ភ្នំពេញៈ អង្គការយូនីសេហ្វបានឱ្យដឹងថា ចំនួនកុមារដែលមានបញ្ហាស្គមស្គាំងធ្ងន់ធ្ងរមានការកើនឡើងតាំងពីនៅមុនពេលមានសង្គ្រាមនៅប្រទេសអ៊ុយក្រែន ហើយសង្គ្រាមក៏បានកំពុងធ្វើឱ្យពិភពលោក ធ្លាក់កាន់តែជ្រៅទៅក្នុងវិបត្តិ ស្បៀងអាហារសកល ខណៈនៅប្រទេសកម្ពុជាកុមារចំនួន ១០ ភាគរយមានបញ្ហាស្គមស្គាំង។
ស្ថានភាពពិភពលោកកំពុងបង្កមហន្តរាយលើបញ្ហាខ្វះអាហារូបត្ថម្ភធ្ងន់ធ្ងរសម្រាប់កុមារ ការឡើងតម្លៃស្បៀងអាហារ និងការកាត់បន្ថយថវិកាសម្រាប់ប្រយុទ្ធនឹងជំងឺរាតត្បាតនឹងបង្កើននូវករណីខ្វះអាហារូបត្ថម្ភធ្ងន់ធ្ងរ ស្របពេលដែលជំនួយនៃការព្យាបាលសង្គ្រោះជីវិតកំពុងធ្លាក់ចុះ។ នេះបើតាមសេចក្តីប្រកាសព័ត៌មានរបស់អង្គការយូនីសេហ្វ កាលពីថ្ងៃទី ១៨ ខែឧសភា។
អង្គការដដែលនេះបានបន្តថា បញ្ហាស្គមស្គាំងធ្ងន់ធ្ងរ ពោលគឺស្ថានភាពកុមារស្គមខ្លាំងពេកបើធៀបនឹងកម្ពស់ខ្លួន ដែលបង្កឡើងដោយប្រព័ន្ធការពាររាងកាយខ្សោយ គឺជាទម្រង់នៃការខ្វះអាហារូបត្ថម្ភចំពោះមុខ អាចមើលឃើញយ៉ាងច្បាស់ និងកំពុងគំរាមកំហែងដល់អាយុជីវិត។ នៅទូទាំងពិភពលោក កុមារអាយុក្រោម ៥ ឆ្នាំ យ៉ាងហោចណាស់ចំនួន ១៣,៦ លាននាក់ មានបញ្ហាស្គមស្គាំងធ្ងន់ធ្ងរ ដែលបង្កឱ្យកុមារម្នាក់ក្នុងចំណោមកុមារ ៥ នាក់ក្នុងក្រុមអាយុនេះបានបាត់បង់ជីវិត។
យូនីសេហ្វ បញ្ជាក់ថា៖ «នៅប្រទេសកម្ពុជា កុមារចំនួន ១០ ភាគរយមានបញ្ហាស្គមស្គាំង។ កុមារទាំងនោះ ច្រើនមកពីគ្រួសារដែលមានស្ថានភាពសេដ្ឋកិច្ចសង្គមងាយរងគ្រោះ។ ពួកគេពុំសូវទទួលបានទឹកស្អាត និងលក្ខខណ្ឌអនាម័យប្រកបដោយសុវត្ថិភាព និងខ្វះការអនុវត្តល្អក្នុងការផ្ដល់អាហារដល់ទារក និងកុមារតូច»។ នៅកម្ពុជា មូលនិធិដើម្បីប្រយុទ្ធនឹងបញ្ហាស្គមស្គាំងធ្ងន់ធ្ងរ គឺមានចំនួនមិនគ្រប់គ្រាន់ទ្បើយ ដើម្បីឆ្លើយតបនឹងតម្រូវការកាន់តែកើនទ្បើង។ ផែនទីបង្ហាញផ្លូវជាតិ សម្រាប់ឆ្លើយតបនឹងបញ្ហាស្គមស្គាំងរបស់កុមារ ត្រូវបានកំណត់តម្លៃថា មានចំនួនសរុបស្មើនឹង ២៥ លានដុល្លារដើម្បីឆ្លើយតបនឹងតម្រូវការនៃបញ្ហាខ្វះអាហារូបត្ថម្ភនៅក្នុងរយៈពេល ៣ ឆ្នាំខាងមុខ។ ទោះយ៉ាងណាក្ដី ៦៩% (១៧,២ ដុល្លារ) នៃមូលនិធិ ត្រូវការសម្រាប់ការអនុវត្តពេញលេញនូវផែនការ សកម្មភាពនេះគឺមិនទាន់មានថវិកាគ្រប់គ្រាន់នៅទ្បើយ។ នេះបើយោងតាមសេចក្តីប្រកាសព័ត៌មានរបស់អង្គការយូនីសេហ្វ។
តំណាងអង្គការយូនីសេហ្វប្រចាំកម្ពុជា លោកស្រី ហ្វ័រូហ្គ ហ្វយូហ្សិថ បានលើកឡើងថា អាហារូបត្ថម្ភដើរតួនាទីយ៉ាងសំខាន់នៅក្នុងការអភិវឌ្ឍវ័យកុមារតូច និងមានឥទ្ធិពលយ៉ាងសំខាន់លើសមត្ថភាពរបស់កុមារក្នុងការរស់រាន ចម្រើនពេញវ័យ រៀនសូត្រ និងរីកចម្រើន។
