ភ្នំពេញៈ សហភាពអឺរ៉ុបបានត្រៀមកញ្ចប់ហិរញ្ញប្បទានប្រមាណ ១ ៤៣២,៦៣ លានអឺរ៉ូ ដើម្បីអនុវត្តយុទ្ធសាស្ត្រអឺរ៉ុបរួមស្តីពីកិច្ចសហប្រតិបត្តិការអភិវឌ្ឍន៍នៅកម្ពុជា ឆ្នាំ ២០២១-២០២៧ ដោយផ្តោតសំខាន់លើការពង្រឹងការស្ដារសង្គម សេដ្ឋកិច្ច ព្រមទាំងបញ្ហាអន្តរវិស័យ រួមមាន សិទ្ធិមនុស្ស សមភាពយេនឌ័រ, ភាពអង់អាចរបស់ស្ត្រី និងយុវជន, ការប្រែប្រួលអាកាសធាតុ និងការអភិវឌ្ឍប្រកបដោយចីរភាព។
នេះបើយោងតាមសេចក្តីប្រកាសព័ត៌មាននៃកិច្ចប្រជុំពិភាក្សាលើយុទ្ធសាស្ត្រអឺរ៉ុបរួមស្តីពីកិច្ចសហប្រតិបត្តិការអភិវឌ្ឍន៍នៅកម្ពុជា ឆ្នាំ ២០២១-២០២៧ រវាងរាជរដ្ឋាភិបាលកម្ពុជា និងដៃគូអឺរ៉ុបថ្ងៃទី ១៨ ខែឧសភាឆ្នាំ ២០២២ ដែលដឹកនាំដោយ លោក ឈៀង យ៉ាណារ៉ា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការគណៈកម្មាធិការនីតិសម្បទា និងអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍-កម្ពុជា និងលោកស្រី Carmen Moreno ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជា។
កិច្ចប្រជុំនេះមានការចូលរួមពីមន្ត្រីជាន់ខ្ពស់ និងមន្ត្រីជំនាញមកពីក្រសួង-ស្ថាប័នរបស់រាជរដ្ឋាភិបាលចំនួន ២៩ ស្ថាប័ន និងឯកអគ្គរដ្ឋទូត,មន្ត្រីជាន់ខ្ពស់ស្ថានទូត និងប្រធានកិច្ចសហប្រតិបត្តិការអភិវឌ្ឍន៍នៃសហភាពអឺរ៉ុប បណ្ដាប្រទេសជាសមាជិកសហភាពអឺរ៉ុប និងស្វ៊ីសប្រមាណ ១០ ប្រទេសក្នុងគោលដៅចម្បងដើម្បីពិភាក្សាលើយុទ្ធសាស្ត្រអឺរ៉ុបរួមស្តីពីកិច្ចសហប្រតិបត្តិការអភិវឌ្ឍន៍នៅកម្ពុជាឆ្នាំ ២០២១-២០២៧។
តាមរយៈយុទ្ធសាស្ត្រនេះដៃគូអឺរ៉ុបនឹងផ្តោតលើវិស័យអាទិភាពចំនួន ៦ រួមមាន ១- ការពង្រឹងគណនេយ្យភាពតាមបែបប្រជាធិបតេយ្យ ២- ការជំរុញការចូលរួមតាមបែបប្រជាធិបតេយ្យ ៣- ការអភិវឌ្ឍធនធានមនុស្ស ៤- ការពង្រឹងភាពប្រកួតប្រជែងកម្ពុជាក្នុងទីផ្សារតំបន់ និងសកល ៥- ការលើកកម្ពស់ការអភិវឌ្ឍបៃតងប្រកបដោយចីរភាព និង ៦- ការពង្រឹងកិច្ចអភិរក្សបេតិកភណ្ឌវប្បធម៌កម្ពុជា។
