មន្ត្រីជាន់ខ្ពស់នៃក្រសួងបរិស្ថាន បានលើកឡើងថា មន្ត្រីឧទ្យានុរក្ស និងជាមន្ត្រីនគរបាលយុត្តិធម៌ដើរតួនាទីសំខាន់ក្នុងការការពារនិងអភិរក្សធនធានធម្មជាតិទាំងការចុះល្បាត បង្ក្រាប និងទប់ស្កាត់បទល្មើស និងការអនុវត្តច្បាប់ប្រឆាំងនឹងបទល្មើស ដែលបានកើតឡើង នៅក្នុងតំបន់ការពារធម្មជាតិ។
នេះជាការថ្លែងរបស់លោក នេត្រ ភក្ត្រា រដ្ឋលេខាធិការ និងជាអនុប្រធានអចិន្ត្រៃយ៍ក្រុមការងារប្រឆាំងការសម្អាតប្រាក់ នៃក្រសួងបរិស្ថាន នាព្រឹកថ្ងៃទី១៩ ខែឧសភា ឆ្នាំ២០២២ ក្នុងពិធីបើកវគ្គបណ្តុះបណ្តាលមន្ត្រីឧទ្យានុរក្សជាមន្ត្រីនគរបាលយុត្តិធម៌ និងមន្ត្រីអនុវត្តច្បាប់ចំនួន ៥០ រូប របស់មន្ទីរបរិស្ថានខេត្តរតនគិរី។
ការបណ្តុះបណ្តាលនេះស្តីអំពីគោលការណ៍ណែនាំស្តីពីបែបបទ និងនីតិវិធីប្រតិបត្តិស្តង់ដាសម្រាប់ស៊ើបអង្កេត និងការរៀបចំសំណុំរឿងសម្អាងបទល្មើស និងបទល្មើសសម្អាតប្រាក់ដែលពន្លាតចេញពីបទល្មើសដើមនៃបទល្មើសធនធានធម្មជាតិ។
លោកបានថ្លែងថា ៖ «មន្ត្រីឧទ្យានុរក្សទាំងអស់មិនមែនត្រឹមតែជាបំពេញតួនាទីភារកិច្ចតាមឯកសណ្ឋានរបស់ខ្លួន ក្នុងការការពារនិងអភិរក្សធនធានធម្មជាតិនោះទេ ប៉ុន្តែក៏បំពេញតួនាទីជាឪពុកម្តាយជីដូនជីតា ក្នុងការការពារនិងអភិរក្សព្រៃឈើសត្វព្រៃ និងធនធានធម្មជាតិផ្សេងទៀតដើម្បីបន្សល់ទុកសម្រាប់កូនចៅជំនាន់ក្រោយរបស់យើងរាប់ជំនាន់ទៀត»។
គួរបញ្ជាក់ថា ក្នុងកិច្ចខិតខំប្រឹងប្រែងប្រយុទ្ធប្រឆាំងនឹងបទល្មើសសម្អាតប្រាក់និងហិរញ្ញប្បទានភេរវកម្មពាក់ព័ន្ធនឹងបទល្មើសធនធានធម្មជាតិ ក្រសួងបរិស្ថាន បានចូលរួមយ៉ាងសកម្មជាមួយក្រសួងស្ថាប័ន ពាក់ព័ន្ធរបស់រាជរដ្ឋាភិបាល ដើម្បីពង្រឹងយន្តការ និងបង្កើនប្រសិទ្ធភាពនៃការទប់ស្កាត់បទល្មើសនៃការសម្អាតប្រាក់។
រហូតមកដល់ពេលនេះ មន្ត្រីនគរបាលយុត្តិធម៌ជាច្រើនរយនាក់នៃមន្ទីរបរិស្ថានចំនួន ៦ ដែលមានតំបន់ការពារធម្មជាតិ បានទទួលការបណ្តុះបណ្តាលគោលការណ៍ណែនាំស្តីពីបែបបទ និងនីតិវិធីប្រតិបត្តិស្តង់ដាសម្រាប់ស៊ើបអង្កេត និងការរៀបចំសំណុំរឿងសម្អាងបទល្មើស និងបទល្មើសសម្អាតប្រាក់ដែលពន្លាតចេញពីបទល្មើសដើមនៃបទល្មើសធនធានធម្មជាតិ។
ខេត្តរតនគិរីគឺជាខេត្ត ទី៦ បន្ទាប់ពីខេត្តកំពង់ស្ពឺ ខេត្តកែប ខេត្តកំពត ខេត្តក្រចេះ ស្ទឹងត្រែង ដែលក្រសួងបរិស្ថានបានរៀបចំវគ្គបណ្តុះបណ្តាលក្នុងគោលបំណង ដើម្បីពង្រឹងយន្តការ និងបង្កើនសមត្ថភាពមន្ត្រីអនុវត្តច្បាប់ប្រឆាំងនឹងបទល្មើសនៃការសម្អាតប្រាក់។
លោក នេត្រ ភក្ត្រា បានបន្តថា ក្រសួងបរិស្ថានមានមន្ត្រីនគរបាលយុត្តិធម៌ និងមន្ត្រីអនុវត្តច្បាប់សរុបជាង ១២០០ នាក់ដែលត្រូវទទួលការបណ្តុះបណ្តាលពង្រឹងសមត្ថភាព ក្នុងកិច្ចការប្រឆាំងនឹងការសម្អាតប្រាក់។
មន្ត្រីបរិស្ថានរូបនេះ ក៏បានជំរុញឱ្យមន្ត្រីនគរបាលយុត្តិធម៌ និងមន្ត្រីអនុវត្តច្បាប់ ត្រូវតែបង្កើនការយកចិត្តទុកដាក់ និងបន្តអនុវត្តច្បាប់ឱ្យបានហ្មត់ចត់ និងប្រកបដោយការទទួលខុសត្រូវ និងវិជ្ជាជីវៈដើម្បីបង្កើនប្រសិទ្ធភាពខ្ពស់ក្នុងកិច្ចការពារ និងអភិរក្សធនធានធម្មជាតិ និងជាពិសេសទប់ស្កាត់ និងបង្ក្រាបបទល្មើសទាក់ទងនឹងការសម្អាតប្រាក់និងហិរញ្ញប្បទានភេរវកម្មពាក់ព័ន្ធនឹងបទល្មើសធនធានធម្មជាតិ៕