លោកស្រីបញ្ជាក់ថា៖ «យូនីសេហ្វកំពុងធ្វើការងារជាមួយរាជរដ្ឋាភិបាលកម្ពុជា ដើម្បីចាត់អាទិភាពលើបញ្ហា ស្គមស្គាំងនៅក្នុងគោលនយោបាយ និងថវិកាជាតិ ដើម្បីបិទភ្ជិតគម្លាតនេះ ជាពិសេសដោយស្វែងរកមតិគាំទ្រឱ្យមានការផ្ដល់ហិរញ្ញប្បទាន ប្រកបដោយចីរភាពសម្រាប់ធានាឱ្យមានអាហារព្យាបាលផលិតរួចស្រេច (RUTF) ដើម្បីព្យាបាលបញ្ហាខ្វះអាហារូបត្ថម្ភធ្ងន់ធ្ងរក្នុងវ័យកុមារភាព»។ លោកស្រី បន្តថា អង្គការយូនីសេហ្វនៅកម្ពុជាក៏កំពុងគាំទ្ររាជរដ្ឋាភិបាលក្នុងការពង្រឹង សកម្មភាពចុះដល់សហគមន៍ផងដែរ ដោយសារហេតុនេះ ករណីនៃបញ្ហាស្គមស្គាំងធ្ងន់ធ្ងរត្រូវបានកំណត់ឃើញតាំងពីដំបូង ហើយអ្នកថែទាំដឹងអំពីសេវាសុខភាព និងអាហារូបត្ថម្ភនៅក្នុងតំបន់របស់ពួកគេនឹងចូលរួមនៅក្នុងការប្រើប្រាស់សេវាទាំងនោះជាប្រចាំ សម្រាប់ការបង្ការបញ្ហាខ្វះអាហារូបត្ថម្ភ។
ដើម្បីឆ្លើយតបនឹងវិបត្តិសកលនេះ យូនីសេហ្វ បានស្នើដល់រដ្ឋាភិបាល ដៃគូអភិវឌ្ឍន៍ និងអង្គការសង្គមស៊ីវិលនានានៅជុំវិញពិភពលោក ត្រូវចាត់អាទិភាពលើការផ្ដល់មូលនិធិបន្ទាន់ សម្រាប់អន្តរាគមន៍ផ្តល់អាហារព្យាបាល និងការព្យាបាល សម្រាប់កុមារមានបញ្ហាស្គមស្គាំង និងធានាឱ្យមាននូវមូលនិធិសម្រាប់តម្រូវការរយៈពេលវែងនៃកុមារដែលងាយរងគ្រោះបំផុត។
ប្រធានអនុក្រុមបច្ចេកទេសទឹកស្អាត អនាម័យ និងអាហារូបត្ថម្ភ លោក ជា សំណាង ធ្លាប់បានលើកឡើងថា ផ្អែកតាមការសិក្សាមួយនៅកម្ពុជាក្នុងឆ្នាំ ២០១៦ ស្តីពីបន្ទុកសេដ្ឋកិច្ចនៃបញ្ហាកង្វះអាហារូបត្ថម្ភទៅលើស្ត្រីមានផ្ទៃពោះ និងកុមារអាយុក្រោម ៥ ឆ្នាំបានបង្ហាញថា កង្វះអាហារូបត្ថម្ភនឹងធ្វើឱ្យកម្ពុជាខាតបង់ប្រមាណ ២៦៦ លានដុល្លារក្នុង ១ ឆ្នាំ ឬស្មើនឹង ១,៧ ភាគរយនៃផលិតផល ក្នុងស្រុកសរុប (GDP) នៅកម្ពុជា។ លោក ជា សំណាង មានប្រសាសន៍ថា៖ «កុមារកម្ពុជាដែលមានអាយុក្រោម ៥ ឆ្នាំ មាន ៣២% រងគ្រោះដោយបញ្ហាក្រិសក្រិន ១០ ភាគរយស្គមស្គាំង និង ២៤ ភាគរយ មិនគ្រប់ទម្ងន់។ ចំពោះកុមារក្រិសក្រិននេះ វាជាបញ្ហាសុខភាពសាធារណៈ ដែលមានភាពធ្ងន់ធ្ងរជាងគេ ដែលមានការប៉ះពាល់ច្រើនណាស់មិនត្រឹមតែកុមារ និងគ្រួសារខ្លួនឯងប៉ុណ្ណោះទេ តែក៏ប៉ះពាល់ដល់ប្រទេសជាតិផងដែរ»។
ក្នុងកិច្ចប្រជុំកំពូលស្ដីពីប្រព័ន្ធស្បៀង ដែលរៀបចំដោយអគ្គលេខាធិការអង្គការសហប្រជាជាតិនាទីក្រុងញូវយ៉កកាលពីចុងឆ្នាំ ២០២១ លោក យឹម ឆៃលី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទលើកឡើងថា រាជរដ្ឋាភិបាលកម្ពុជាបានដាក់ចេញនូវអាទិភាព ដើម្បីសម្រេចឱ្យបាននូវចក្ខុវិស័យស្តីពីប្រព័ន្ធស្បៀងឆ្នាំ ២០៣០ ដែលផ្តល់នូវសន្តិសុខស្បៀង និងអាហារូបត្ថម្ភ សម្រាប់មនុស្សគ្រប់រូបគិតគូរពីចីរភាពសេដ្ឋកិច្ចសង្គម និងបរិស្ថាន៕