ប្រជាពលរដ្ឋងាយរងគ្រោះបំផុតនិងគ្រួសារជនជាតិភាគតិចដែលរស់នៅតំបន់ដាច់ស្រយាល ជាង ៥០០០ គ្រួសារ ក្នុងខេត្តចំនួន ៨ បានទទួលអំណោយមនុស្សធម៌ពីកាកបាទក្រហមកម្ពុជា ក្នុងបេសកកម្ម រយៈពេល២១ ថ្ងៃនិងត្រូវបានស្ថាប័នមនុស្សធម៌មួយនេះ ប្រកាសបិទបញ្ចប់បេសកកម្មនេះផងដែរ កាលពីថ្ងៃទី១៩ ខែឧសភា ឆ្នាំ២០២២។
យោងតាមកាកបាទក្រហមកម្ពុជា បានឱ្យដឹងនៅថ្ងៃទី២០ ខែឧសភា នេះថា បេសកកម្មរយៈពេល ២១ថ្ងៃ ក្នុងការចែកអំណោយមនុស្សធម៌ជូនដល់ប្រជាពលរដ្ឋងាយរងគ្រោះបំផុត និងគ្រួសារជនជាតិភាគតិចរស់នៅតំបន់ឆ្ងាយដាច់ស្រយាលបានបិទបញ្ចប់។
កាកបាទក្រហមកម្ពុជាបានលើកឡើងថា ៖ «បេសកកម្មរយៈពេល២១ថ្ងៃនេះគឺបានចាប់ផ្តើមអនុវត្តចាប់ពីថ្ងៃទី២៩ ខែមេសា នៅតាមបណ្តាខេត្តចំនួន៨ ដោយសម្រេចបានការផ្តល់អំណោយមនុស្សធម៌ជូនដល់ប្រជាពលរដ្ឋងាយរងគ្រោះបំផុតសរុបចំនួន ៥ ២៩២ គ្រួសារ ដែលជាចាស់អត់ទីពឹង គ្រួសារជនជាតិភាគតិច ជនមានពិការភាព អតីតយុទ្ធជនពិការដោយសារសង្គ្រាមនិងរងគ្រោះថ្នាក់ដោយសារមីន ស្ត្រីមេម៉ាយមានកូនច្រើន កុមារកំព្រា និងអ្នកផ្ទុកមេរោគអេដស៍»។
លោកស្រី ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា បានឱ្យដឹងថា បេសកកម្មមនុស្សធម៌នេះត្រូវបានប្រធានកាកបាទក្រហមកម្ពុជា លោកស្រី ប៊ុន រ៉ានី ចាត់តាំងឱ្យមន្ត្រីនៃទីស្នាក់ការកណ្តាល បែងចែកជា២គោលដៅ។
លោកស្រី ម៉ែន នារីសោភ័គថា គោលដៅទី១ ដឹកនាំដោយលោកស្រីផ្ទាល់ ចុះបំពេញការងារនៅខេត្តកំពង់ស្ពឺ កំពង់ឆ្នាំង ឧត្តរមានជ័យ និងខេត្តព្រះវិហារ។ ចំណែកឯគោលដៅទី២ គឺដឹកនាំដោយលោក អ៊ុយ សំអាត នាយកនាយកដ្ឋានគ្រប់គ្រងគ្រោះមហន្តរាយ កាកបាទក្រហមកម្ពុជា ចុះបំពេញការងារនៅខេត្តក្រចេះ ស្ទឹងត្រែង រតនគិរី និងមណ្ឌលគិរី។
លោកស្រីបានបន្ថែមថា៖ «សម្រាប់ថ្ងៃទី១៩ ខែឧសភា ដែលជាថ្ងៃបិទបញ្ចប់បេសកកម្មនេះ គឺត្រូវបានបញ្ចប់នៅត្រឹមខេត្តព្រះវិហារ សម្រាប់ប្រជាពលរដ្ឋងាយរងគ្រោះបំផុតចំនួន ២៣០គ្រួសារ និងនៅខេត្តមណ្ឌលគិរី សម្រាប់គ្រួសារជនជាតិភាគតិចសរុបចំនួន ៧២៥គ្រួសារ»។
នាឱកាសនោះដែរ លោកស្រី ម៉ែន នារីសោភ័គ បានគូសបញ្ជាក់ថា ថ្វីបើលោកស្រី ប៊ុន រ៉ានី មានធុរៈនិងកិច្ចការងារជាច្រើនដែលមិនអាចអញ្ជើញមកផ្ទាល់ក៏ដោយ ក៏លោកស្រីតែងតែផ្តល់អនុសាសន៍ឱ្យមន្ត្រីក្រោមឱវាទចុះពិនិត្យស្ថានភាពជាក់ស្តែងពីជីវភាពរស់នៅរបស់ប្រជាពលរដ្ឋងាយរងគ្រោះបំផុត ដើម្បីដោះស្រាយជួយសម្រាលការលំបាកឱ្យបានទាន់ពេលវេលា ដោយមិនទុកនរណាម្នាក់ចោលឡើយ។
សូមបញ្ជាក់ថា ក្នុងចំណោមប្រជាពលរដ្ឋទទួលផលទាំង ៥២៩២គ្រួសារ ក្នុងនោះខេត្តកំពង់ស្ពឺ មាន ៨៣៩គ្រួសារ, ខេត្តកំពង់ឆ្នាំង ៣០៥គ្រួសារ, ខេត្តឧត្តរមានជ័យ ៦០៩គ្រួសារ, ខេត្តព្រះវិហារ ២៣០គ្រួសារ, ខេត្តក្រចេះ ១០៣១គ្រួសារ, ខេត្តស្ទឹងត្រែង ៧៧៥គ្រួសារ, ខេត្តរតនគិរី ៧៧៨គ្រួសារ និងខេត្តមណ្ឌលគិរី ៧២៥គ្រួសារ។
គ្រួសារនីមួយៗទទួលបាន អង្ករ ២៥គីឡូក្រាម, មី ១កេស, ត្រីខ ១០កំប៉ុង, ទឹកត្រី ឬទឹកស៊ីអ៊ីវ ១យួរ, ជែលលាងដៃ ១ដប, ឃីត (មុង ភួយ សារុង ក្រមា អាវយឺត) ១កញ្ចប់ និងថវិកា ២ម៉ឺនរៀល៕