គម្រោង «កិច្ចគាំពារសង្គមប្រកបដោយបរិយាបន្នដែលឆ្លើយតបទៅនឹងតម្រូវការរបស់កម្មករនិយោជិតក្នុងវិស័យកាត់ដេរ» (ហៅកាត់ថា INSPIRE) នឹងដាក់ឱ្យអនុវត្តនៅដើមសប្តាហ៍ក្រោយ ដោយអង្គការអុកស្វាម និងមូលនិធិ Laudes Foundation ក្នុងគោលបំណងរួមចំណែកជាមួយរាជរដ្ឋាភិបាលកម្ពុជា ក្នុងការពង្រឹងកិច្ចគាំពារសង្គមប្រកបដោយបរិយាបន្នសម្រាប់កម្មករនិយោជិតក្នុងវិស័យកាត់ដេរ។
យោងតាមសេចក្តីប្រកាសព័ត៌មានរួម កាលពីថ្ងៃទី ១៩ ខែឧសភា បានឱ្យដឹងថា អង្គការអុកស្វាម សហការជាមួយអង្គការក្រៅរដ្ឋាភិបាល និងសហជីព-សហភាពកម្មករចំនួនបួន អនុវត្តគម្រោងមួយដែលមានឈ្មោះថា «កិច្ចគាំពារសង្គមប្រកបដោយបរិយាបន្នដែលឆ្លើយតបទៅនឹងតម្រូវការរបស់កម្មករនិយោជិតក្នុងវិស័យកាត់ដេរ»។
គម្រោងនេះ អនុវត្តរួមគ្នាជាមួយដៃគូ និងអ្នកពាក់ព័ន្ធពីឆ្នាំ ២០២២ រហូតដល់ឆ្នាំ ២០២៥ ដើម្បីចូលរួមចំណែកជាមួយរដ្ឋាភិបាលកម្ពុជាក្នុងការលើកកម្ពស់កិច្ចគាំពារសង្គមប្រកបដោយបរិយាបន្នសម្រាប់កម្មករនិយោជិតក្នុងវិស័យកាត់ដេរនៅកម្ពុជា។
តាមរយៈការប្តេជ្ញាចិត្តរបស់រាជរដ្ឋាភិបាលកម្ពុជា គម្រោង INSPIRE នេះនឹងជួយពង្រឹង និងពង្រីកគោលនយោបាយ ប.ស.ស និងជួយជ្រោមជ្រែងរាជរដ្ឋាភិបាលដោះស្រាយបញ្ហាសេសសល់មួយចំនួនទៀត ក្នុងចំណោមកម្មករនិយោជិត ជាពិសេសកម្មករនិយោជិតកិច្ចសន្យាក្នុងវិស័យកាត់ដេររួមមាន៖ កង្វះលទ្ធភាពទទួលបានព័ត៌មានអំពីកិច្ចគាំពារសង្គម និងអត្ថប្រយោជន៍ កង្វះការអនុលោមតាមច្បាប់កំណត់ក្នុងចំណោមនិយោជកឧស្សាហកម្មកាត់ដេរ និងកម្រិតគុណភាពនៃសេវាកម្មកិច្ចគាំពារសង្គមដែលផ្តល់ដល់កម្មករនិយោជិតវិស័យកាត់ដេរ។
លោកស្រី ភាណ សោភ័ណ នាយិកាអង្គការអុកស្វាមបានលើកឡើងថា អង្គការអុកស្វាម ប្តេជ្ញាធ្វើការជាមួយ និងគាំទ្ររាជរដ្ឋាភិបាលកម្ពុជា និងដៃគូពាក់ព័ន្ធដើម្បីកាត់បន្ថយភាពក្រីក្រ និងវិសមភាពក្នុងចំណោមកម្មករនិយោជិតក្នុងវិស័យកាត់ដេរ ជាពិសេសកម្មករនិយោជិតកិច្ចសន្យាដែលភាគច្រើនជានារី ដើម្បីធានាលទ្ធភាពរបស់ពួកគេក្នុងការទទួលបានកិច្ចគាំពារសង្គម ប្រកបដោយបរិយាបន្ន។
លោកស្រីបានថ្លែងថា៖ «ការទទួលបានការគាំពារសង្គម គឺមានសារៈសំខាន់ណាស់សម្រាប់កម្មករនិយោជិត និងក្រុមគ្រួសាររបស់ពួកគេ ព្រោះវាជួយទ្រទ្រង់សុខុមាលភាពរបស់ពួកគេ បង្កើនភាពធន់ និងកាត់បន្ថយហានិភ័យនៃគ្រោះមហន្តរាយ ឬជំងឺរាតត្បាតជាសកលជាដើម»។
