.jpg)
រូបភាព អាជ្ញាធរជាតិព្រះវិហារ
ព្រះវិហារៈ អាជ្ញាធរជាតិព្រះវិហារនៅថ្ងៃទី ២០ ខែឧសភា បានប្រទះឃើញបំណែកឧបករណ៍ប្រើប្រាស់ជាលោហៈ (ថូ ឬក្អម) នៅក្បែរប្រាសាទតូចនៅជើងភ្នំប្រាសាទព្រះវិហារក្នុងតំបន់ការពារទី ២ រមណីយដ្ឋានប្រាសាទព្រះវិហារ។ នេះបើយោងតាមអាជ្ញាធរជាតិព្រះវិហារ។
អាជ្ញាធរជាតិព្រះវិហារបានឱ្យដឹងតាមរយៈហ្វេសប៊ុកនាថ្ងៃទី ២០ ខែឧសភា ថា វត្ថុសិល្បៈជាឧបករណ៍អំពីលោហៈដែលប្រទះឃើញនេះមានបំណែក ក មានទំហំ ៦ សង់ទីម៉ែត្រគុណនឹង ១១ សង់ទីម៉ែត្រ និងបំណែកតួខ្លួនមានកម្ពស់ ១២ សង់ទីម៉ែត្រ។
ប្រភពដដែលបន្តថា នៅលើបំណែកតួខ្លួនមានចារអក្សរមួយបន្ទាត់ដែលតាមអ្នកជំនាញភាសាវិទ្យាបានកំណត់ថាជាអក្សរសិ្ថតនៅចុងសតវត្សរ៍ទី ១២ ក្នុងរជ្ជកាលព្រះបាទជ័យវរ័ន្មទី ៧ ដែលជាវត្ថុជាដង្វាយចំពោះទេពភៃសជ្យគុរុ ដែលមានតម្កល់នៅក្នុងអរោគ្យសាលា ឬប្រាសាទតូចដែលជាហោបន់ស្រន់របស់មន្ទីរពេទ្យ។
អាជ្ញាធរជាតិព្រះវិហារបញ្ជាក់ថា៖ «ការប្រទះឃើញនូវឧបករណ៍អំពីលោហៈខាងលើគឺជាទិន្នន័យមួយយ៉ាងសំខាន់នៅក្នុងការសិក្សាស្រាវជ្រាវអំពីអរោគ្យសាលានៅតំបន់ប្រាសាទព្រះវិហារបន្ថែមទៀត ក៏ដើម្បីរក្សាទុក និងតាំងបង្ហាញនៅក្នុងសារមន្ទីរធម្មជាតិសាកលសម្តេចតេជោ ហ៊ុន សែន ព្រះវិហារ»៕
