ភ្នំពេញៈ ការចូលរួមរបស់កុមារនិងយុវវ័យនៅក្នុងព្រឹត្តិការណ៍ប្រព័ន្ឋស្បៀង មិនត្រឹមតែជួយបង្កើនការយល់ដឹងរបស់កុមារនិងយុវវ័យ អំពីសារៈសំខាន់នៃប្រព័ន្ឋស្បៀងនិងអាហារូបត្ថម្ភប៉ុណ្ណោះទេ ប៉ុន្តែថែមទាំងជួយរៀបចំពួកគាត់ឱ្យក្លាយជាអ្នកដឹកនាំធ្វើផែនការនិងអ្នកធ្វើសេចក្តីសម្រេចចិត្តដ៏រឹងមាំ ដើម្បីគាំទ្រវិស័យសន្តិសុខស្បៀងនិងអាហារូបត្ថម្ភសម្រាប់មនុស្សជំនាន់ក្រោយ។
នេះជាការលើកឡើងរបស់លោក សយ អ៊ឹង ប្រធាននាយកដ្ឋានសន្តិសុខស្បៀង អាហារូបត្ថម្ភ និងសុខាភិបាល នៃក្រុមប្រឹក្សាស្តារអភិវឌ្ឍន៍វិស័យកសិកម្មនិងជនបទ ក្នុងពិធីបោះជំរំយុវជនជើងឯកអាហារូបត្ថម្ភនៅតំបន់អារ៉ែង ខេត្តកោះកុង ដោយមានអ្នកចូលរួមចំនួន៣៥នាក់ ចាប់ពីថ្ងៃទី២០ដល់២២ ខែឧសភា។
លោកបានថ្លែងថា ៖ «ការធ្វើឲ្យប្រសើរឡើងនូវស្ថានភាពសន្តិសុខស្បៀងនិងអាហារូបត្ថម្ភរបស់កុមារនិងយុវវ័យ គឺជាកត្តាមិនអាចខ្វះបានសម្រាប់ធនធានមនុស្សជំនាន់ក្រោយ ពីព្រោះកុមារនិងយុវជនគឺជាអ្នកបន្តវេនរបស់ប្រទេសជាតិ ជាទំពាំងស្នងឬស្សីដែលទាមទារឲ្យមានការយកចិត្តទុកដាក់ខ្ពស់លើការអប់រំ រៀនសូត្រ ថែទាំសុខភាព សីលធម៌ សុជីវធម៌ក្នុងការរស់នៅ ការចូលរួមក្នុងកិច្ចការសង្គម បរិស្ថាន និងការអភិវឌ្ឍនានា»។
លោកបានបន្តថា ដើម្បីសម្រេចនូវវឌ្ឍនភាពនៃគោលដៅអភិវឌ្ឍប្រកបដោយចីរភាពទាំង១៧ របស់អង្គការសហប្រជាជាតិ ពិសេសគោលដៅទី២គឺ «បញ្ចប់ភាពអត់ឃ្លាន សម្រេចឱ្យបានសន្តិសុខស្បៀង ធ្វើឱ្យប្រសើរឡើងស្ថានភាពអាហារូបត្ថម្ភ និងលើកកម្ពស់កសិកម្មប្រកបដោយចីរភាព» ក្រុមប្រឹក្សាស្តារអភិវឌ្ឍន៍វិស័យកសិកម្មនិងជនបទ កំពុងធ្វើការយ៉ាងជិតស្និទ្ធជាមួយក្រសួង និងអ្នកពាក់ព័ន្ធ រៀបចំយុទ្ធសាស្ត្រជាតិស្តីពីសន្តិសុខស្បៀងនិងអាហារូបត្ថម្ភលើកទី២ ឆ្នាំ២០១៩-២០២៣។
ក្របខណ្ឌនៃយុទ្ធសាស្ត្រជាតិស្តីពីសន្តិសុខស្បៀង និងអាហារូបត្ថម្ភនៅកម្ពុជា មានបញ្ចូលបញ្ហាអន្តរវិស័យ យេនឌ័រនិងយុវជន / បរិស្ថាន/សមធម៌ បញ្ហាអន្តរវិស័យនៃយុទ្ធសាស្ត្រជាតិនេះ ធានាយ៉ាងណាឲ្យរាល់សកម្មភាពអាទិភាពទាំងអស់ ឆ្លុះបញ្ចាំងពីគោលដៅលើកកម្ពស់ការឆ្លើយតបចំពោះយេឌ័រ សមភាពយេឌ័រ និងការចូលរួមយុវជន ផ្តលភាពអង់អាចដល់ស្ត្រី យុវជនគឺជាបញ្ហាអាទិភាព»។
