.jpg)
ទិវាមាត្រាសាស្ត្រពិភពលោកឆ្នាំ ២០២២ គឺ ត្រូវបានប្រារព្ធឡើងក្រោមប្រធានបទ «មាត្រាសាស្ត្រក្នុងយុគសម័យឌីជីថល» ដែលត្រូវបានជ្រើសរើស ដោយសារបច្ចេកវិទ្យាឌីជីថលកំពុងធ្វើបដិវត្តសហគមន៍ ហើយជានិន្នាការដ៏គួរឱ្យចាប់អារម្មណ៍បំផុតមួយនៅក្នុងសង្គមនាពេលបច្ចុប្បន្ននេះ។
ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បានឱ្យដឹងថា ថ្ងៃទី ២០ ខែឧសភា នេះគឺជាថ្ងៃដែលបណ្តាប្រទេសលើពិភពលោកប្រារព្ធទិវាមាត្រាសាស្ត្រពិភពលោក (World Metrology Day)។
ការប្រារព្ធទិវាមាត្រាសាស្ត្រ ពិភពលោកនេះត្រូវបានប្រព្រឹត្តទៅជាប្រចាំឆ្នាំក្នុងគោលបំណងរំឭកអំពីការចុះហត្ថលេខាស្តីពីអនុសញ្ញាខ្នាត ដែលត្រូវបានរៀបចំឡើងនាថ្ងៃទី ២០ ខែឧសភា ឆ្នាំ ១៩៧៥ ដោយក្នុងពេលនោះមានតំណាងប្រទេសចំនួន ១៧ បានចុះហត្ថលេខា។
ក្រសួងបានលើកឡើងតាមរយៈសេចក្តីប្រកាសព័ត៌មានថា មជ្ឈមណ្ឌលមាត្រាសាស្ត្រជាតិនៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ក៏បានគ្រោងរៀបចំទិវាមាត្រាសាស្ត្រពិភពលោកនេះផងដែរ ដើម្បីផ្សព្វផ្សាយពីសារៈសំខាន់ និងឥទ្ធិពលនៃមាត្រាសាស្ត្រក្នុងយុគសម័យឌីជីថលក៏ដូចការរស់នៅតាមរយៈការជួយដោះស្រាយបញ្ហាពាណិជ្ជកម្ម វិទ្យាសាស្ត្រ បច្ចេកវិទ្យា សុវត្ថិភាព និងការធ្វើឱ្យប្រសើរឡើងនូវគុណភាពជីវិត។
សេចក្តីប្រកាសបានឱ្យដឹងថា នៅទូទាំងពិភពលោកវិទ្យាស្ថានមាត្រាសាស្ត្រជាតិខិតខំបន្តធ្វើឱ្យប្រសើរឡើងនូវវិទ្យាសាស្ត្ររង្វាស់រង្វាល់ ដោយអភិវឌ្ឍ និងធ្វើឱ្យមានសុពលភាពបច្ចេកទេសរង្វាស់រង្វាល់ថ្មីៗនៅកម្រិតចាំបាច់នៃភាពទំនើប។
មាត្រាសាស្ត្រ គឺជាវិស័យមួយក្នុងចំណោមវិស័យសំខាន់ៗផ្សេងទៀតដែលពិភពលោកបានយកចិត្តទុកដាក់ ជាពិសេសមាត្រាសាស្ត្រដើរតួនាទីយ៉ាងសំខាន់នៅក្នុងការរស់នៅរបស់មនុស្សជាអាទិ៍ជួយគាំទ្រ សុខុមាលភាពរបស់សង្គមទំនើប ដោយគាំទ្រលើផ្នែកពាណិជ្ជកម្ម បទប្បញ្ញត្តិបច្ចេកទេស ការផលិត និងការការពារអតិថិជន ដោយវាពាក់ព័ន្ធស្ទើរគ្រប់ផ្នែកនៃការរស់នៅប្រចាំថ្ងៃរបស់មនុស្សជាតិ។
ក្រសួងដដែលនេះបានបញ្ជាក់ទៀតថា ព្រះរាជាណាចក្រកម្ពុជាមានក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដែលទទួលខុសត្រូវ និងបំពេញតួនាទីក្នុងការចង្អុលបង្ហាញដល់មជ្ឈមណ្ឌលមាត្រាសាស្ត្រជាតិលើការងារវិទ្យាសាស្ត្រ បច្ចេកវិទ្យាមាត្រាសាស្ត្រ។
ក្នុងនោះដែរ កម្ពុជាក៏បានចូលជារដ្ឋសមាជិក រួមមាន អង្គការនីត្យានុកូលមាត្រាសាស្ត្រ អន្តរជាតិ, អង្គការវេទិកានីត្យានុកូលមាត្រាសាស្ត្រ អាស៊ីប៉ាស៊ីហ្វិក, អង្គការកម្មវិធីមាត្រាសាស្ត្រអាស៊ីប៉ាស៊ីហ្វិក, ក្រុមការងារទី ៣ នៃគណៈកម្មាធិការពិគ្រោះយោបល់អាស៊ានស្តង់ដា និង គុណភាព និងជាសមាជិកអង្កេតការណ៍ក្នុងអង្គការការិយាល័យអន្តរជាតិទម្ងន់ និងរង្វាស់រង្វាល់៕
