.jpg)
លោកនាយករដ្ឋមន្ត្រី ហ៊ុន សែន ជួបពិភាក្សាការងារជាមួយនាយករដ្ឋមន្ត្រីឥណ្ឌាលោក ណារិន ដ្រា ម៉ូឌី តាមប្រព័ន្ធវីដេអូ។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន ជឿជាក់លើនាយករដ្ឋមន្ត្រីឥណ្ឌា លោក ណារិន ដ្រា ម៉ូឌី (Narendra Modi) ក្នុងការចរចារកដំណោះស្រាយជម្លោះរុស្ស៊ី-អ៊ុយក្រែន បន្ទាប់ពីលោក ម៉ូឌី បានជួបសន្ទនាជាមួយប្រធានាធិបតីរុស្ស៊ី និងអ៊ុយក្រែន ដើម្បីស្ដារស្ថានភាពជម្លោះនេះមករកសន្តិភាពវិញ ដោយលោក ហ៊ុន សែន ចង់ឃើញដំណោះស្រាយជម្លោះរុស្ស៊ី-អ៊ុយក្រែនឱ្យបានឆាប់។
លោក ហ៊ុន សែន បង្ហាញជំនឿបែបនេះក្នុងជំនួបជាមួយលោក ម៉ូឌី តាមប្រព័ន្ធវីដេអូពីភូមិគ្រឹះក្រុងតាខ្មៅរបស់លោកនៅខេត្តកណ្តាលកាលពីល្ងាចថ្ងៃទី ១៨ ខែឧសភា។
នៅក្នុងជំនួបនេះ លោក ម៉ូឌី បានប្រាប់លោក ហ៊ុន សែន ថា លោកបានព្យាយាមចូលរួមចំណែកក្នុងកិច្ចសន្ទនារកដំណោះស្រាយជម្លោះរវាងអ៊ុយក្រែន និងរុស្ស៊ី ដោយលោកបានជួបសន្ទនាជាមួយប្រធានាធិបតីរុស្ស៊ីលោក Vladimir Putin និងប្រធានាធិបតីអ៊ុយក្រែន លោក Volodymyr Zelenskyy កន្លងមកនេះ ដើម្បីធ្វើយ៉ាងម៉េចឱ្យស្ដារស្ថានភាពនេះមករកសន្តិភាពវិញ។
ហ្វេសប៊ុកលោកនាយករដ្ឋមន្ត្រី ហ៊ុន សែន បានបញ្ជាក់ថា៖ «សម្ដេច [លោក ហ៊ុន សែន] មានការជឿជាក់ថា ឥណ្ឌា អាចដើរតួនាទីសមស្របក្នុងការចរចារវាងភាគីទាំង ២ អ៊ុយក្រែន និងរុស្ស៊ី។ សម្ដេចចង់ឃើញដំណោះស្រាយរវាងរុស្ស៊ី-អ៊ុយក្រែនឱ្យបានឆាប់ផងដែរ ដោយសារវាមានផលប៉ះពាល់ដល់សកលលោក ជាពិសេស លើវិស័យសន្តិសុខស្បៀង និងថាមពលដែលប៉ះពាល់ដល់ប្រទេសទាំងអស់»។
លោក ថុង ម៉េងដាវិត អ្នកសិក្សាស្រាវជ្រាវនៅមជ្ឈមណ្ឌលមេគង្គសម្រាប់ការសិក្សាយុទ្ធសាស្ត្រនៃវិទ្យាស្ថានចក្ខុវិស័យអាស៊ីបានប្រាប់ភ្នំពេញប៉ុស្តិ៍ថា សង្គ្រាមនៅអ៊ុយក្រែនបានបង្កឱ្យមានបញ្ហាសន្តិសុខស្បៀង និងថាមពល និងបានជះឥទ្ធិពលអវិជ្ជមានដល់សេដ្ឋកិច្ចសកលលោកផងដែរ។
លោក ហ៊ុន សែន លើកដៃស្វាគមន៍សមភាគីឥណ្ឌាមុនប្រជុំ។ រូបថត SPM