លោក សយ អ៊ឹង បានបញ្ជាក់ថា ៖ «បញ្ហាថ្មីមួយក្នុងចំណោមបញ្ហាថ្មីដែលត្រូវយកចិត្តទុកដាក់ដោះស្រាយនៅគឺការជម្រុញការចូលរួមរបស់យុវជន និងផ្តល់ឱកាសឲ្យយុវជនមានសម្លេងដើម្បីកំណត់បីអនាគតរបស់ពួកគេ។ កន្លងទៅថ្មីៗនេះកិច្ចសន្ទនាជាតិស្តីពីប្រព័ន្ធស្បៀងនៅកម្ពុជា និងបានដាក់ចេញ ផែនទីបង្ហាញផ្លូវសម្រាប់ប្រព័ន្ធស្បៀងប្រកបដោយចីរភាពឆ្ពោះទៅឆ្នាំ២០៣០ ផ្ញើជូនអង្គការសហប្រជាជាតិ កាលពីខែកញ្ញាឆ្នាំ២០២១ និងសម្រាប់ប្រើប្រាស់នៅក្នុងប្រទេសកម្ពុជា»។
ការបោះជំរំយុវជនជើងឯកអាហារូបត្ថម្ភនៅតំបន់អារ៉ែង ខេត្តកោះកុង នេះដែរ ត្រូវបានរៀបចំដោយ អង្គការ Helen Keller និងគម្រោង MUSEFO នៃអង្គការ GIZ សហការជាមួយក្រុមប្រឹក្សាស្តារអភិវឌ្ឍន៍វិស័យកសិកម្មនិងអភិវឌ្ឍន៍ជនបទ និងកម្មវិធីជាតិអាហារូបត្ថម្ភ ក្នុងគោលបំណងសំខាន់ចំនួន៤គឺ បង្កើនការយល់ដឹងរបស់យុវជនជើងឯកអាហារូបត្ថម្ភស្តីពីជម្រើសនិងរបៀបចម្អិនមុខម្ហូបសម្រាប់របបអាហារសុខភាព។
គោលបំណងទី២គឺប្រលងប្រណាំងលើការរៀបចំចម្អិនមុខម្ហូបសម្រាប់របបអាហារសុខភាពដែលដាក់ពិន្ទុដោយចុងភៅជំនាញ, ទី៣ ផ្តល់វេទិកាដល់យុវជនដើម្បីចែករំលែកការយល់ដឹង បទពិសោធន៍ និងមតិយោបល់លើជម្រើសនិងរបៀបចម្អិនមុខម្ហូបសម្រាប់របបអាហារសុខភាពនិងទី៤ពិភាក្សាលើយុទ្ធនាការមិត្តអប់រំមិត្ត សមិទ្ធិផល បញ្ហាប្រឈម ដំណោះស្រាយ និងជំហានបន្ទាប់។
លោកស្រី ជា ម៉ារី ប្រធានកម្មវិធីជាតិអាហារូបត្ថម្ភប ក៏បានឱ្យដឹងដែរថា នៅពេលដែលកុមារនិងយុវជនមានបញ្ហាកង្វះអាហារូបត្ថម្ភ នោះពួកគេនឹងបន្តមរតកដ៏គួរឲ្យភ័យខ្លាចនេះ ដល់កូនរបស់អ្នកជំនាន់ក្រោយបន្តទៀតដោយមិនដឹងខ្លួន។
លោកស្រីមានប្រសាសន៍ថា ៖ «នៅពេលដែលកូនរបស់ប្អូនៗទទួលមរតកកង្វះអាហារូបត្ថម្ភពីប្អូនៗ ពួកគេនឹងបាត់បង់ឱកាសយ៉ាងច្រើនក្នុងការទទួលបានការលូតលាស់រាងកាយដែលមានលក្ខណៈស្តង់ដារ ពោលគឺមានលក្ខណៈក្រិសក្រិនទាបតឿមិនស្អាតសង្ហារដូចកូនគេដែលមានអាហារូបត្ថម្ភគ្រប់គ្រាន់នោះទេ ហើយលើសពីនេះទៀតកូនៗរបស់ប្អូននឹងមានបញ្ហាប៉ះពាល់ដ៏ធ្ងន់ធ្ងរលើការអភិវឌ្ឍផ្នែកខួរក្បាលនិងសតិបញ្ញាស្មារតី»។
លោកស្រី ជា ម៉ារី បានលើកឡើងទៀតថា អ្នកវិទ្យាសាស្ត្របានរកឃើញថាកាលណាកុមារមានបញ្ហាកង្វះអាហារូបត្ថម្ភដូចជាស្គាំងស្គម ក្រិសក្រិន និងកង្វះមីក្រូសារជាតិពួកគេនឹងរៀនមិនពូកែ រៀនត្រួតថ្នាក់និងកាត់បន្ថយសក្តានុពលនៃការរកប្រាក់ចំណូល២២% នៅពេលពួកគេធំពេញវ័យ។
ការសិក្សាសាកលបានបង្ហាញថាកុមារដែលឈឺញឹកញាប់នឹងមានបញ្ហាកង្វះអាហារូបត្ថម្ភ ក្រុមគ្រួសារមានជីវភាពក្រីក្រត្រូវចំណាយថវិការចំនួន២០%នៃចំណូលសរុបដើម្បីព្យាបាលពួកគេ ដែលនឹងប៉ះពាល់ដល់ប្រាក់ចំណូលក្នុងគ្រួសារនិងប្រទេសជាតិទាំងមូល។ នេះបើតាមការបន្ថែមរបស់លោកស្រី ជា ម៉ារី៕