ភ្នំពេញៈ ទិវាមាត្រាសាស្ត្រពិភពលោកឆ្នាំ ២០២២ ត្រូវបានប្រារព្ធឡើងក្រោមប្រធានបទ «មាត្រាសាស្ត្រក្នុងយុគសម័យឌីជីថល» ដែលត្រូវបានជ្រើសរើសដោយសារបច្ចេកវិទ្យាឌីជីថលកំពុងធ្វើបដិវត្តន៍សហគមន៍ ហើយជានិន្នាការដ៏គួរឱ្យចាប់អារម្មណ៍បំផុតមួយនៅក្នុងសង្គមបច្ចុប្បន្ន។
ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បានឱ្យដឹងថា ថ្ងៃទី ២០ ខែឧសភា ដែលជាថ្ងៃបណ្តាប្រទេសលើពិភពលោកប្រារព្ធទិវាមាត្រាសាស្ត្រពិភពលោក (World Metrology Day)។
ការប្រារព្ធទិវាមាត្រាសាស្ត្រពិភពលោកនេះ ត្រូវបានប្រព្រឹត្តទៅជាប្រចាំឆ្នាំក្នុងគោលបំណងរំឭកអំពីការចុះហត្ថលេខាស្តីពីអនុសញ្ញាខ្នាត ដែលត្រូវបានរៀបចំឡើងកាលពីថ្ងៃទី ២០ ខែឧសភា ឆ្នាំ ១៩៧៥ ដោយមានតំណាងប្រទេសចំនួន ១៧ បានចុះហត្ថលេខា។
ក្រសួងបានលើកឡើងតាមរយៈសេចក្តីប្រកាសព័ត៌មានថា មជ្ឈមណ្ឌលមាត្រាសាស្ត្រជាតិនៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក៏បានគ្រោងរៀបចំទិវាមាត្រាសាស្ត្រពិភពលោកនេះផងដែរ ដើម្បីផ្សព្វផ្សាយពីសារៈសំខាន់ និងឥទ្ធិពលនៃមាត្រាសាស្ត្រក្នុងយុគសម័យឌីជីថល ក៏ដូចការរស់នៅតាមរយៈការជួយដោះស្រាយបញ្ហាពាណិជ្ជកម្ម វិទ្យាសាស្ត្រ បច្ចេកវិទ្យាសុវត្ថិភាព និងការធ្វើឱ្យប្រសើរឡើងនូវគុណភាពជីវិត។
សេចក្តីប្រកាសបានឱ្យដឹងថា នៅទូទាំងពិភពលោក វិទ្យាស្ថានមាត្រាសាស្ត្រជាតិខិតខំបន្តធ្វើឱ្យប្រសើរឡើងនូវវិទ្យាសាស្ត្ររង្វាស់រង្វាល់ ដោយអភិវឌ្ឍ និងធ្វើឱ្យមានសុពលភាពបច្ចេកទេសរង្វាស់រង្វាល់ថ្មីៗនៅកម្រិតចាំបាច់នៃភាពទំនើប។
មាត្រាសាស្ត្រ គឺជាវិស័យមួយក្នុងចំណោមវិស័យសំខាន់ៗផ្សេងទៀតដែលពិភពលោកបានយកចិត្តទុកដាក់ ជាពិសេសមាត្រាសាស្ត្រដើរតួនាទីយ៉ាងសំខាន់នៅក្នុងការរស់នៅរបស់មនុស្ស ជាអាទិ៍ ជួយគាំទ្រ សុខុមាលភាពរបស់សង្គមទំនើបដោយគាំទ្រលើផ្នែកពាណិជ្ជកម្ម បទប្បញ្ញត្តិបច្ចេកទេស ការផលិត និងការការពារអតិថិជនដោយវាពាក់ព័ន្ធស្ទើរគ្រប់ផ្នែកនៃការរស់នៅប្រចាំថ្ងៃរបស់មនុស្សជាតិ។
ក្រសួងដដែលនេះបានបញ្ជាក់ទៀតថា កម្ពុជាមានក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដែលទទួលខុសត្រូវ និងបំពេញតួនាទីក្នុងការចង្អុលបង្ហាញដល់មជ្ឈមណ្ឌលមាត្រាសាស្ត្រជាតិលើការងារវិទ្យាសាស្ត្រ បច្ចេកវិទ្យាមាត្រាសាស្ត្រ។
ក្នុងនោះដែរ កម្ពុជាក៏បានចូលជារដ្ឋសមាជិក រួមមាន អង្គការនីត្យានុកូលមាត្រាសាស្ត្រ អន្តរជាតិ,អង្គការវេទិកានីត្យានុកូលមាត្រាសាស្ត្រ អាស៊ីប៉ាស៊ីហ្វិក, អង្គការកម្មវិធីមាត្រាសាស្ត្រអាស៊ីប៉ាស៊ីហ្វិក, ក្រុមការងារទី ៣ នៃគណៈកម្មាធិការពិគ្រោះយោបល់អាស៊ានស្តង់ដា និងគុណភាព និងជាសមាជិកអង្កេតការណ៍ក្នុងអង្គការការិយាល័យអន្តរជាតិទម្ងន់ និងរង្វាស់រង្វាល់។
យោងតាមសេចក្តីប្រកាសព័ត៌មានរបស់ការិយាល័យមាត្រាសាស្ត្រអន្តរជាតិ បានឱ្យដឹងថា ប្រធានបទឆ្នាំនេះត្រូវបានជ្រើសរើស ដោយសារបច្ចេកវិទ្យាឌីជីថលកំពុងធ្វើបដិវត្តន៍សហគមន៍ ហើយជានិន្នាការដ៏គួរឱ្យរំភើបបំផុតមួយនៅក្នុងសង្គមនាពេលបច្ចុប្បន្ននេះ។
ការិយាល័យមាត្រាសាស្ត្រអន្តរជាតិបានលើកឡើងថា ជាការពិតមាត្រាសាស្ត្រកាន់តែទូលំទូលាយ វិទ្យាសាស្ត្រនៃការវាស់វែង ដើរតួនាទីកាន់តែសំខាន់ក្នុងការរកឃើញ និងការច្នៃប្រឌិតបែបវិទ្យាសាស្ត្រ ផលិតកម្ម ឧស្សាហកម្ម និងពាណិជ្ជកម្មអន្តរជាតិ ក្នុងការលើកកម្ពស់គុណភាពជីវិត និងការពារបរិស្ថានពិភពលោក។
ប្រភពដដែលបានបញ្ជាក់ថា៖ «ទិវាមាត្រាសាស្ត្រពិភពលោកជាការរំឭកអំពីការចុះហត្ថលេខាស្តីពីអនុសញ្ញាខ្នាតនៅថ្ងៃទី ២០ ខែឧសភាឆ្នាំ ១៨៧៥ ដោយតំណាងនៃប្រទេសចំនួន ១៧។ អនុសញ្ញានេះកំណត់ក្របខ័ណ្ឌសម្រាប់កិច្ចសហប្រតិបត្តិការជាសកលក្នុងវិទ្យាសាស្ត្រនៃការវាស់វែង និងក្នុងកម្មវិធីឧស្សាហកម្ម ពាណិជ្ជកម្ម និងសង្គម»។
គោលបំណងដើមនៃអនុសញ្ញាខ្នាតដែលជាឯកសណ្ឋាននៃការវាស់វែងទូទាំងពិភពលោកនៅតែមានសារៈសំខាន់នាពេលសព្វថ្ងៃដូចនឹងកាលពីឆ្នាំ ១៨៧៥ ផងដែរ៕