បន្ថែមលើនេះ យុទ្ធសាស្ត្រអឺរ៉ុបរួមក៏នឹងចូលរួមក្នុងការជំរុញឌីជីថលភាវូបនីយកម្មនៅកម្ពុជា និងគាំទ្រដល់រាជរដ្ឋាភិបាលក្នុងការធានាឱ្យបាននូវដំណោះស្រាយប្រព័ន្ធព័ត៌មានវិទ្យាប្រកបដោយចីរភាព និងសមិតភាព និងអនុលោមភាពតាមបទដ្ឋាន និងស្តង់ដាអន្តរជាតិ ជាពិសេសលើការការពារទិន្នន័យ។
លោក Jacques Pellet ឯកអគ្គរដ្ឋទូតបារាំងប្រចាំកម្ពុជាដែលជាប្រធានក្រុមប្រឹក្សាសហភាពអឺរ៉ុបថ្លែងថា យុទ្ធសាស្ត្រថ្មីនេះមានសង្គតិភាពជាមួយយុទ្ធសាស្ត្រចតុកោណដំណាក់កាលទី ៤ របស់រាជរដ្ឋាភិបាលកម្ពុជា ហើយដៃគូអឺរ៉ុបបានកំណត់អាទិភាពជាសកលលើការលើកកម្ពស់ថាមពលបៃតង, ការពង្រឹងកិច្ចសហប្រតិបត្តិការពហុភាគី និងការគោរពសណ្ដាប់ធ្នាប់សកលដែលផ្អែកតាមច្បាប់។
លោកថ្លែងថា៖ «យុទ្ធសាស្ត្រថ្មីនេះនឹងរួមចំណែកដល់ការអនុវត្តរបៀបវារៈឆ្នាំ ២០៣០ និងគោលដៅអភិវឌ្ឍន៍ប្រកបដោយចីរភាព ក៏ដូចជា ផ្តល់ការគាំទ្រដល់កម្ពុជាក្នុងការពង្រឹងការតភ្ជាប់ក្នុងតំបន់អាស៊ាន ព្រមទាំងធ្វើឱ្យប្រសើរឡើងនូវសមាហរណកម្មក្នុងតំបន់ និងសកល»។
លោកស្រី Carmen Moreno ឯកអគ្គរដ្ឋទូតសហភាពអឺរ៉ុបប្រចាំកម្ពុជាបានបញ្ជាក់ពីភាពចាំបាច់ និងភាពពាក់ព័ន្ធរបស់យុទ្ធសាស្ត្រអឺរ៉ុបរួមក្នុងការអនុវត្តគោលនយោបាយរបស់សហភាព-អឺរ៉ុបនៅកម្ពុជាដែលក្នុងនោះរួមមាន យុទ្ធសាស្ត្រ ឥណ្ឌូប៉ាស៊ីហ្វិក ឬយុទ្ធសាស្ត្រច្រកសកល។
លោកស្រី បន្ថែមថា យុទ្ធសាស្ត្រអឺរ៉ុបរួមស្តីពីកិច្ចសហប្រតិបត្តិការអភិវឌ្ឍន៍នៅកម្ពុជា ឆ្នាំ ២០២១-២០២៧ នឹងគាំទ្រដៃគូអឺរ៉ុប និងកម្ពុជា, រដ្ឋាភិបាល, សង្គមស៊ីវិល និងវិស័យឯកជនក្នុងការបង្កើនភាពផ្សារភ្ជាប់ប្រកបដោយចីរភាព ស្របតាមស្តង់ដាបរិស្ថាន និងសង្គម។
លោក ឈៀង យ៉ាណារ៉ា រដ្ឋមន្ត្រីប្រតិភូអមនាយករដ្ឋមន្ត្រី និងជាសហប្រធាននៃកិច្ចប្រជុំបានស្វាគមន៍ និងវាយតម្លៃខ្ពស់ចំពោះយុទ្ធសាស្ត្រអឺរ៉ុបរួមដែលជាក្របខ័ណ្ឌគោលនយោបាយរួមរបស់សហភាពអឺរ៉ុប និងប្រទេសសមាជិកដែលតម្រឹមជាមួយនឹងគោលនយោបាយអភិវឌ្ឍន៍របស់កម្ពុជា ព្រមទាំងរំលេចពីការប្ដេជ្ញារបស់ដៃគូអឺរ៉ុបក្នុងការរួមចំណែកដល់ការពង្រឹង និងពង្រីកកិច្ចសហប្រតិបត្តិការអភិវឌ្ឍន៍នៅកម្ពុជា៕