កំពង់ស្ពឺ/ខេត្តកំពង់ឆ្នាំងៈ ក្រុមការងារនៃមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់-CMAC) បានសហការជាមួយនឹងប៉ុស្តិ៍នគរបាលរដ្ឋបាលចំនួន ៥ ប៉ុស្តិ៍ ដើម្បីប្រមូលគ្រាប់យុទ្ធភណ្ឌមិនទាន់ផ្ទុះចំនួន ៦ គ្រាប់នាថ្ងៃព្រហស្បតិ៍ទី ១៩ ខែ ឧសភា ឆ្នាំ ២០២២ ក្រោយពីមានការប្រទះឃើញរួចមក។
យោងតាមនគរបាលជាតិបានឱ្យដឹងថា គ្រាប់យុទ្ធភណ្ឌមិនទាន់ផ្ទុះសរុបចំនួន៦គ្រាប់នោះរួមមាន៖គ្រាប់ត្បាល់៦០ ចំនួន០១គ្រាប់, គ្រាប់រ៉ូកែតPG7 ចំនួន០១គ្រាប់, គ្រាប់ផ្លោង៦០mm ចំនួន០១គ្រាប់, គ្រាប់ផ្លោង១០៥ ចំនួន០១គ្រាប់,គ្រាប់ប៊ូមប៊ី ចំនួន០១គ្រាប់ និងគ្រាប់៨១mm ចំនួន០១គ្រាប់។
គ្រាប់យុទ្ធភណ្ឌមិនទាន់ផ្ទុះទាំងនោះត្រូវបានប្រគល់ជូនអង្គភាពស៊ីម៉ាក់ ដើម្បីកម្ទេចចោលតាមលក្ខណៈបច្ចេកទេស ដើម្បីបង្ការការបង្កគ្រោះថ្នាក់ដល់ពលរដ្ឋមូលដ្ឋាន។
ប៉ុស្តិ៍នគរបាលរដ្ឋទាំងនោះរួមមាន៖ ប៉ុស្តិ៍នគរបាលរដ្ឋបាលមហាសាំង, ប៉ុស្តិ៍នគរបាលរដ្ឋបាលអូរ, ប៉ុស្តិ៍នគរបាលរដ្ឋបាលត្រែងត្រយឹង, ប៉ុស្តិ៍នគរបាលរដ្ឋបាលយាយម៉ៅពេជ្យនិល និងប៉ុស្តិ៍នគរបាលរដ្ឋបាលគីរីវន្ត។
កាលពីថ្ងៃទី១២ ខែឧសភា ឆ្នាំ២០២២នេះផងដែរ កម្លាំងអធិការដ្ឋាននគរបាលស្រុកបរិបូណ៌ ខេត្តកំពង់ឆ្នាំងបានសហការជាមួយកម្លាំងមជ្ឈមណ្ឌលកំចាត់មីនស៊ីម៉ាក់ CMAC ដើម្បីចុះយកគ្រាប់ចាស់ៗមិនទាន់ផ្ទុះចំនួន០២គ្រាប់ យកទៅរក្សាទុកនៅកន្លែងមានសុវត្ថិភាព។ គ្រាប់ទាំងនេះគឺជាប្រភេទគ្រាប់១០៥ម.ម៕