លោកថ្លែងថា៖ «ឥណ្ឌាគឺជាដៃគូយោធាដ៏សំខាន់មួយរបស់រុស្ស៊ីដែលឥណ្ឌាបានទិញសព្វាវុធជាច្រើនពីរុស្ស៊ី ដើម្បីពង្រឹងយោធារបស់ខ្លួន។ ដូចនេះឥណ្ឌាក៏ជាតួអង្គសំខាន់ក្នុងការសម្របសម្រួលឱ្យរុស្ស៊ីគិតពីវិបត្តិសេដ្ឋកិច្ចរបស់ខ្លួន ក៏ដូចជាសកលលោកទាំងមូល។ ការចូលរួមរបស់ឥណ្ឌាក៏ដូចជាកម្ពុជាក្នុងនាមជាប្រធានអាស៊ាននឹងបន្តខិតខំធ្វើយ៉ាងណាស្វែងរកដំណោះស្រាយសន្តិភាព ដែលជាបច្ច័យឈ្នះ ឈ្នះដល់ភាគីជម្លោះ។
លោក ម៉េងដាវិត ថ្លែងថា បញ្ហាសង្គ្រាមនៅអ៊ុយក្រែននេះផងដែរក៏ទាមទារឱ្យមានការចូលរួមពីមហាអំណាចដទៃទៀតផងដែរ ដូចជាចិន អឺរ៉ុប និងសហរដ្ឋអាមេរិកក្នុងការកាត់បន្ថយភាពតានតឹង និងបង្កើតឱ្យមានបរិយាកាសសមស្របក្នុងការចរចាស្មោះត្រង់រវាងអ៊ុយក្រែន និងរុស្ស៊ី។
កាលពីថ្ងៃទី ១៧ ខែឧសភា ថ្មីៗនេះក្រុមឧត្តមមន្ត្រីការពារជាតិអាស៊ានបានសម្រេចឱ្យមានលំហាត់លម្ហសមុទ្រអាស៊ាន-ឥណ្ឌា ដើម្បីលើកកម្ពស់វិស័យសន្តិសុខរវាងបណ្តាប្រទេសជាសមាជិកអាស៊ានជាមួយឥណ្ឌាក្នុងទិសដៅជំរុញសាមគ្គីភាពជាមួយគ្នា។
លោក ហ៊ុន សែន ថ្លែងថា គោលនយោបាយឆ្ពោះមកខាងកើតរបស់ប្រទេសឥណ្ឌា គឺត្រូវនឹងគោលនយោបាយរបស់អាស៊ាន ដែលផ្សារភ្ជាប់ទំនាក់ទំនងជាមួយប្រទេសឥណ្ឌា ហើយលោកចាត់ទុកប្រទេសឥណ្ឌាជាដៃគូយុទ្ធសាស្ត្រសំខាន់មួយ។
ហ្វេសប៊ុកលោក ហ៊ុន សែន បានដកស្រង់សម្ដីលោក ម៉ូឌី ថា ឥណ្ឌានឹងផ្ដល់នូវឥណទានចំនួន ១ ពាន់លានដុល្លារ សម្រាប់ប្រទេសកម្ពុជាក្នុងការប្រើប្រាស់សម្រាប់កិច្ចសហប្រតិបត្តិការមេគង្គ-គង្គា។
ស្ថានទូតឥណ្ឌាប្រចាំកម្ពុជាបានបញ្ជាក់ក្នុងសេចក្តីប្រកាសព័ត៌មាននៅថ្ងៃទី ១៩ ខែឧសភាថា មេដឹកនាំទាំង ២ បានផ្លាស់ប្តូរទស្សនៈលើបញ្ហាតំបន់ និងពិភពលោកដែលជាប្រយោជន៍រួម ហើយលោក ម៉ូឌី បានអបអរសាទរកម្ពុជា ដែលបានចូលកាន់តំណែងជាប្រធានអាស៊ានឆ្នាំនេះ និងបានធានាគាំទ្រ និងជួយកម្ពុជាពេញទំហឹង ដើម្បីទទួលបានជោគជ័យក្នុងឋានៈជាប្រធានអាស៊ាន។
ក្រសួងការបរទេសកម្ពុជាបញ្ជាក់ក្នុងសេចក្តីប្រកាសព័ត៌មាននៅថ្ងៃទី ១៩ ខែឧសភាថា លោក ហ៊ុន សែន បានបានអញ្ជើញលោក ម៉ូឌី មកបំពេញទស្សនកិច្ចនៅកម្ពុជា និងចូលរួមកិច្ចប្រជុំកំពូលអាស៊ាន-ឥណ្ឌា ព្រមទាំងកិច្ចប្រជុំកំពូលពាក់ព័ន្ធផ្សេងទៀតក្នុងខែវិច្ឆិកា ហើយលោក ម៉ូឌី បានទទួលយកការអញ្ជើញនេះ។ កម្ពុជា និងឥណ្ឌាបានបង្កើតទំនាក់ទំនងការទូតតាំងពីឆ្នាំ ១៩៨១ ដែលមកដល់ពេលនេះ គឺជាខួបលើកទី ៧០៕
