.jpg)
មណ្ឌលគិរីៈ អាជ្ញាធរ និងតំណាងរាស្រ្តខេត្តមណ្ឌលគិរី ធ្វើពិធីសាសនាបួងសួងសុំសេចក្តីសុខ និងសេចក្តីចម្រើនពីម្ចាស់ទឹកដី និងសុំឱ្យទទួលជ័យជម្នះនៅក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ខាងមុខនេះ។
នៅថ្ងៃទី ២០ ខែឧសភា ប្រធានក្រុមប្រឹក្សាខេត្ត អភិបាលខេត្ត តំណាងរាស្រ្ត សមាជិកព្រឹទ្ធសភាប្រចាំភូមិភាគ ៨ និងមន្រ្តីនៃខេត្តមណ្ឌលគិរីបានធ្វើការអុជធូបថ្វាយគ្រឿងសក្ការៈបូជាជូនលោកតាស្រុះ យាយផ្លុំ ភ្នំដោះក្រមុំ ដើម្បីសុំសេចក្តីសុខ និងសេចក្តីចម្រើនជូនដល់ប្រជាពលរដ្ឋនៅក្នុងខេត្តមណ្ឌលគិរី ជាពិសេសសុំឱ្យការបោះឆ្នោតខាងមុខនេះទទួលបានជ័យជម្នះ។ ពិធីនេះធ្វើនៅអាស្រមលោកតា ភ្នំដោះក្រមុំ ស្ថិតនៅក្រុងសែនមនោរម្យ។ នេះបើយោងតាមមន្ទីរព័ត៌មានខេត្តមណ្ឌលគិរី។
មន្ទីរព័ត៌មានខេត្តមណ្ឌលគិរីបានឱ្យដឹងតាមរយៈហ្វេសប៊ុកនាថ្ងៃទី ២០ ខែឧសភាថា៖ «ថ្នាក់ដឹកនាំខេត្ត បានឧទ្ទិសបួងសួងដល់វត្ថុស័ក្តិសិទ្ធក្នុងលោក ជាពិសេសទសបារមីដែលថែរក្សាទឹកដីនៃខេត្តមណ្ឌលគិរី មានលោកតាស្រុះ យាយផ្លុំ សូមតាមជួយឃុំគ្រងថែរក្សាប្រជាពលរដ្ឋក្នុងខេត្ត និងប្រជាពលរដ្ឋទូទាំងប្រទេស សូមឱ្យមានសេចក្តីសុខសេចក្តីចម្រើន និងសុំឱ្យការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ នាពេលនាពេលខាងមុខ ទទួលបានជ័យជម្នះ»។
អភិបាលខេត្តមណ្ឌលគិរី លោក ថង សាវុន អំពាវនាវដល់ប្រជាពលរដ្ឋដែលមានឈ្មោះក្នុងបញ្ជីបោះឆ្នោត ឱ្យចូលរួមបោះឆ្នោះជ្រើសរើសក្រុមប្រឹក្សាឃុំ សង្កាត់ អាណត្តិទី៥ នៅថ្ងៃអាទិត្យ ទី ៥ ខែមិថុនា ខាងមុខនេះ ឱ្យបានគ្រប់ៗគ្នា៕
