កំពតៈ អគ្គនាយកដ្ឋានអន្តោប្រវេសន៍បានចាប់ផ្តើមដំឡើងម៉ាស៊ីនស្គែនកាំរស្មីអ៊ិចនៅតាមច្រកព្រំដែន ក្រោយពីទទួលបានពីរាជរដ្ឋាភិបាលប្រទេសជប៉ុន កាលពីដើមខែឧសភានេះ ដើម្បីជួយទប់ស្កាត់បទល្មើសពិសេសពេលដែលកម្ពុជាកំពុងធ្វើជាម្ចាស់ផ្ទះនៃកិច្ចប្រជុំកំពូលអាស៊ាននៅឆ្នាំនេះ។
យោងតាមអគ្គនាយកដ្ឋានអន្តោប្រវេសន៍បានឱ្យដឹងថា លោក ឡុង ហាបាណា អគ្គនាយករងអន្តោប្រវេសន៍ និងជាប្រធានក្រុមការងារគ្រប់គ្រងម៉ាស៊ីនស្គែនកាំរស្មីអ៉ិចបានចាត់តាំងលោក ព្រំ ង៉ា អនុប្រធាននាយកដ្ឋានរដ្ឋបាលសរុប និងជាអនុប្រធានអចិន្ត្រៃយ៍ឱ្យដឹកនាំក្រុមការងារ ក្រោមកិច្ចសហការជាមួយក្រុមការងារបច្ចេកទេសមកពីប្រទេសហ្វីលីពីន និងសហការី ដើម្បីចុះពិនិត្យទីតាំង និងរៀបចំដំឡើងម៉ាស៊ីនស្គែនកាំរស្មីអ៉ិចនៅប៉ុស្តិ៍នគរបាលច្រកទ្វារព្រំដែនអន្តរជាតិព្រែកចាក ខេត្តកំពត កាលពីថ្ងៃពុធ ទី ១៨ ខែឧសភានេះ។
អគ្គនាយកដ្ឋានអន្តោប្រវេសន៍បានបញ្ជាក់ថា ក្រុមការងារបានបញ្ចប់ការដំឡើងម៉ាស៊ីនស្គែន និងបានធ្វើតេស្តសាកល្បងប្រកបដោយជោគជ័យ ហើយរង់ចាំថ្ងៃដាក់ឱ្យប្រើប្រាស់ជាផ្លូវការពីថ្នាក់ដឹកនាំតែប៉ុណ្ណោះ។
ម៉ាស៊ីនស្គែនកាំរស្មីអ៊ិចទាំង ១១ គ្រឿងនោះ ត្រូវបានរាជរដ្ឋាភិបាលប្រទេសជប៉ុន ផ្តល់ឱ្យកម្ពុជាកាលពីថ្ងៃទី ៤ ខែឧសភា ដើម្បីត្រួតពិនិត្យ ទប់ស្កាត់ បង្ក្រាបការរត់ពន្ធសព្វាវុធ និងគ្រឿងញៀនឆ្លងដែន។ ជាពិសេសដើម្បីចូលរួមការពារដល់ការងារសន្តិសុខជាតិ ខណៈដែលកម្ពុជាកំពុងធ្វើជាម្ចាស់ផ្ទះនៃកិច្ចប្រជុំកំពូលអាស៊ាននៅឆ្នាំនេះ៕