.jpg)
ជំនួបរដ្ឋមន្ត្រីដឹកជញ្ជូនក្នុងវេទិកាដឹកជញ្ជូនអន្តរជាតិ (ITF) នៅអាល្លឺម៉ង់ពីថ្ងៃ ១៩ ឧសភា។ រូបថត ក្រសួងសាធារណការ
ភ្នំពេញៈ រដ្ឋមន្ត្រីដឹកជញ្ជូនចំនួន ៦៣ ប្រទេសនៃវេទិកាដឹកជញ្ជូនអន្តរជាតិ (ITF) បានបោះឆ្នោតជាឯកច្ឆន្ទដាក់បញ្ចូលប្រទេសកម្ពុជាជាសមាជិកទី ៦៤ នៃ ITF នៅក្នុងកិច្ចប្រជុំកំពូលប្រចាំឆ្នាំទីក្រុង Leipzig (ឡាពហ្សិក) ប្រទេសអាល្លឺម៉ង់ពីថ្ងៃទី ១៩ ខែឧសភា។
លោក ឡេង ធនយុទ្ធា រដ្ឋលេខាធិការក្រសួងសាធារណការ និងដឹកជញ្ជូនបានថ្លែងក្នុងកិច្ចប្រជុំកំពូលនោះថា វាជាមោទនភាពយ៉ាងខ្លាំងចំពោះកម្ពុជាដែលត្រូវបានដាក់បញ្ចូលជាសមាជិកទី ៦៤ នៃ ITF នេះ ហើយវាក៏ជាការឆ្លុះបញ្ចាំងអំពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការអភិវឌ្ឍវិស័យដឹកជញ្ជូននិងភ័ស្តុភារកម្មនៅប្រទេសកម្ពុជាផងដែរ។
លោកថ្លែងថា៖ «ការចូលជាសមាជិកវេទិកាដឹកជញ្ជូនអន្តរជាតិនេះបានផ្តល់ឱកាសឱ្យប្រទេសកម្ពុជាទទួលបាន និងចែករំលែកចំណេះដឹង និងបទពិសោធល្អៗជាមួយបណ្តាប្រទេសជាសមាជិកទាំងអស់ជាទុនដល់ការអភិវឌ្ឍប្រព័ន្ធដឹកជញ្ជូនកម្ពុជាប្រកបដោយប្រសិទ្ធភាពនិរន្តរភាព និងបរិយាប័ន្ន»។
លោក ឡេង ធនយុទ្ធា បន្តថា កម្ពុជានឹងទទួលបាននូវការគាំទ្រពីប្រទេសជាសមាជិក និងលេខាធិការដ្ឋាននៃអង្គការ ITF នេះ ទាំងក្នុងក្របខ័ណ្ឌបច្ចេកទេស និងក្របខ័ណ្ឌគោលនយោបាយក្នុងការអភិវឌ្ឍវិស័យដឹកជញ្ជូន និងភ័ស្តុភារកម្មនៅកម្ពុជា។
សេចក្តីប្រកាសព័ត៌មានក្រសួងសាធារណការកម្ពុជាកាលពីថ្ងៃទី ២១ ខែឧសភាបានដកស្រង់សម្ដី លោក Young Tae Kim អគ្គលេខាធិការនៃ ITF ថ្លែងក្នុងកិច្ចប្រជុំកំពូលនោះថាកម្ពុជាជាប្រទេសតែ ១ គត់នៅក្នុងតំបន់អាស៊ីអាគ្នេយ៍ដែលបានចូលជាសមាជិកវេទិកានេះ ដោយប្រកាសស្វាគមន៍ពីសមាជិករបស់ ITF ហើយលោកសង្ឃឹមថា ប្រទេសដទៃទៀតនៅតំបន់អាស៊ីអាគ្នេយ៍នឹងចូលរួមជាសមាជិក ITF ផងដែរ។
លោកត្រូវបានដកស្រង់សម្ដីថា៖ «ITFបានត្រៀមខ្លួនជាស្រេចក្នុងការជួយប្រទេសកម្ពុជាក្នុងការកសាងគោលនយោបាយដឹកជញ្ជូន និងភ័ស្តុភារកម្ម ដើម្បីសម្រេចគោលដៅរបស់ខ្លួនដូចមានចែងនៅក្នុងផែនការមេស្តីពីការតភ្ជាប់ប្រព័ន្ធដឹកជញ្ជូនពហុមធ្យោបាយ និងភ័ស្តុភារកម្ម»។
