធនាការធំនេះមួយរួចហើយនៅតាមខេត្តនីមួយៗនឹងមានក្រុមការងារធ្វើទៅតាមរៀងខ្លួន ដោយក្នុងនោះព្រះអង្គម្ចាស់នឹងបន្តចុះទៅតាមខេត្ត និងនៅតាមឃុំសង្កាត់ យើងមានប្រធានប្រតិបត្តិ ជាអ្នកឃោសនាទៅតាមកាលបរិច្ឆេទរបស់ គ.ជ.ប ជាមួយនឹងការចែកខិត្តប័ណ្ណ និងចាក់ផ្សាយសារនយោបាយតាមឧគ្ឃោសនស័ព្ទជាដើម»។
លោក យ៉ែម ប៉ុញ្ញារិទ្ធិ ស្ថាបនិកគណបក្សកម្ពុជានិយមថា ដោយគណបក្សកម្ពុជានិយមដាក់បេក្ខជនបានចំនួន ៣៨ ឃុំ-សង្កាត់ ក្នុង ១០ រាជធានីខេត្ត។ ដូច្នេះ គម្រោងផែនការបើកយុទ្ធនាការឃោសនានៅថ្ងៃទី ១ បេក្ខជន រួមជាមួយនឹងសកម្មជននៅតាមឃុំសង្កាត់ដែលមានការដាក់បេក្ខជននោះនឹងរៀបចំក្រុមចាក់ផ្សាយតាមមេក្រូ និងចែកខិត្តប័ណ្ណតាមខ្នងផ្ទះរបស់ប្រជាពលរដ្ឋក្នុងរយៈពេល ១៤ ថ្ងៃ។
ទោះជាយ៉ាងណាលោកថា ការហែក្បួនអាចនឹងមានទៅតាម ឃុំសង្កាត់មួយចំនួនដូចជានៅឃុំព្រះស្តេច ស្រុកព្រះស្តេច ខេត្តព្រៃវែង ដោយមានអ្នកចូលរួមជាង ១០០ នាក់ដែលនឹងផ្តើមពីព្រំដែនវៀតណាម-កម្ពុជា ប៉ុន្តែជាគោលការណ៍របស់គណបក្សផ្តោតសំខាន់ទៅលើការចែកខិត្តប័ណ្ណ និងចាក់មេក្រូផ្សាយពីគោលនយោបាយរបស់គណបក្ស។
លោក ឡឹក សុធារ អ្នកនាំពាក្យគណបក្សប្រជាធិបតេយ្យមូលដ្ឋានថា នៅថ្ងៃទី ១ នៃយុទ្ធនាការឃោសនាបោះឆ្នោតនេះ គណបក្សនឹងបើកយុទ្ធនាការលក្ខណៈធំនៅសង្កាត់កោះដាច់ ខណ្ឌជ្រោយចង្វារ រាជធានីភ្នំពេញ ដោយមានថ្នាក់ដឹកនាំរបស់គណបក្សនឹងចូលរួមហែក្បួននេះដែរ។
លោកថ្លែងថា៖ «នៅថ្ងៃទី ១ គណបក្សប្រជាធិបតេយ្យមូលដ្ឋានហែតែ ៣ ឃុំទេ ប៉ុន្តែហែធំជាងគេនៅសង្កាត់កោះដាច់នេះ ដោយសារតែគណបក្សដាក់បេក្ខភាពតែ ១ សង្កាត់នេះទេ ហើយនៅថ្ងៃទី ២៦ នឹងហែធំមួយទៀត ឃុំសគ្រាម នៅខេត្តកំពត ដែលមានអ្នកចូលរួម ៨០០ នាក់»។
លោក អ៊ូ ចន្ទរ័ត្ន ស្ថាបនិកគណបក្សកែទម្រង់កម្ពុជាថា គណបក្សដាក់បេក្ខភាពបានចំនួន ៥៩ ឃុំ-សង្កាត់ នៃ ១២ រាជធានីខេត្តប៉ុណ្ណោះ ដូច្នេះគណបក្សមិនមានការរៀបចំធ្វើយុទ្ធនាការលក្ខណៈទ្រង់ទ្រាយធំនៅថ្ងៃដំបូងនោះទេ។ ដូច្នេះ គណបក្សឱ្យឃុំ-សង្កាត់នីមួយៗហែក្បួន និងចែកខិត្តប័ណ្ណជូនដល់ប្រជាពលរដ្ឋនៅតាមខ្នងផ្ទះនៅក្នុងមូលដ្ឋានរបស់ខ្លួន។ ជាមួយគ្នានេះ គណបក្សក៏នឹងរៀបចំវេទិកាចាក់ផ្សព្វផ្សាយគោលនយោបាយនៅក្នុងតំបន់ណាដែលមានមនុស្សច្រើន។
លោក សុខ ឥសាន អ្នកនាំពាក្យគណបក្សប្រជាជនកម្ពុជាថា សម្រាប់ឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់នេះត្រូវធ្វើនៅក្នុងមណ្ឌលនីមួយៗ ដូច្នេះគណបក្សប្រជាជនកម្ពុជាមិនមានការជួបជុំអ្នកគាំទ្រសម្រាប់ហែក្បួនធំនោះទេ ដោយអនុញ្ញាតឱ្យធ្វើនៅតាមឃុំ-សង្កាត់។
លោកថ្លែងថា៖ «យើងធ្វើនៅតាមមណ្ឌល (ឃុំ-សង្កាត់) នីមួយៗ យើងមិនអាចធ្វើឆ្លងទេ បើសិនជាយើងឆ្លង ទី ១ ត្រូវសុំច្បាប់ និងទី ២ ត្រូវគេកាត់ហែក្បួនម្តង។ អ៊ីចឹង យើងមិនអាចធ្វើអ្វីផ្ទុយពីនីតិវិធីរបស់ គ.ជ.ប ដែលបានណែនាំទេ»។
គណបក្សភ្លើងទៀនកាលពីថ្ងៃទី ១៨ ខែឧសភា បានចេញសេចក្តីជូនដំណឹងថា នៅថ្ងៃសៅរ៍ ទី ២១ ខែឧសភា ឆ្នាំ ២០២២ នឹងមានការជួបជុំដង្ហែក្បួនឃោសនាបោះឆ្នោតក្រុមប្រឹក្សា ឃុំ-សង្កាត់ អាណត្តិទី ៥ ថ្ងៃដំបូងរបស់ខ្លួន ដោយមានការអញ្ជើញចូលរួមពីថ្នាក់ដឹកនាំ និងរចនាសម្ព័ន្ធ គ្រប់លំដាប់ថ្នាក់របស់គណបក្សភ្លើងទៀននៅទូទាំងរាជធានី-ភ្នំពេញ នៅវេលាម៉ោង ៧:០០ ព្រឹក ជួបជុំ និងចាប់ផ្ដើមចេញដំណើរនៅបណ្តោយផ្លូវ ៣០ ម៉ែត្រ (ទ្រីហេង ៣) ភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ និងម៉ោង ១៤:០០ រសៀល ជួបជុំ និងចេញដំណើរនៅមហាវិថីអង្គរ ជិតរង្វង់មូលកាំកូស៊ីធី»៕
វីដេអូ៖