រាជរដ្ឋាភិបាលកម្ពុជាបានយកចិត្តទុកដាក់យ៉ាងខ្លាំងលើកិច្ចគាំពារសង្គមសម្រាប់ពលរដ្ឋទាំងអស់គ្នា។ ការយកចិត្តទុកដាក់នេះ គឺសបញ្ជាក់ឱ្យឃើញតាមរយៈ ការផ្តួចផ្តើមអនុវត្តគោលនយោបាយគាំពារសង្គមមួយចំនួន ជាពិសេសបេឡាជាតិសន្តិសុខសង្គម (ប.ស.ស) ដែលបានផ្តល់អត្ថប្រយោជន៍យ៉ាងច្រើនដល់កម្មករនិយោជិតក្នុងវិស័យកាត់ដេរ។ តាមរយៈគោលនយោបាយនេះ កម្មករនិយោជិតអាចទទួលបានសេវាថែទាំសុខភាព និងត្រូវបានគាំពារពីការរងរបួសនៅកន្លែងធ្វើការ ដែលមានសារៈសំខាន់ណាស់ចំពោះសុខុមាលភាព និងភាពធន់របស់ពួកគេ។
ជាក់ស្តែងរបាយការណ៍របស់បេឡាជាតិសន្តិសុខសង្គម ឆ្នាំ ២០២០ បានកត់សម្គាល់ឃើញថា កម្មការិនីកាត់ដេរសរុបចំនួន ៨ ម៉ឺននាក់បានទទួលប្រាក់ឧបត្ថម្ភមាតុភាពពីរដ្ឋាភិបាលដែលមានទឹកប្រាក់សរុបប្រមាណជា ៧,៩ លានដុល្លារអាមេរិក។ បន្ថែមលើនេះទៀត នៅពេលកម្ពុជារងសម្ពាធខ្លាំងពីការរាតត្បាតនៃវីរុសកូវីដ ១៩ កម្មករនិយោជិតដែលបាត់បង់ការងារក៏ត្រូវបានផ្តល់ការគាំទ្រក្នុងទម្រង់ជាសាច់ប្រាក់ផងដែរ។
លោក Jill Tucker ប្រធានកម្មវិធីសិទ្ធិពលកម្ម របស់មូលនិធិ Laudes Foundation មានប្រសាសន៍ថា៖ «គោលនយោបាយសន្តិសុខសង្គមដូចជា ប.ស.ស បានចូលរួមចំណែកជួយពង្រឹងកិច្ចសន្យាសង្គម និងផ្តល់ការការពារជាមូលដ្ឋានដល់កម្មករនិយោជិត ដើម្បីស្នើសុំការគាំទ្រ និងកិច្ចគាំពារពេលពួកគេមានជំងឺ ជួបគ្រោះថ្នាក់នៅកន្លែងធ្វើការ ឬរងផលប៉ះពាល់ដោយវិបត្តិសេដ្ឋកិច្ចជាដើម»។
លោកបានបន្តថា ការបំពេញតាមកិច្ចសន្យានេះបានជំរុញឱ្យសំឡេងកម្មករមានភាពជាតំណាងកាន់តែប្រសើរឡើង និងឆ្លុះបញ្ចាំងនៅក្នុងកិច្ចពិភាក្សាអំពីគោលនយោបាយនានា។
លោក Jill Tucker បានបន្ថែមថា តាមរយៈកិច្ចសហប្រតិបត្តិការជាមួយអង្គការអុកស្វាមលើគម្រោង INSPIRE នេះ យើងខ្ញុំជឿជាក់ថាកម្មករនិយោជិតក្នុងវិស័យកាត់ដេរនៅកម្ពុជានឹងមានលទ្ធភាពកាន់តែច្រើនឡើង ដើម្បីប្រើប្រាស់ និងទទួលបានអត្ថប្រយោជ៍នានាតាមរយៈគោលនយោបាយ ប.ស.ស។
គួរបញ្ជាក់ថា គម្រោង «កិច្ចគាំពារសង្គមប្រកបដោយដោយបរិយាបន្នដែលឆ្លើយតបទៅនឹងតម្រូវការរបស់កម្មករនិយោជិតក្នុងវិស័យកាត់ដេរ» (ហៅកាត់ថា INSPIRE) គឺជាកិច្ចខិតខំប្រឹងប្រែងរវាងអង្គការអុកស្វាម មូលនិធិ Laudes Foundation និងអង្គការ-សហជីពចំនួន ៤ ផ្សេងទៀត។
គម្រោងនេះនឹងត្រូវអនុវត្តរួមគ្នាជាមួយអង្គការ និងសហជីពចំនួនបួនផ្សេងទៀតមានដូចជា៖ មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (CENTRAL), សហភាពការងារកម្ពុជា (CLC), សហព័ន្ធសហជីពកម្ពុជា (CATU), និងសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (C.CAWDU)៕