ភ្នំពេញៈ ក្រុមការងាររដ្ឋបាលព្រៃឈើនៃក្រសួងកសិកម្ម រុក្ខាប្រមាញ់ និងនេសាទបានរៀបចំសិក្ខាសាលាមួយ ដើម្បីចាប់ផ្ដើមអនុវត្តគម្រោងពិគ្រោះយោបល់ និងផ្សព្វផ្សាយអំពីការចុះបញ្ជីដីសហគមន៍ព្រៃឈើរបស់គម្រោងលើកកម្ពស់ផលិតកម្មឫស្សីដោយនិរន្តរភាព តាមរយៈសហគមន៍ព្រៃឈើ ដើម្បីបង្កើនជីវភាព និងអេកូស៊ីស្ទែមព្រៃឈើកាលពីថ្ងៃពុធទី ១៨ ខែឧសភាឆ្នាំ ២០២២ នេះ។ នេះបើយោងតាមរដ្ឋបាលព្រៃឈើកាលពីថ្ងៃទី ១៩ ខែឧសភានេះ។
រដ្ឋបាលព្រៃឈើបានឱ្យដឹងថាសិក្ខាសាលានេះមានការចូលរួមពីថ្នាក់ដឹកនាំនាយកដ្ឋាន ក្រុមការងារគ្រប់គ្រងគម្រោងនៃរដ្ឋបាលព្រៃឈើ ព្រមទាំងប្រធានមន្ទីរកសិកម្ម រុក្ខាប្រមាញ់ និងនេសាទ នាយ នាយរង មន្ដ្រីនៃខណ្ឌរដ្ឋបាលព្រៃឈើព្រះវិហារ និងគណៈកម្មាធិការសហគមន៍ព្រៃឈើសរុបចំនួន ៣៦ រូបផងដែរ។
គម្រោងបង្កើនជីវភាព និងអេកូស៊ីស្ទែមព្រៃឈើនេះគឺនៅក្នុងសហគមន៍ព្រៃឈើចំបក់ហោះ សហគមន៍ព្រៃឈើថ្នលកែងត្រពាំងផ្ចឹក និងសហគមន៍ព្រៃឈើសាមគ្គីត្រពាំងទន្ទឹមស្ថិតក្នុងខេត្ដព្រះវិហារ។
សិក្ខាសាលានេះមានគោលបំណង ដើម្បីបង្ហាញពីគោលបំណងនៃគម្រោង និងការចាប់ផ្ដើមអនុវត្តគម្រោង, ផ្សព្វផ្សាយអំពីប្រយោជន៍នៃការចុះបញ្ជីដីសហគមន៍ព្រៃឈើទាំង ៣ និងគោលបំណងចុងក្រោយគឺ ពិគ្រោះយោបល់អំពីដំណើរការនៃការចុះបញ្ជីដីព្រៃសហគមន៍ទាំង ៣ ខាងលើ។
កាលពីឆ្នាំ ២០២១ កន្លងមក ព្រៃសហគមន៍ថ្មីចំនួន ៧ បន្ថែមទៀតត្រូវបានក្រសួងកសិកម្មរុក្ខាប្រមាញ់ និងនេសាទបានប្រកាសទទួលស្គាល់ ដែលធ្វើឱ្យព្រៃសហគមន៍ដែលចុះបញ្ជីរួចនៅទូទាំងប្រទេសកម្ពុជាសរុបមានចំនួន ៥៣៦ ដែលគ្របដណ្តប់លើផ្ទៃដីជាង ៤ សែនហិកតា៕