ប្រតិភូជិត ៩០០ នាក់បានជួបប្រជុំគ្នានៅទីក្រុង Leipzig ប្រទេសអាល្លឺម៉ង់ចាប់ពីថ្ងៃទី ១៨ ដល់ថ្ងៃទី ២០ ខែឧសភា សម្រាប់កិច្ចប្រជុំកំពូល ITF ឆ្នាំ ២០២២ ក្រោមប្រធានបទ «ការដឹកជញ្ជូនសម្រាប់សង្គមប្រកបដោយបរិយាបប័ន្ន»។
សេចក្តីប្រកាសព័ត៌មាន ITF ចេញផ្សាយកាលពីថ្ងៃទី ១៩ បានដកស្រង់សម្ដីលោក Young Tae Kimថា ប្រទេសកម្ពុជាគឺជាប្រទេសដែលមានការអភិវឌ្ឍយ៉ាងឆាប់រហ័សក្នុងចំណោមប្រទេសក្នុងតំបន់អាស៊ីអាគ្នេយ៍ដែលតម្រូវការដឹកជញ្ជូនមនុស្ស និងទំនិញកំពុងកើនឡើង។
លោកថ្លែងថា៖ «ITF ត្រៀមខ្លួនរួចជាស្រេច ដើម្បីជួយដល់ប្រទេសកម្ពុជាក្នុងការពង្រឹងគោលនយោបាយដឹកជញ្ជូនរបស់ខ្លួនបន្ថែមទៀត ដើម្បីបំពេញតម្រូវការរបស់ប្រជាជន និងសេដ្ឋកិច្ចរបស់ខ្លួន។
ITF ទន្ទឹងរង់ចាំស្តាប់នូវបទពិសោធដឹកជញ្ជូនរបស់កម្ពុជា ដើម្បីឱ្យប្រទេសសមាជិកផ្សេងទៀតបានរៀនសូត្រនូវបទពិសោធទាំងនេះ»។
ITF គឺជាអង្គការអន្តររដ្ឋាភិបាលដែលមានប្រទេសសមាជិកចំនួន ៦៤ ដើរតួជាអ្នករៀបចំគោលនយោបាយដឹកជញ្ជូន និងកិច្ចប្រជុំកំពូលប្រចាំឆ្នាំរបស់រដ្ឋមន្ត្រីដឹកជញ្ជូន។ ITF គឺជាស្ថាប័នសកលតែ ១ គត់ដែលគ្របដណ្តប់គ្រប់មធ្យោបាយដឹកជញ្ជូនទាំងអស់។
ITF ធ្វើការសម្រាប់គោលនយោបាយដឹកជញ្ជូនដែលធ្វើឱ្យជីវិតប្រជាជនប្រសើរឡើង និងមានបេសកកម្មជំរុញការយល់ដឹងកាន់តែស៊ីជម្រៅអំពីតួនាទីនៃការដឹកជញ្ជូនសម្រាប់កំណើនសេដ្ឋកិច្ចនិរន្តរភាពបរិស្ថាន និងបរិយាប័ន្នសង្គម ដើម្បីលើកគោលនយោបាយដឹកជញ្ជូន។
ITF គឺជាវេទិការៀបចំកិច្ចសន្ទនាជាសកលសម្រាប់ការដឹកជញ្ជូនកាន់តែប្រសើរឡើងដែលពិភាក្សា និងចរចាជាមុនអំពីបញ្ហាគោលនយោបាយជុំវិញមធ្យោបាយដឹកជញ្ជូនទាំងអស់។ ITF វិភាគនិន្នាការចែករំលែកចំណេះដឹង និងលើកកម្ពស់ការផ្លាស់ប្តូររវាងអ្នកធ្វើសេចក្តីសម្រេចអំពីការដឹកជញ្ជូន និងសង្គមស៊ីវិល។
កិច្ចប្រជុំកំពូលប្រចាំឆ្នាំរបស់ ITF គឺជាការប្រមូលផ្តុំរដ្ឋមន្ត្រីដឹកជញ្ជូនដ៏ធំបំផុតរបស់ពិភពលោក និងជាវេទិកាពិភពលោកឈានមុខគេសម្រាប់ការសន្ទនាលើគោលនយោបាយដឹកជញ្ជូន៕
