ភ្នំពេញៈ គណបក្សនយោបាយបានចាប់ផ្តើមធ្វើការឃោសនាបោះឆ្នោតជ្រើសរើសក្រុមប្រឹក្សាឃុំ សង្កាត់ នៅថ្ងៃទី ២១ ខែឧសភា នេះ ហើយនិងបញ្ចប់នៅថ្ងៃទី ៣ ខែមិថុនា គឺមានរយៈពេល ១៤ ថ្ងៃ ដើម្បីផ្សព្វផ្សាយពីគោលនយោបាយ និងកម្មវិធីនយោបាយរបស់ខ្លួនក្នុងការអភិវឌ្ឍឃុំ សង្កាត់ ដល់អ្នកបោះឆ្នោត។
លោក ឯម សូផាត សមាជិកគណៈកម្មាធិការជាតិរៀបចំការបោះឆ្នោត (គ.ជ.ប) ថ្លែងក្នុងកិច្ចប្រជុំ គ.ជ.ប នាថ្ងៃទី ២០ ខែឧសភា ថា សកម្មភាពឃោសនានេះមានដូចជា ការជួបជុំជាសាធារណៈ ការហែក្បួនព្យុហយាត្រា ការឃោសនាតាមផ្ទះ សកម្មភាពចែកចាយសម្ភារឃោសនាបោះឆ្នោតរបស់គណបក្សនយោបាយជាសាធារណៈ។
លោកថ្លែងថា សកម្មភាពឃោសនាដែលត្រូវហាមឃាត់ក្នុងការប្រើប្រាស់ឧបករណ៍បំពងសំឡេង គឺចាប់ពីម៉ោង ១២:០០ ថ្ងៃត្រង់ ដល់ម៉ោង ២:០០ រសៀល និងហាមឃាត់ការឃោសនានៅក្បែរមន្ទីរពេទ្យ និងក្បែរសាលារៀន ឬគ្រឹះស្ថានសិក្សានានាក្នុងពេលម៉ោងសិក្សា។ ចំពោះរាល់ការស្ទង់មតិ និងការផ្សព្វផ្សាយលទ្ធផលនៃការស្ទង់មតិពាក់ព័ន្ធនឹងកិច្ចការបោះឆ្នោតត្រូវបញ្ឈប់ ៧ ថ្ងៃ មុនថ្ងៃបោះឆ្នោត។
លោក ឯម សូផាត ថ្លែងថា៖ «ចំពោះការហែក្បួនឃោសនាបោះឆ្នោតឆ្លងកាត់ឃុំ សង្កាត់តែមួយត្រូវជូនដំណឹងទៅគណៈកម្មការឃុំ សង្កាត់រៀបចំការបោះឆ្នោតនោះ ហើយចំពោះការហែក្បួនឃោសនាឆ្លងកាត់ច្រើន ឃុំ សង្កាត់ត្រូវជូនដំណឹងទៅគណៈកម្មការឃុំ សង្កាត់រៀបចំការបោះឆ្នោតពាក់ព័ន្ធ និងគណៈកម្មការ រាជធានី ខេត្តរៀបចំការបោះឆ្នោត ដើម្បីសម្រួលការឃោសនា»។
លោកបន្ថែមថា ប្រសិនបើគណបក្សនយោបាយគ្រាន់តែធ្វើដំណើរឆ្លងកាត់ឃុំ សង្កាត់ ដោយមិនឃោសនាបោះឆ្នោត ក្បួនដង្ហែរបស់គណបក្សនយោបាយមិនត្រូវធ្វើសកម្មភាពឃោសនា និងប្រើប្រាស់ឧបករណ៍បំពងសំឡេងឃោសនាបោះឆ្នោតនោះទេ។
លោក វង សូត ប្រធានក្រុមការងារថ្នាក់ជាតិចុះជួយស្រុកពញាក្រែក ខេត្តត្បូងឃ្មុំនៃគណបក្សប្រជាជនកម្ពុជាបានចូលរួមជាមួយសមាជិកគណបក្សនេះក្នុងការបើកយុទ្ធនាការឃោសនា រកសំឡេងឆ្នោត ដោយលោកបានប្រាប់ដល់សមាជិកបក្ស ដែលបានចូលរួមក្នុងយុទ្ធនាការនេះឱ្យប្រកាន់យកនូវភាពថ្លៃថ្នូរជានិច្ច។
លោកបានអំពាវនាវផងដែរដល់គណបក្សនយោបាយ បេក្ខជន និងអ្នកគាំទ្រ ឱ្យគោរពតាមវិធាន បទប្បញ្ញត្តិ គោលការណ៍ច្បាប់ បទបញ្ជា និងនីតិវិធី និងក្រមសីលធម៌ ដើម្បីធានាឱ្យដំណើរការឃោសនានេះមានសន្តិសុខ សុវត្ថិភាព គ្មានការគំរាមកំហែង និងគ្មានអំពើហិង្សា។
ដោយឡែក សម្រាប់គណបក្សកម្ពុជានិយម គឺលោក យ៉ែម បុញ្ញឫទ្ធិ ដែលជាប្រធានគណបក្សបានបើកយុទ្ធនាការឃោសនានេះនៅភូមិទួលជៃ ឃុំព្រះស្ដេច ស្រុកព្រះស្ដេច ខេត្តព្រៃវែង ជាប់ព្រំដែនកម្ពុជា-វៀតណាម ដោយមានកម្រងរូបភាពយុទ្ធនាការឃោសនាបោះឆ្នោតដូចជា «មេឃុំ-ចៅសង្កាត់ ស្អាតស្អំ សកម្មបម្រើរាស្ត្រ។ កសាងអនាគតថ្មី ដើម្បីភូមិឃុំយើង។ គោលការណ៍និយម ប្រាកដនិយម គឺឥន្ទ្រីកម្ពុជានិយម! បុគ្គលមិនអមត: កម្ពុជាត្រូវនៅជាអមត:!»៕