.jpg)
ភ្នំពេញៈ កម្ពុជា និងអាមេរិកបង្ហាញឆន្ទ:ក្នុងការពង្រីកកិច្ចសហប្រតិបត្តិការយោធាបន្ថែមទៀតនៅពេលខាងមុខ និងប្តេជ្ញាបន្តបង្កើនភាពជឿទុកចិត្តរវាងកងទ័ពនៃប្រទេសទាំង២។
ការបង្ហាញឆន្ទៈ និងការប្តេជ្ញានេះធ្វើឡើងក្នុងជំនួបរវាងលោក ហ៊ុន ម៉ាណែត អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការកងទ័ពជើងគោកជាមួយលោកស្រី Lori Abele នាយកគោលនយោបាយអាស៊ីខាងត្បូង និងអាស៊ីអាគ្នេយ៍នៃក្រសួងការពារជាតិសហរដ្ឋអាមេរិក កាលពីថ្ងៃទី១៨ ខែឧសភា។
ក្នុងជំនួបនោះ ភាគីទាំង២បានពិភាក្សាគ្នាពីកិច្ចសហប្រតិបត្តិការមួយចំនួន ជាពិសេស កិច្ចសហប្រតិបត្តិការយោធារវាងកងទ័ពនៃប្រទេសទាំង២។
សេចក្តីប្រកាសព័ត៌មាននាយកដ្ឋានព័ត៌មានក្រសួងការពារជាតិកម្ពុជាបញ្ជាក់ថា៖ «ភាគីទាំង២បានវាយតម្លៃខ្ពស់លើកិច្ចសហប្រតិបត្តិការដែលមានកន្លងមក និងបានបង្ហាញឆន្ទ:ក្នុងការរក្សា ពង្រឹង និងពង្រីកកិច្ចសហប្រតិបត្តិការយោធាបន្ថែមទៀតនៅពេលខាងមុខ និងការបន្តបង្កើនភាពជឿទុកចិត្តរវាងកងទ័ពនៃប្រទេសទាំង២ផងដែរ»។
លោក ហ៊ុន ម៉ាណែត អរគុណរដ្ឋាភិបាល និងក្រសួងការពារជាតិសហរដ្ឋអាមេរិក ដែលបានជួយឧបត្ថម្ភ និងបណ្តុះបណ្តាលដល់កងទ័ពកម្ពុជាកន្លងមក ខណៈលោកស្រី Lori Abele ក៏បានអរគុណកម្ពុជា ដែលបានចូលរួមជាមួយសហរដ្ឋអាមេរិក ក្នុងកិច្ចការសន្តិសុខកន្លងមកផងដែរ៕
