ភ្នំពេញៈ អាជ្ញាធរមីនអំពាវនាវដល់ភាគីពាក់ព័ន្ធពន្លឿនការគាំទ្រដល់សកម្មភាពបោសសំអាតមីន ដើម្បីសម្រេចបានគោលដៅគ្មានមីននៅកម្ពុជាក្នុងឆ្នាំ ២០២៥ ខណៈកម្ពុជាត្រូវការរំដោះផ្ទៃដីមានមីនដែលបានដឹងចំនួនជាង ៧០០ គីឡូម៉ែត្រក្រឡាត្រឹមឆ្នាំ ២០២៥ នេះ។
លោក លី ធុជ ទេសរដ្ឋមន្ត្រី និងអនុប្រធានទី ១ អាជ្ញាធរមីនថ្លែងថា ដើម្បីបំពេញកាតព្វកិច្ចរបស់កម្ពុជាក្រោមអនុសញ្ញាហាមប្រាមមីនប្រឆាំងមនុស្ស អាជ្ញាធរមីនត្រូវបោសសម្អាតដីដែលមានមីនប្រហែល ៧៣៦ គីឡូម៉ែត្រក្រឡានៅឆ្នាំ ២០២៥។
លោកថ្លែងថា៖ «ទោះបីជាមានមហិច្ឆតាក៏ដោយ ប៉ុន្តែកាលកំណត់ឆ្នាំ ២០២៥ គឺជាគោលដៅដែលអាចសម្រេចបាន ប្រសិនបើរាជរដ្ឋាភិបាលកម្ពុជា សហគមន៍ម្ចាស់ជំនួយអន្តរជាតិ ដៃគូអភិវឌ្ឍន៍ និងវិស័យឯកជនធ្វើការរួមគ្នា និងពន្លឿនការគាំទ្ររបស់ពួកគេចំពោះសកម្មភាពមីន»។
លោកថ្លែងដូច្នេះក្នុងវេទិកាកិច្ចសន្ទនាកម្រិតខ្ពស់ស្តីពីសកម្មភាពមីន នាថ្ងៃទី ២០ ខែឧសភា ដើម្បីពង្រីក និងលើកកម្ពស់ភាពជាដៃគូឆ្ពោះទៅរកកម្ពុជាគ្មានមីនឆ្នាំ ២០២៥ នៅខេត្តសៀមរាបដោយអាជ្ញាធរមីន និងស្ថានទូតអូស្ត្រាលីប្រចាំនៅកម្ពុជាធ្វើជាសហប្រធានដឹកនាំ។
លោក លី ធុជ ថ្លែងថា៖ «ការបរិច្ចាគរបស់អ្នកនឹងធ្វើឱ្យប្រទេសកម្ពុជារួចផុតពីផលប៉ះពាល់យ៉ាងខ្លាំង ដោយសារមីន និងសំណល់ជាតិផ្ទុះពីសង្គ្រាមផ្សេងទៀត។ យើងមិនត្រឹមតែស្នើសុំការបរិច្ចាគដ៏សប្បុរសរបស់អ្នកប៉ុណ្ណោះទេ ប៉ុន្តែយើងក៏ចង់បានជំនួយរបស់អ្នកក្នុងការរៃអង្គាសថវិកា និងធ្វើការជាមួយយើងលើមធ្យោបាយថ្មីក្នុងការរៃអង្គាសថវិកានៅក្នុងប្រទេសផងដែរ ដើម្បីរ៉ាប់រងរាល់ការចំណាយទាំងអស់ ដើម្បីបោសសម្អាត សំណល់ជាតិផ្ទុះពីសង្គ្រាមទាំងអស់នៅកម្ពុជា»។
គណៈប្រតិភូនៃវេទិកាកិច្ចសន្ទនាកម្រិតខ្ពស់ស្តីពីសកម្មភាពមីន ដែលមានតំណាងស្ថានទូតប្រចាំនៅកម្ពុជា ដៃគូអភិវឌ្ឍន៍ និងវិស័យឯកជន ចុះទស្សនកិច្ចនៅសារៈមន្ទីរសន្តិភាពសកម្មភាពកំចាត់មីននៃមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) ដើម្បីស្វែងយល់អំពីសមិទ្ធផលការងារបោសសម្អាតមីន និងសំណល់ជាតិផ្ទុះពីសង្គ្រាមនៅកម្ពុជា ដែលជាលទ្ធផលបានមកពីមរតកនៃសង្គ្រាមរ៉ាំរ៉ៃអស់រយៈពេលជាង ៣ ទសវត្សរ៍នៅកម្ពុជា។
លោក លី ធុជ ថ្លែងថា មជ្ឈមណ្ឌលស៊ីម៉ាក់បានធ្វើការក្នុងភាពជាដៃគូយ៉ាងជិតស្និទ្ធជាមួយអាជ្ញាធរមីន ដែលជាសេនាធិការរបស់រាជរដ្ឋាភិបាលកម្ពុជា ក្នុងការសម្របសម្រួល គ្រប់គ្រង និងត្រួតពិនិត្យវិស័យសកម្មភាពមីននៅកម្ពុជា ក្នុងការឆ្លើយតបនឹងបញ្ហាមីន និងសំណល់ជាតិផ្ទុះពីសង្គ្រាម៕